(ភ្នំពេញ)៖ ការប្រឡងប្រជែងជ្រើសរើសមន្ត្រីកសិកម្មឃុំ ឆ្នាំ២០២៣ បានបញ្ចប់ជាស្ថាពរ នៅវេលាម៉ោង៥ល្ងាច ថ្ងៃទី១៧ ខែធ្នូ ឆ្នាំ២០២៣នេះ ដែលនេះជាការចេញដំណើរយ៉ាងស្វាហាប់ ប្រកបដោយភាពលម្អិត ហ្មត់ចត់ មានវិន័យ និងមានសណ្តាប់ធ្នាប់។
ចាប់តាំងពីម៉ោង ៦ព្រឹកមក គ្រប់ដំណាក់កាលទាំងអស់ នៃការប្រឡងប្រជែង ចាប់ផ្តើមពីការរៀបចំតាក់តែងវិញ្ញាសា ការជ្រើសរើសវិញ្ញាសា ការចែកវិញ្ញាសា ការបែងចែកអនុគណៈកម្មការទទួលបន្ទុក និងការគ្រប់គ្រងដំណើរការទាំងអស់នៃការប្រឡងសុទ្ធតែត្រូវបានឆ្លងកាត់ការរៀបចំយ៉ាងលម្អិត ដែលចេញពីការគិតគូរ និងការយកចិត្តទុកដាក់ខ្ពស់បំផុត។
លើសពីនេះ បេក្ខជនទាំងអស់ត្រូវបានជូនដំណឹងឲ្យត្រៀមខ្លួនរួចជាស្រេច មុនពេលមកមណ្ឌលប្រឡង ហើយត្រូវបានត្រួតពិនិត្យ មុនពេលអនុញាតិឲ្យចូលក្នុងបន្ទប់ប្រឡង។ ជារួម ការប្រឡងប្រជែងក្រោមក្រសែភ្នែកអ្នកសង្កេតការជាច្រើនរូប ត្រូវបានកត់សម្គាល់ឃើញថាមានវិន័យ មានតម្លាភាព និងយុត្តិធម៌។
តាងនាមគណៈកម្មការរៀបចំការប្រឡង លោក ហ៊ុន ម៉ានី សូមថ្លែងអំណរគុណដល់ស្ថាប័ន អង្គភាពពាក់ព័ន្ធ និងក្រុមការងារទាំងអស់ ដែលបានចូលរួមក្នុងដំណើរការកន្លងមក ហើយសម្រាប់ថ្ងៃនេះ សូមអរគុណដល់សាកលវិទ្យាល័យភូមិន្ទភ្នំពេញ រួមទាំងអាជ្ញាធរ មន្ត្រីសុខាភិបាល ដែលបានផ្តល់ទីតាំង និងសម្របសម្រួលការងារនានានៅមណ្ឌលប្រឡង ធ្វើឲ្យដំណើរការប្រឡងប្រព្រឹត្តទៅបានយ៉ាងរលូន និងមានសណ្តាប់ធ្នាប់។
សូមជម្រាបថា ការប្រឡងប្រជែងជ្រើសរើសមន្ត្រីកសិកម្មឃុំឆ្នាំ២០២៣ ចាប់ផ្តើមនៅវេលាម៉ោង១២៖០០ថ្ងៃត្រង់ រហូតដល់ម៉ោង៥៖០០នាទីល្ងាច ដោយបេក្ខជនត្រូវឆ្លងកាត់ការប្រឡងលើវិញ្ញាសា៣ ប្រភេទ៖ ១៖ វិញ្ញាសាសរសេរជំនាញកសិកម្ម, ២៖ វិញ្ញាសាពហុចម្លើយ, ៣៖ វិញ្ញាសារសរសេរភាសាអង់គ្លេស។ បេក្ខជនសរុបចំនួន ៣៣៨១នាក់ នឹងចូលរួមប្រឡងប្រជែងជ្រើសរើសមន្ត្រីកសិកម្មឃុំឆ្នាំ២០២៣ នៅមណ្ឌលប្រឡង សាកលវិទ្យាល័យភូមិន្ទភ្នំពេញ៕
