(ភ្នំពេញ)៖ កម្មវិធីជំនួបនេះត្រូវបានផ្ដួចផ្ដើមឡើងដោយ «សហគ្រិនខ្មែរ» ដោយបានប្រមូលផ្តុំស្ថាប័នហិរញ្ញវត្ថុ និងសហគ្រាសធុនតូច និងមធ្យម (SMEs) ជាច្រើនអង្គភាព ដើម្បីដោះស្រាយបញ្ហាលទ្ធភាពទទួលបានហិរញ្ញវត្ថុ ដែលជាផ្នែកនៃដំណើរឆ្ពោះទៅកសាងប្រព័ន្ធអេកូឡូស៊ីសហគ្រិនភាពដ៏រស់រវើកនៅកម្ពុជា។

កម្មវិធីនេះមានអ្នកចូលរួមជាង១០០នាក់រួមមាន៖ សហគ្រាសធុនតូច និងមធ្យម និងស្ថាប័នហិរញ្ញវត្ថុ ដោយបានជួបជុំគ្នាក្នុងកម្មវិធីហិរញ្ញវត្ថុសម្រាប់អាជីវកម្ម ដែលជាវេទិការពិភាក្សាប្រចាំសប្តាហ៏អំពីបញ្ហាហិរញ្ញវត្ថុ ចាប់ផ្តើមពីខែកញ្ញា ដល់ខែវិច្ឆិកា ឆ្នាំ២០២៣ ដើម្បីឱ្យធុរកិច្ចរៀនចំខ្លួនដើម្បីមានលទ្ធភាពទទួលបាន សេវាហិរញ្ញវត្ថុ និងផ្សាភ្ជាប់អាជីវកម្មរបស់ខ្លួនទៅកាន់បណ្តាញទំនាក់ទំនងសហគ្រិនភាព។

លោកបណ្ឌិត ឈៀង វណ្ណមុនិណ្ឌ នាយកប្រតិបត្តិសហគ្រិនខ្មែរ បានថ្លែងថា៖ «កម្មវិធីហិរញ្ញវត្ថុ សម្រាប់អាជីវកម្ម ជាផ្នែកមួយនៃចក្ខុវិស័យរួមរបស់សហគ្រិនខ្មែរ ក្នុងការលើកកម្ពស់សហគ្រិនភាព នៅក្នុងព្រះរាជាណាចក្រកម្ពុជា និងផ្តល់វេទិកាដើម្បីកសាងបរិយាកាសសហគ្រិនភាពឱ្យមានភាពលូតលាស់ ដោយផ្សារភ្ជាប់ធុរកិច្ចក្នុងស្រុក ជាមួយអ្នកជំនាញផ្នែកហិរញ្ញវត្ថុ និងភាគីពាក់ព័ន្ធក្នុងប្រព័ន្ធអេកូឡូស៊ី ដើម្បីលទ្ធភាពទទួលបានហិរញ្ញវត្ថុ និងឱកាសផ្សាភ្ជាប់បណ្តាញទំនាក់ទំនងផ្សេងៗទៀត។»

លោកបានបន្តថា កម្មវិធីនេះមានគោលបំណងផ្តល់នូវវេទិកាមួយសម្រាប់ធុរកិច្ចក្នុងការរៀបចំអាជីវកម្មដើម្បីត្រៀមខ្លួនក្នុងការទទួលសេវាហិរញ្ញវត្ថុ ក៏ដូចជាធ្វើការសម្រេចចិត្តទទួលយកហិរញ្ញប្បទាននានា ដែលអាចជួយឱ្យធុរកិច្ច រីកដុះដាល និងជោគជ័យ ក្នុងខណៈពេលដែលស្ថាប័នហិរញ្ញវត្ថុអាចយល់កាន់តែច្បាស់អំពីតម្រូវការរបស់ធុរកិច្ច និងធ្វើការកែច្នៃលើផលិតផលរបស់ស្ថាប័នដែលឆ្លើយតបតាមតម្រូវការទីផ្សារ។

ជាមួយគ្នានេះដែរ លោកស្រី ម៉ារ អមរា អនុប្រធាននាយកប្រតិបត្តិជាន់ខ្ពស់ និងជាគណៈប្រធាននាយិកាប្រតិបត្តិហិរញ្ញវត្ថុ និងគណៈប្រធាននាយិកាប្រតិបត្តិប្រតិបត្តិការនៃធនាគារអេស៊ីលីដាភីអិលស៊ី បានសង្កត់ធ្ងន់ពី៖ «សារៈសំខាន់របស់ កម្មវិធីហិរញ្ញវត្ថុសម្រាប់អាជីវកម្មបានចូលរួមរជំរុញសកម្មភាពសហគ្រិនភាព និង ការអភិវឌ្ឍន៍។ ធនាគារ ក៏បានរួមចំនែកក្នុងប្រព័ន្ធអេកូឡូស៊ីនេះដោយការផ្តល់ប្រាក់កម្ចីដែលបានរៀបចំតាមតម្រូវការរៀងៗខ្លួនរបស់សហគ្រាសធុនតូច និងមធ្យម ដើម្បីសម្រួលដល់ការពង្រីកអាជីវកម្ម និងការវិនិយោគ។ ដែលគោលដៅសំខាន់ គឺដើម្បីបង្កើតប្រាក់ចំណូល បង្កើតឱកាសការងារកាត់បន្ថយភាពក្រីក្រ និងជំរុញការអភិវឌ្ឍន៍សេដ្ឋកិច្ច ប្រកបដោយចីរភាព»។

