(កំពង់ធំ)៖ នាថ្ងៃព្រហស្បតិ៍ ទី១៤ ខែធ្នូ ឆ្នាំ២០២៣ ជាតំណាងលោក ថោ ជេដ្ឋា រដ្ឋមន្រី្ត ក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប, លោក ហ៊ែល តូនី អនុប្រធានទទួលបន្ទុកក្តាប់រួម អាជ្ញាធរទន្លេសាប និងជាប្រធានក្រុមការងារទទួលបន្ទុកក្តាប់រួម ចុះត្រួតពិនិត្យ និងធ្វើអធិការកិច្ចដែនព្រៃលិចទឹក និងព្រៃលិចទឹក និងលោក ទូច សុខាអភិបាលរងខេត្តកំពង់ធំ បានដឹកនាំប្រតិភូចូលរួមកិច្ចប្រជុំពិភាក្សាលើការ ពិនិត្យ ផ្ទៀងផ្ទាត់ តាមដាន និងអធិការកិច្ចដែនព្រៃលិចទឹក និងព្រៃលិចទឹកនៅតំបន់ជុំវិញបឹងទន្លេសាប ស្ថិតក្នុងភូមិសាស្រ្ត ខេត្តកំពង់ធំ។
កិច្ចប្រជុំនេះដែរ មានការអញ្ជើញចូលរួមពីមន្ត្រីបច្ចេកទេសក្រុមការងារតាមដាន និងអធិការកិច្ចដែនព្រៃលិចទឹក នៃអាជ្ញាធរទន្លេសាប ថ្នាក់ដឹកនាំ និងមន្រ្តីបច្ចេកទេសតំណាងពីក្រសួងស្ថាប័នថ្នាក់ជាតិ រួមមានក្រសួងរៀបចំដែនដី នគរូបនីយកម្ម និងសំណង់, ក្រសួងមហាផ្ទៃ, ក្រសួងបរិស្ថាន, ក្រសួងកសិកម្ម រុក្ខាប្រម៉ាញ់ និងនេសាទ, ក្រសួងអភិវឌ្ឍន៍ជនបទ, ក្រសួងសាធារណការ និងដឹកជញ្ជូន និងមន្រ្តីបច្ចេកទេសសាលាខេត្តកំពង់ធំ ថ្នាក់ដឹកនាំមន្ទីរជំនាញពាក់ព័ន្ធជុំវិញសាលាខេត្តកំពង់ធំ ព្រមទាំងអាជ្ញាធរដែនដីរដ្ឋបាលថ្នាក់មូលដ្ឋានពាក់ព័ន្ធ នៃស្រុក ឃុំ ភូមិពាក់ព័ន្ធ ក្នុងខេត្តកំពង់ធំ ចំនួន ៧៣រូប។
កិច្ចប្រជុំបានពិភាក្សាលើចំណុចមួយចំនួនដូចខាងក្រោម៖
ទី១៖ លទ្ធផលសិក្សាស្រាវជ្រាវ របស់ក្រុមការងារបច្ចេកទេស អាជ្ញាធរទន្លេសាប
ទី២៖ ពិភាក្សាលើបញ្ហាពាក់ព័ន្ធ (តំបន់ ១ តំបន់ ២ និងតំបន់ ៣)
ទី៣៖ ចែករំលែក និងផ្លាស់ប្តូរព័ត៌មាន ទិន្នន័យ តំបន់ ១ តំបន់ ២ និងតំបន់ ៣ ក្នុងខេត្តកំពង់ធំ
ទី៤៖ កិច្ចសហការពីថ្នាក់ដឹកនាំខេត្ត មន្ទីរជំនាញពាក់ព័ន្ធ អាជ្ញាធរដែនដីមូលដ្ឋានពាក់ព័ន្ធក្នុងខេត្តកំពង់ធំ ក្នុងការចូលរួមការពារ ថែរក្សាធនធានធម្មជាតិ និងបរិស្ថាន តំបន់ ១ តំបន់ ២ និងតំបន់ ៣
ទី៥៖ ការដាក់ផែនការ/កម្មវិធីចុះអនុវត្តការងារតាមតំបន់ជាក់ស្តែង ក្នុងខេត្តកំពង់ធំ។
បន្ទាប់ពីបានពិភាក្សា ផ្លាស់ប្តូរមតិយោបល់ប្រកបដោយការទទួល ខុសត្រូវខ្ពស់រួចមក កិច្ចប្រជុំបានឯកភាពគ្នាដូចខាងក្រោម៖
ទី១៖ អង្គប្រជុំ បានយល់ស្រប បន្តកិច្ចសហការ រវាងថ្នាក់ខេត្ត មន្ទីរ និងក្រសួង ស្ថាប័នពាក់ព័ន្ធ ដើម្បីចុះធ្វេីការពិនិត្យផ្ទៀងផ្ទាត់តាមដាន និងអធិការកិច្ចដែនព្រៃលិចទឹក និងព្រៃលិចទឹក
ទី២៖ ផ្ទៀងផ្ទាត់ចំណុចលម្អៀង នៃទិន្នន័យ របស់អាជ្ញាធរទន្លេសាប និងមន្ទីររៀបចំដែនដី នគរូបនីយកម្ម និងសំណង់ខេត្តកំពង់ធំ
ទី៣៖ ឯកភាពប្រើប្រាស់ទិន្នន័យផែនទី របស់ក្រសួងរៀបចំដែនដី នគរូបនីយកម្ម និងសំណង់ជាគោល។ រាល់ទិន្នន័យដែលពាក់ព័ន្ធ គឺអាចស្នើសុំមកក្រសួងរៀបចំដែនដី នគរូបនីយកម្ម និងសំណង់ ប្រសិនបើមានតម្រូវការចាំបាច់
ទី៤៖ ឯកភាពចែករំលែកទិន្នន័យ-ព័ត៌មានរួម និងបច្ចេកទេស រវាងស្ថាប័នពាក់ព័ន្ធ
ទី៥៖ ការដាក់ផែនការ/កម្មវិធីចុះអនុវត្តការងារតាមតំបន់ជាក់ស្តែង ក្នុងខេត្តកំពង់ធំ
ទី៦៖ អនុវត្តតាមស្មារតីខ្លឹមសារ អនុក្រឹត្យលេខ ១៩៧។
បន្ទាប់ពីបញ្ចប់កិច្ចប្រជុំ អនុប្រធានក្តាប់រួម បានដឹកនាំក្រុមការងារចុះទៅទីតាំងកាត់ឆ្វៀលផ្ទាល់ក្នុងភូមិសាស្រ្ត ភូមិរកា និងភូមិចំបក់ សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
សូមបញ្ជាក់ថា អាជ្ញាធរទន្លេសាប បានចេញសេចក្ដីសម្រេចលេខ ២៣៦ អទស នៅថ្ងៃទី០២ ខែតុលា ឆ្នាំ២០២៣ ស្តីពីការបង្កើតក្រុមការងារចុះតាមដានពិនិត្យ និងធ្វើអធិការកិច្ចដែនព្រៃលិចទឹក និងព្រៃលិចទឹក ស្ថិតក្នុងខេត្តទាំង ៦ ជុំវិញបឹងទន្លេសាប (ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ)៕
