(សឹង្ហបុរី)៖ ដោយមានការអញ្ជើញ ពីការិយាល័យកម្មសិទ្ធិបញ្ញា នៃប្រទេសសឹង្ហបុរី (Intellectual Property Office of Singapore – IPOS) លោកទេសរដ្ឋមន្រ្តី ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានដឹកនាំគណៈប្រតិកម្ពុជា ទៅចូលរួមកម្មវិធីសប្តាហ៍​កម្មសិទ្ធិបញ្ញា ក្រោមប្រធានបទ «សន្និសីទសកលអំពីការច្នៃប្រឌិត ដើម្បីពន្លឿនកម្មសិទ្ធិបញ្ញា» ដែលកំពុងប្រព្រឹត្តទៅ​នៅប្រទេសសិង្ហបុរី ចាប់ពីថ្ងៃទី២២ ដល់​២៤ ខែសីហា ឆ្នាំ២០១៦។​ ក្នុងនោះ ក្រសួងឧស្សាហកម្ម និងសិប្បកម្ម ក៏ប្រកាសបន្តកិច្ចសហប្រតិបត្តិការ ជាមួយស្ថាប័នកម្មសិទ្ធ​បញ្ញាសឹង្ហបុរី ដើម្បីអភិវឌ្ឍវិស័យកម្មសិទ្ធិបញ្ញា នៅកម្ពុជាឲ្យកាន់តែ មានភាពរីកចម្រើនទៅមុខ។

ក្នុងកម្មវិធីសប្តាហ៍​កម្មសិទ្ធិបញ្ញានេះដែរ ក៏មាននូវកិច្ចប្រជុំជាន់ខ្ពស់ រវាងក្រសួងឧស្សាហកម្ម និងសិប្បកម្ម​កម្ពុជា ជាមួយ​ស្ថាប័នកម្មសិទ្ធិបញ្ញា​សឹង្ហបុរី (IPOS) ដោយបានផ្តោតសំខាន់ លើការរៀបចំផែនការសម្រាប់ ការអនុវត្តការងារបន្ត ឆ្នាំ២០១៦ និង២០១៧ ស្តីពីការអនុវត្តអនុស្សារណ:យោគយល់ (MOU) លើកិច្ចសហប្រតិបត្តិការ ទទួលស្គាល់ប្រកាស​នីយបត្រតក្កកម្ម (Patent) គ្នាទៅវិញទៅមក ហើយជាលទ្ធផល​ អង្គភាពកម្មសិទ្ធិបញ្ញា​​សឹង្ហបុរី នឹងបន្តធ្វើកិច្ចសហប្រតិបត្តិការ ជាមួយក្រសួងឧស្សាហកម្ម និងសិប្បកម្មកម្ពុជា លើវិស័យកម្មសិទ្ធឧស្សាហកម្ម ដោយជួយសហការធ្វើការស្រាវជ្រាវ និងត្រួតពិនិត្យលើប្រកាសនីយ​បត្រតក្កកម្ម (Patent) ដែលនៅសល់ពីមុន មកមិនទាន់បានត្រួតពិនិត្យ និងជួយសម្របសម្រួល បណ្តុះបណ្តាលមន្ត្រីជំនាញ ឲ្យយល់ដឹងពីនីតិវិធី ទទួលពាក្យសុំជាអន្តរជាតិ នៅពេលកម្ពុជាចូលជា សមាជិកសន្ធិសញ្ញា សហប្រតិបត្តិការប្រកាសនីយ​បត្រតក្កកម្ម (PCT) នៅពេលខាងមុខ។

បើតាមការឲ្យដឹង ពីមន្ត្រីនៃក្រសួងឧស្សាហកម្ម និងសិប្បកម្ម បានបញ្ជាក់ដឹងថា ពាក់ព័ន្ធនឹងការងារកម្ម​សិទ្ធបញ្ញានេះ ក្រៅពីកិច្ចសហប្រតិបត្តិការ ជាមួយប្រទេសសឹង្ហបុរី និងប្រទេសមួយ​ចំនួនទៀត កម្ពុជាកំពុងរៀបចំលិខិតបទដ្ឋាន បច្ចេកទេសនានា ដើម្បីសុំចូលជា​សមាជិកនៃសន្ធិសញ្ញា សហប្រតិបត្តិការប្រកាស​នីយបត្រតក្កកម្ម (The Patent Cooperation Treaty – PCT) ដែលស្ថិតនៅក្រោម ការគ្រប់គ្រងរបស់អង្គការ​កម្មសិទ្ធ​បញ្ញាពិភព​​លោក (WIPO) ហើយនៅពេល​ដែលកម្ពុជា​ ក្លាយ ជាសមាជិកនៃសន្ធិសញ្ញា ​អន្តរជាតិមួយនេះ យើងនឹងទទួលបាននូវអត្ថប្រយោជន៍​​យ៉ាងច្រើន ក្នុងការជំរុញវិស័យ​កម្មសិទ្ធបញ្ញា នៅកម្ពុជា ឲ្យមានសន្ទុះកាន់តែលឿន៕