(ភ្នំពេញ)៖ លោក តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រីទទួលលើការកិច្ចការបរទេស បាន​ទទូចដល់ប្រជាពលរដ្ឋខ្មែរគ្រប់រូប ត្រូវប្រកាន់គោលការណ៍ «ខួរក្បាលធំជាងអណ្តាត» ដើម្បីខ្មែរ​អាចទាញ​បាន​ប្រយោជន៍ពីទំនាក់ទំនងអន្តរជាតិ។

សំណើរបស់លោក ហ្សង់ហ្វ្រង់ស័រ ជាការប្រតិកម្មតបទៅនឹងក្រុមអ្នកវិភាគក្រៅប្រទេស ដែលបានលើក​ឡើងថា ដំណើរទស្សនកិច្ចរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាទៅកាន់ប្រទេស​វៀត​ណាម ជាការស្អំចិត្តស្អំបេះដូងវៀតណាម បន្ទាប់ពីមានទំនាក់ទំនងជិតស្និទ្ធខ្លាំងជាមួយប្រទេសចិន។

លោក ហ្សង់ហ្វ្រង់ស័រ បានលើកឡើងថា លោកមិនទោមនស្សទេ នឹងការប្រើប្រាស់ពាក្យ «ស្អំបេះ​ដូង» នោះទេ។ សម្រាប់រដ្ឋមន្ត្រីប្រតិភូអមនាយករដ្ឋមន្ត្រី ដែលជាអ្នកជំនាញលើកិច្ចការភូមិសាស្ត្រមួយរូប យល់ឃើញថា នយោបាយ «ស្អំបេះដូង» ជានយោបាយការទូតមួយដ៏ទន់ភ្លន់។

លោកបានគូសបញ្ជាក់ដូច្នេះ «នៅក្នុងសម័យកាលបច្ចុប្បន្ន នៅក្នុងបរិបថភូមិសាស្ត្រនយោបាយបច្ចុប្បន្ន នយោបាយការទូតទន់ភ្លន់ ក្នុងន័យពង្រីកមិត្តភាពទៅគ្រប់ទីកន្លែងនៅក្នុងតំបន់ និងពិភពលោក ពង្រឹង​មិត្ត​ភាពចាស់ ពង្រីកមិត្តភាពថ្មី គឺជាយន្តការដែលនឹងហុចមកវិញក្នុងរយៈពេលខ្លី មធ្យម ឬវែងនូវផល​ប្រយោ​ជ​ន៍​​សម្រាប់ជាតិកម្ពុជា»។

ភ្ជាប់នឹងឆ្លើយតបចំពោះការពាក្យស្អំបេះដូងរបស់ក្រុមអ្នកវិភាគនេះ លោក ហ្សង់ហ្វ្រង់ស័រ ក៏បានឆ្លៀតផ្ញើ​សារទៅកាន់ក្រុមអ្នកវិភាគ ក៏ដូចជាប្រជាពលរដ្ឋទូទៅផងដែរឱ្យរួមគ្នាប្រកាន់យកនូវគោលការណ៍ «ខួរធំ​ជាងអណ្តាត» ដែលស្មើនឹងថា «គិតឱ្យច្រើនជាងនិយាយ» ដើម្បីកម្ពុជាអាចទាក់ទាញបានអត្ថ​ប្រយោជន៍​ពីទំនាក់ទំនងអន្តរជាតិ។

លោក ហ្សង់ហ្វ្រង់ស័រ បានថ្លែងទទូចបែបនេះ «បើយើងចង់ឃើញកម្ពុជាទាញយកប្រយោជន៍​បាន​ពី​ទំនាក់​ទំនងអន្តរជាតិ រវាងបណ្តាប្រទេសជិតខាងរបស់កម្ពុជា រវាងបណ្តាប្រទេសក្នុងតំបន់ នៅលើឆាក​តំបន់ ឬលើឆាកអន្តរជាតិ ម្នាក់ៗទាំងអ្នកចេះដឹង ទាំងសាមញ្ញជនធម្មតា ពលរដ្ឋខ្មែរធម្មតា គួរតែប្រកាន់​គោលការណ៍​មួយ នោះគឺធ្វើយ៉ាងណា [គួរតែមានខួរក្បាលធំជាងអណ្តាត] ពីព្រោះនៅឆាកតំបន់ ឆាក​នយោ​បាយអន្តរជាតិ យើងមិនអាចនិយាយប៉ាតណាប៉ាតណីទេ ពីព្រោះវាអាចប៉ះពាល់ដល់​ប្រយោជន៍​របស់ជាតិ ប៉ះពាល់ដល់រឿងសម្ងាត់របស់ជាតិ ដល់រឿងសន្តិសុខរបស់ជាតិ»៕

http://image.freshnewsasia.com/2021/id-022/fn-2023-12-13-08-08-46-0.jp