(ភ្នំពេញ)៖ មន្រ្តីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ និងប្រធានឧទ្យានសួនសត្វព្រៃការពារភ្នំតាម៉ៅ បានពន្យល់ថា ការឈូសឆាយផ្លូវភ្លើង នៅឧទ្យានសួនសត្វព្រៃភ្នំតាម៉ៅ គឺដើម្បីការពារភ្លើងឆេះរីករាលព្រៃក្នុងទំហំធំ និងផ្តល់ភាពងាយស្រួល ដល់ការធ្វើដំណើររបស់ប្រជាពលរដ្ឋក្នុងតំបន់ ពោលគោលដៅ គឺដើម្បីនិរន្តភាពនៃការពារសត្វ និងព្រៃឈើនៅក្នុងសួនឧស្យានភ្នំតាម៉ៅ មិនមែនក្នុងបំណងផលប្រយោជន៍អ្នកណាម្នាក់ឡើយ។
ការពន្យល់របស់មន្រ្តីជាន់ខ្ពស់នៃក្រសួងកសិកម្ម និងប្រធានឧទ្យានសួនសត្វព្រៃភ្នំតាម៉ៅ ឆ្លើយតបទៅនឹងការចុះផ្សាយ របស់សារព័ត៌មានមួយដែលផ្សាយពីក្រៅប្រទេស និង អង្គការ Wild Life Alliance ដែលបានលើកឡើងថា អាជ្ញាធរបាន និងកំពុងឈូសឆាយដីព្រៃ នៅភ្នំតាម៉ៅបន្ថែមទៀត ដើម្បីផលប្រយោជន៍ឯកជន ដែលពួកគេបារម្ភថា អាចនឹងបណ្តាលឱ្យបាត់បង់ធនធានធម្មជាតិ និងសត្វព្រៃនៅភ្នំតាម៉ៅបន្ថែមទៀត។
កញ្ញា អ៉ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានប្រាប់អ្នកសារព័ត៌មាន នៅថ្ងៃទី១១ ខែធ្នូ ឆ្នាំ២០២៣នេះ ថា ផ្លូវដែលអាជ្ញាធរបានឈូសឆាយនេះ គឺស្ថិតនៅលើព្រំប្រទល់រវាងសួនឧទ្យានអភិរក្ស និងដីឯកជន មិនមែនស្ថិតនៅក្នុងដីអភិរក្សនោះទេ។
កញ្ញាពន្យល់យ៉ាងដូច្នេះថា ការឈូសឆាយផ្លួវនេះ គឺដើម្បីបង្ការភ្លើងឆេះព្រៃ ដែលធ្លាប់កើតមានជាញឹកញាប់ជារៀងឆ្នាំកន្លងមក ហើយការឈូសឆាយនេះទៀតសោត មិនត្រឹមតែអាចបង្ការភ្លើងឆេះព្រៃបាននោះទេ វាក៏ផ្តល់នូវមធ្យោបាយមួយទៀតដល់បងប្អូន ប្រជាពលរដ្ឋដែលរស់នៅក្នុងតំបន់នេះបានធ្វើដំណើរឆ្លងកាត់បានសមរម្យ និងងាយស្រួល។
កញ្ញាលើកឡើងថា មិនយល់ហេតុអ្វីបានជាអង្គការ Wild Life Alliance ផ្តល់បទសម្ភាសន៍ចោទប្រកាន់រាជរដ្ឋាភិបាល ក្រសួងកសិកម្ម និង អាជ្ញាធរ ថាបានឈូសឆាយដីនេះ ដើម្បីផលប្រយោជន៍ផ្ទាល់ខ្លួន ឬអភិវឌ្ឍន៍គម្រោងណាមួយ ដែលរំលោភបំពាន និងបំភ្លេចបំផ្លាញធនធានធម្មជាតិ ដែលរាជរដ្ឋាភិបាលបាននិងកំពុងខិតខំប្រឹងប្រែងការពារ។ ការលើកឡើងនេះ ក្រសួងសូមច្រានចោលទាំងស្រុង។
