(កោះកុង)៖ លោក កៅ ខុនដារ៉ា ប្រធានក្រុមការងារថ្នាក់ជាតិចុះមូលដ្ឋានខេត្តកោះកុង និងសមាជិក សមាជិកាទាំងអស់ បានថ្លែងអំណរគុណសម្ដេចតេជោ ហ៊ុន សែន ដែលបានផ្ដល់ផ្លូវមួយខ្សែប្រវែង១៨គីឡូម៉ែត្រ ពីរួមស្រុកថ្មបាំងទៅតំបន់អារ៉ែង។

លោក កៅ ខុនដារ៉ា បានថ្លែងនៅព្រឹកថ្ងៃទី២៣ ខែសីហា ឆ្នាំ២០១៦នេះថា «ខ្ញុំមានសេចក្តីរីក រាយក្រៃលែង ហើយខ្ញុំតំណាងឲ្យសមាជិក សមាជិកាទាំងអស់ សូមថ្លែងអំណរគុណ សម្តេចនាយករដ្ឋមន្រ្តី ចំពោះការផ្តល់ផ្លូវមួយខ្សែ១៨គីឡូម៉ែត្រ ទៅតំបន់អារ៉ែង»។

សូមបញ្ជាក់ថា នៅថ្ងៃទី២២ ខែសីហា ម្សិលមិញនេះ នៅក្នុងវេទិកាស្តីពីការការពារ និង អភិរក្សធនធានធម្មជាតិ នាវិមានសន្តិភាព សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានសម្រេចយល់ព្រមសាងសង់ផ្លូវ និងស្ពានប្រវែង១៨គីឡូម៉ែត្រ ចូលទៅតំបន់អារ៉ែង ដោយផ្តល់ការទទួលខុសត្រូវទៅឲ្យក្រសួងអភិវឌ្ឍន៍ជនបទ។ សម្តេចតេជោ ហ៊ុន សែន បានបន្តថា ការសាងសង់ផ្លូវ និងស្ពានខាងលើនេះ គឺដើម្បីជាប្រយោជន៍បម្រើដល់វិស័យទេសចរណ៍ និងប្រជាពលរដ្ឋ នៅតំបន់នោះ មិនមែនបម្រើដល់ការកាប់ឈើនោះឡើយ។ សម្តេចថា ត្រូវធ្វើយ៉ាងណា ឲ្យតំបន់អារ៉ែង ក្លាយទៅជាតំបន់ទេសចរណ៍ដ៏ទាក់ទាញ សម្រាប់ទេសចរទៅកម្សាន្ត និងទស្សនា៕