(ភ្នំពេញ)៖ លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានដឹកនាំកិច្ចប្រជុំពិនិត្យវឌ្ឍនភាពការងារអនុវត្តគម្រោងពង្រឹងគុណភាពបណ្តុះបណ្តាលមុនពេលបម្រើការងារសម្រាប់មន្រ្តីសុខាភិបាល។

កិច្ចប្រជុំនេះ មានការចូលរួមពីអនុប្រធាន និងសមាជិក សមាជិកា នៃគណៈកម្មាធិការដឹកនាំគម្រោងពង្រឹងគុណភាពបណ្តុះបណ្តាលមុនពេលបម្រើការងារសម្រាប់មន្រ្តីសុខាភិបាល កាលពីរថ្ងៃទី៨ ខែធ្នូ ឆ្នាំ២០២៣ នាទីស្តីការក្រសួង។

លោកសាស្រ្តាចារ្យរដ្ឋមន្រ្តី បានកោតសរសើរដល់ក្រុមការងារអនុវត្តគម្រោងពង្រឹងគុណភាពមុនពេលបម្រើការងារសម្រាប់មន្រ្តីសុខាភិបាល ដែលបានខិតខំអនុវត្តគម្រោង ប្រកបដោយភាពជោគជ័យ។

លោកសាស្រ្តាចារ្យរដ្ឋមន្រ្តីក៏បានផ្តល់អនុសាសន៍ណែនាំល្អៗ និងបានផ្តល់ការគាំទ្រ ក្រុមការងារអនុវត្តគម្រោង ព្រមទាំងបានលើកទឹកចិត្ត ឱ្យបន្តកិច្ចខិតខំប្រឹងប្រែងនេះ បន្ថែមទៀត ដើម្បីឈានទៅរកការសម្រេចបាន តាមគោលដៅដែលបានគ្រោងទុក។

សូមបញ្ជាក់ដែរថា ក្រសួងសុខាភិបាល បានចាប់ផ្តើមអនុវត្តគម្រោងពង្រឹងគុណភាពមុនពេលបម្រើការងារសម្រាប់មន្រ្តីសុខាភិបាល ចាប់តាំងពីខែកញ្ញា ឆ្នាំ២០២០ ដែលមានរយៈពេល ០៦ឆ្នាំ។ គម្រោងនេះ ឧបត្ថម្ភថវិកាគាំទ្រដោយធនាគារពិភពលោក (World Bank) និង Kreditanstalt für Wiederaufbau (KfW) មានគោលបំណង ធ្វើឱ្យប្រសើរឡើងគុណភាពបណ្តុះបណ្តាលមុនពេលបម្រើការងារសម្រាប់មន្រ្តីសុខាភិបាល៕