(សៀមរាប)៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅរសៀលថ្ងៃទី២២ ខែសីហា ឆ្នាំ២០១៦នេះ បានចាត់ឱ្យលោកស្រី មាស សន អនុប្រធានគណៈកម្មាធិការ សាខាកាកបាទក្រហមកម្ពុជា ខេត្តសៀមរាប ចូលរួមបុណ្យសព និងនាំយកថវិកា គ្រឿងឧបភោគ-បរិភោគមួយចំនួន ជូនដល់ក្រុមគ្រួសារសព របស់កុមារទាំង៣នាក់បងប្អូន ដែលបានស្លាប់ដោយសារ លង់ទឹក នៅភូមិសសរស្តម្ភ ឃុំសសរស្តម្ភ ស្រុកពួក ខេត្តសៀមរាប កាលពីម្សិលមិញ។

ក្នុងនាមសម្ដេចកិត្តិព្រឹទ្ធបណ្ឌិត លោកស្រី មាស​ សន បានសម្ដែងនូវការសោកស្ដាយ និងរំលែកទុក្ខជាមួយក្រុមគ្រួសារសព ចំពោះការបាត់បង់កូនៗ ជាទីស្រឡាញ់ និងបានជូននូវថវិកា៥លានរៀល, អង្ករ១០០គីឡូក្រាម, មី៤កេស, ទឹកក្រូច៤កេស និង​ទឹកបរិសុទ្ធ១០យួរ ដល់ក្រុមគ្រួសារសព សម្រាប់ប្រើប្រាស់។

សូមជម្រាបថា ហេតុការណ៍ដ៏គួរឱ្យសង្វេគនេះ បានកើតឡើងនៅល្ងាចថ្ងៃទី២១ ខែសីហា ឆ្នាំ២០១៦ ត្រង់ចំណុចប្រឡាយទំនប់ចាល់ ស្ថិតក្នុងទឹកដីភូមិប្រដាក់ ឃុំព្រៃជ្រូក ស្រុកពួក ខេត្តសៀមរាប ដែលបណ្តាលឱ្យក្មេងប្រុសស្រីចំនួន៥នាក់ (ក្នុងនោះ៤នាក់ជាបងប្អូនបង្កើត) បានលង់ទឹកជម្រៅ ៤.៥ម៉ែត្រ បង្កឱ្យមានការភ្ញាក់ផ្អើល និងតក់ស្លុតដល់ប្រជាពលរដ្ឋ និងឪពុកម្ដាយក្មេងរងគ្រោះ ក្នុងនោះបណ្ដាលឱ្យក្មេងចំនួន៣នាក់ បានស្លាប់នៅហ្នឹងកន្លែងកើតហេតុ ខណៈក្មេង២នាក់ទៀត ត្រូវបានជួយសង្គ្រោះភ្លាមៗផងដែរ៕⁠⁠⁠⁠