កញ្ញាបញ្ជាក់បន្ថែមថា «អ្វីដែលយើងធ្វើ គឺដើម្បីការពារធនធានធម្មជាតិរបស់យើង ដើម្បីផ្តល់ភាពងាយស្រួលដល់បងប្អូនប្រជាជនរបស់យើងដែលរស់នៅក្នុងតំបន់នេះ អ៊ីចឹងយើងអត់មានធ្វើអីខុសទេ ហើយអ្វីដែលយើងធ្វើគឺដើម្បីបម្រើផលប្រយោជន៍ជាតិ និងប្រជាជន។ ដូច្នេះហើយយើងនឹងនៅតែបន្តធ្វើទៀត»។
លោក ញ៉ឹក រតនៈពេជ្រ ប្រធានឧទ្យានសួនសត្វព្រៃការពារ និងសួនភូតគាមភ្នំតាម៉ៅ បានពន្យល់ផងដែរថា ឧទ្យានសួនសត្វព្រៃការពារ និងសួនភូតគាម ភ្នំតាម៉ៅ ដែលព្រះមហាក្សត្របានចេញព្រះរាជក្រិត្យដាក់ជាព្រៃការពារ មានចំនួន២ពាន់២៥ហិកតា ដែលមានប្រវែងជាង២០គីឡូម៉ែត្រ ដោយមានផ្លូវភ្លើងព័ទ្ធជុំវិញទាំងអស់ ហើយផ្លូវភ្លើងទាំងនោះមានទាំងថ្មី និងចាស់។
លោកបញ្ជាក់ថា កន្លែងឈូសឆាយនេះ គឺនៅលើផ្លូវភ្លើងចាស់ ដោយអាជ្ញាធរបានឈូសឆាយសម្អាត ដើម្បីឱ្យប្រជាពលរដ្ឋងាយស្រួលធ្វើដំណើរ និងការពារធ្វើឆេះព្រៃចូលទៅក្នុងសួនឧទ្យាន សម្លាប់សត្វ។
លោកបានឱ្យដឹងបន្តថា ជារៀងរាល់ឆ្នាំនៅភ្នំតាម៉ៅតែតែងមានភ្លើងឆេះព្រៃ។ ជាក់ស្តែងកាលពីឆ្នាំ២០១៨ ឆេះអស់ប្រមាណ៣០ហិកតា ហើយឆ្នាំខ្លះ ភ្លើងបានឆេះរាលដាលដល់កំពូលភ្នំ ប្រសិនបើមិនមានវិធានការទេនោះ ការឆេះព្រៃពីមួយឆ្នាំទៅមួយឆ្នាំនឹងកាន់តែធំឡើងៗ។ លោកថា ការឈូសឆាយផ្លូវនេះ មិនបានប៉ះពាល់ធនធានព្រៃឈើ ឬសត្វនោះទេ ព្រោះជាផ្លូវចាស់។
លោកលើកឡើងទៀតថា «ឥលូវនេះសួនរបស់យើងកំពុងសាងសង់របងព័ន្ធជុំវិញអស់ហើយ អ៊ីចឹងយើងមានការព្រួយបារម្ភថា ពេលដែលយើងសង់របងរួចអស់ហើយ សត្វយើងរស់នៅក្នុងហ្នឹង កាលណាបើយើងគ្មានផ្លូវភ្លើងព្រៃការពារទេ ខ្លាចរាលដាលពីភូមិ ពីដីជាប់ខាងរបស់យើង អ៊ីចឹងសត្វរបស់យើងអត់មានកន្លែងរត់រួចទេ រងចាំងាប់មួយមុខគត់។អ៊ីចឹងបានជាសួនសត្វយើងនៅឆ្នាំនេះ មានការព្រួយបារម្ភខ្លាំង»។
បើតាមលោក រតនៈពេជ្រ ភ្លើងឆេះព្រៃគឺបណ្តាលមកពីកត្តាច្រើន ប៉ុន្តែសម្រាប់នៅក្នុងតំបន់ភ្នំតាម៉ៅ ភ្លើងឆេះព្រៃភាគច្រើនបណ្តាលមកពីក្មេងដែលប្រើប្រាស់ថ្នាំញៀន និងជក់បារី លួចដុត៕
