(ភ្នំពេញ)៖ លោកស្រី ឃួន សុដារី សមាជិកអចិន្ត្រៃយ៍គណៈកម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងារថ្នាក់ កណ្តាលចុះជួយស្រុកលើកដែក នៅព្រឹកថ្ងៃទី២២ ខែសីហា ឆ្នាំ២០១៦នេះ បាននាំប្រជាពលរដ្ឋ នៅស្រុកលើកដែក ៦០នាក់ មកវះកាត់ និងព្យាបាលជំងឺភ្នែកដោយឥតគិតថ្លៃ នៅមន្ទីរពេទ្យមិត្តភាពខ្មែរ-សូវៀត។
ក្នុងពេលដឹកនាំប្រជាពលរដ្ឋ ទៅព្យាបាលជំងឺភ្នែកនោះ លោកស្រី ឃួន សុដារី បានថ្លែងថា រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខតែងតែគិតគូរជានិច្ច អំពីសុខទុក្ខ របស់ប្រជាពលរដ្ឋ។ លោកស្រី បានជូនពរប្រជាពលរដ្ឋ ដែលទទួលការព្យាបាល ជំងឺភ្នែកនេះ បានឆាប់ជាសះស្បើយ និងមានសុខភាពល្អគ្រប់ៗគ្នា។
លោកសាស្ត្រាចារ្យ ងឺ ម៉េង នាយកមន្ទីរពេទ្យមិត្តភាពខ្មែរ-សូវៀត បានប្រាប់ថា ថ្នាក់ដឹកនាំនិងគ្រួពេទ្យក្នុងមន្ទីរពេទ្យ បានខិតខំសហការជាមួយ ក្រុមគ្រូពេទ្យជំនាញ ជំងឺភ្នែកប្រទេសអូស្រ្តាលី នៃសហគមន៍គាំពារភ្នែក កម្ពុជាអន្តរជាតិនេះ គ្រប់ការងារនៅក្នុងដំណើរការវះកាត់ និងព្យាបាលជំងឺភ្នែកជូនប្រជាពលរដ្ឋ ដោយឥតគិតថ្លៃគ្រប់បណ្តាខេត្ត ទូទាំងប្រទេស។
ប្រជាពលរដ្ឋអ្នកជំងឺភ្នែកមកពី ស្រុកលើកដែកទាំងអស់ ដែលមកទទួលការវះកាត់នៅមន្ទីរពេទ្យមិត្តភាពខ្មែរ-សូវៀត នារាជធានីភ្នំពេញ បានទទួលការឧបត្ថម្ភទាំងការធ្វើដំណើរទៅមក ការហូបចុក និងស្នាក់នៅយ៉ាងកក់ក្តៅពី សំណាក់លោកស្រី ឃួន សុដារី និងមន្ត្រីក្រុមការងារស្រុកលើកដែក៕