លោកស្រីបានថ្លែងថា ហិរញ្ញវត្ថុគឺជាបញ្ហាប្រឈមមួយសម្រាប់ធុរកិច្ចជាច្រើនដែលទើបនឹងចាប់ផ្តើម ឬនៅពេលមានវិបត្ដិជាសកល ដូចជាផលប៉ះពាល់នៃជំងឺរាតត្បាតកូវីដ១៩ ជាដើម។ យោងតាមរបាយការណ៍របស់ធនាគារពិភពលោក កម្ពុជាកំពុងស្ថិតនៅលើផ្លូវឆ្ពោះទៅរកការស្តារឡើងវិញនៃសេដ្ឋកិច្ច។ របាយការណ៍នេះបានព្យាករណ៍ពីសន្ទុះនៃកំណើនផ្នែកសេដ្ឋកិច្ចដល់ទៅ ៥.៥% ក្នុងឆ្នាំ២០២៣។ ដោយឡែកកាលពីខែតុលាកន្លងទៅ ក្រសួងសេដ្ឋកិច្ច និងហិរញ្ញវត្ថុ បានពោលថា ក្នុងឆ្នាំ២០២៤ ខាងមុខ សេដ្ឋកិច្ចកម្ពុជានឹងកើនបាន ៦.៦% យោងតាមការគ្រោងទុក។

លោកស្រីបានបន្តថា សហគ្រាសធុនតូច និងមធ្យមមានតួនាទីសំខាន់ក្នុងការជួយដល់ភាពជោគជ័យក្នុងវិស័យសេដ្ឋកិច្ចកម្ពុជា នាពេលអនាគត ដោយបច្ចុប្បន្ន ៩៨% នៃធុរកិច្ចសរុបនៅក្នុងប្រទេសកម្ពុជាគឺជា សហគ្រាសធុនតូចនិងមធ្យម ដែលរួមចំណែក ៥៨% នៃផលិតផលដុលក្នុងស្រុករបស់ប្រទេសទាំងមូល ដូច្នេះ កម្មវិធីហិរញ្ញវត្ថុ សម្រាប់អាជីវកម្មបានបង្កើតឡើង ដោយមានការរួមបញ្ចូលវគ្គពិភាក្សាដែលប្រមូលផ្តុំធុរកិច្ច និងស្ថាប័នហិរញ្ញវត្ថុ ឱ្យស្វែងយល់ពីតម្រូវការរបស់គ្នាទៅវិញទៅមក និងជាឱកាសធ្វើការរួមគ្នាដើម្បីសម្រេចបាននូវភាពរួចរាល់ផ្នែកហិរញ្ញវត្ថុរបស់ធុរកិច្ច ដើម្បីប្រកួតប្រជែងជាមួយទីផ្សារក្នុងស្រុក ក៏ដូចជាឆាកអន្តរជាតិ។

សូមជម្រាបថា ដោយសង្កេតឃើញថាលទ្ធភាពទទួលបានហិរញ្ញវត្ថុ គឺជាឧបសគ្គចម្បងមួយសម្រាប់សហគ្រាសធុនតូច និងមធ្យម សហគ្រិនខ្មែរ បានប្រើប្រាស់កិច្ចពិភាក្សាជាបន្តបន្ទាប់ប្រចាំសប្តាហ៏នេះ ក្នុងការធ្វើបទបង្ហាញពី ផលិតផល និងសេវាកម្មហិរញ្ញវត្ថុនានាពីវាគ្មិនកិត្តិយសតាមបណ្តាស្ថាប័នហិរញ្ញវត្ថុក្នុងប្រទេសកម្ពុជា។ របៀបវីរៈបន្ទាប់មានរួមបញ្ចូលវគ្គសំណួរចម្លើយ ដែលមានការចូលរួមយ៉ាងផុសផុលពីភាគីពាក់ព័ន្ធក្នុងការដោះស្រាយនូវបញ្ហាប្រឈមផ្នែកហិរញ្ញវត្ថុរបស់សហគ្រាសធុនតូច និងមធ្យម៕