(ភ្នំពេញ)៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានបញ្ជាឲ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដាក់បញ្ជូលខណ្ឌរដ្ឋបាលព្រៃឈើ និងខណ្ឌរដ្ឋបាលជលផល ឲ្យចំណុះក្រោមមន្ទីរកសិកម្ម រុក្ខាប្រមាញ់ និងនេសាទ ដើម្បីងាយស្រួលក្នុងការគ្រប់គ្រង និងអនុវត្តន៍ការងារ។  

ការបញ្ជារបស់សម្តេចតេជោ នាយករដ្ឋមន្ត្រីយ៉ាងដូច្នេះ ធ្វើឡើងក្នុងឱកាសដែលសម្តេចតេជោ អញ្ជើញជាអធិបតីភាព ក្នុងវេទិកាស្តីពីការការពារ និងអភិរក្សធនធានធម្មជាតិ នៅវិមានសន្តិភាព តាំងពីព្រឹកម៉ោង ៧៖៣០នាទី ដល់ម៉ោង ១៖០៥នាទី រសៀលថ្ងៃទី២២ ខែសីហា ឆ្នាំ២០១៦នេះ។

សម្តេចតេជោ ហ៊ុន សែន បានថ្លែងថា នៅរយៈពេលថ្មីៗកន្លងមកនេះ សម្តេចបានទទួលសំណើ សុំធ្វើនិសោធកម្មច្បាប់ ស្តីពីរដ្ឋបាលព្រៃឈើ និងច្បាប់ស្តីពីរដ្ឋបាលជលផល ដែលចង់ដំឡើងខណ្ឌរដ្ឋបាលព្រៃឈើ និងខណ្ឌរដ្ឋបាលជលផល ទៅជាមន្ទីរជំនាញវិញ ដែលការស្នើនេះ សម្តេចតេជោ ហ៊ុន សែន មិនយល់ព្រមនោះឡើយ ដោយចារត្រឡប់ទៅវិញថា មិនអាចធ្វើបាននោះទេ។

សម្តេចតេជោ ហ៊ុន សែន បានចាត់ទុកថា ក្រសួងកសិកម្ម រុក្ខាប្រមាញ់ និងនេសាទ ជាក្រសួងខុសគេ ខុសឯង ជាមូលហេតុដែលការពារព្រៃឈើ និងត្រីមិនបាន ព្រោះក្រសួងគេនានា មានឈ្មោះក្រសួងបែបណា មានមន្ទីរដូច្នេះដែរ ប៉ុន្តែក្រសួងកសិកម្មរុក្ខាប្រមាញ់ និងនេសាទវិញ នៅថ្នាក់ខេត្តមានមន្ទីរកសិកម្ម ខណ្ឌរដ្ឋបាលជលផល និងខណ្ឌរដ្ឋបាលព្រៃឈើ ដែលមិនដឹងអ្នកណា ស្តាប់អ្នកណានោះទេ គឺក្លាយជាស្តេចក្រាញ់រៀងៗខ្លួនតែម្តង។

សម្តេចតេជោ ហ៊ុន សែន បានថ្លែងសង្កត់ធ្ងន់ថា «នៅពេលខាងមុខនេះ យើងត្រូវបែបចែកមុខងារ ទៅឲ្យរដ្ឋបាលថ្នាក់ក្រោមជាតិ ទទួលខុសត្រូវ ដោយត្រូវច្របាច់រដ្ឋបាលព្រៃឈើ និងរដ្ឋបាលជលផល ទៅក្នុងមន្ទីរកសិកម្ម រុក្ខាប្រមាញ់ និងនេសាទ មិនអាចក្បាលមួយ កន្ទុយ៣ទៀតនោះទេ។ ចាត់ទុកថា ខ្ញុំខុសទៅចុះព្រោះខ្ញុំល្ងង់ពេក ថារកអស់លោកអ្នកពូកែយកមកជួយ អស់លោកធ្វើសំណើរៀបចំច្បាប់ ខ្ញុំក៏ចេះតែព្រមទៅ តែខ្ញុំបានសិក្សារួចរាល់ហើយ មិនអនុញ្ញាតទេ»។

សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ទៀតថា បន្ទាប់ពីបញ្ចូលខណ្ឌរដ្ឋព្រៃឈើ និងរដ្ឋបាលជលផល ក្នុងមន្ទីរកសិកម្ម រុក្ខាប្រមាញ់និងនេសាទ ដែលស្ថិតនៅក្រោមការ គ្រប់គ្រប់របស់ថ្នាក់ក្រោមជាតិហើយ ត្រូវដឹកថាប្រធានមន្ទីរកសិកម្ម រុក្ខាប្រមាញ់ និងនេសាទ មិនមានសិទ្ធិបញ្ជាកម្លាំងប្រដាប់អាវុធទេ មានតែភិបាលខេត្ត ដែលជាប្រធានគណៈបញ្ជាការឯកភាព គឺមានសិទ្ធិដឹកនាំកម្លាំងយោធា នគរបាល អាវុធហត្ថ ដែលធ្វើបែបនេះ អភិបាលខេត្តជាអ្នកទទួលខុសត្រូវ ចំពោះមុខនាយករដ្ឋមន្ត្រី ។ ចំណែកក្រសួងកសិកម្ម ជាអ្នករៀបចំក្របខណ្ឌគោលនយោបាយ ដាក់ឲ្យអនុវត្តន៍ ដែលធ្វើយ៉ាងដូច្នេះវាមានប្រសិទ្ធភាពជាង៕

សូមស្តាប់ប្រសាសន៍សម្តេចតេជោ ហ៊ុន សែន៖