(ភ្នំពេញ)៖ កាលពីថ្ងៃទី០៨ ខែធ្នូ ឆ្នាំ២០២៣ លោក វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានបន្តដឹកនាំកិច្ចប្រជុំការងារផ្ទៃក្នុងជាមួយថ្នាក់ដឹកនាំ និងមន្រ្តីរាជការក្រោមឱវាទ ដើម្បីវាយតម្លៃលទ្ធផលការងារដែលសម្រេចបាននាពេលកន្លងមក និងដើម្បីបន្តផ្តល់នូវដំណោះស្រាយដ៏សមស្រប ចំពោះសំណូមពរ និងបញ្ហាប្រឈមផ្សេងៗ របស់ថ្នាក់ដឹកនាំ និងមន្រ្តីរាជការ ក្នុងការបំពេញការងារ ព្រមទាំងដើម្បីសម្រួច និងតម្រង់ទិសដៅអាទិភាពការងារ សំដៅពង្រឹង និងលើកកម្ពស់គុណភាព ប្រសិទ្ធភាព និងសមិទ្ធកម្មការងាររបស់ទីស្តីការគណៈរដ្ឋមន្រ្តីឱ្យកាន់តែល្អប្រសើរបន្ថែមទៀត ក្នុងនាមជាសេនាធិការមួយដ៏សំខាន់ របស់នាយករដ្ឋមន្រ្តី និងគណៈរដ្ឋមន្រ្តីទាំងមូល។
ឧបនាយករដ្ឋមន្រ្តីប្រចាំការ វង្សី វិស្សុត បានវាយតម្លៃខ្ពស់ ចំពោះការខិតខំប្រឹងប្រែងក្នុងការបំពេញការងាររបស់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់ តាមបណ្តានាយកដ្ឋាន និងអគ្គនាយកដ្ឋានទាំងអស់ ស្របតាមតួនាទី និងភារកិច្ចរបស់ខ្លួននាពេលកន្លងមក។
លោកបានគូសបញ្ជាក់ថា ជារួមបាននិងកំពុងស្ថិតក្នុងចលនការនៃដំណើរឆ្ពោះទៅរកគុណភាព និងប្រសិទ្ធភាពខ្ពស់ ស្របតាមស្មារតីកំណែទម្រង់ដើម្បីប្រសិទ្ធភាពការងាររបស់រាជរដ្ឋាភិបាល នីតិកាលទី៧ នៃរដ្ឋសភា។
ឧបនាយករដ្ឋមន្រ្តីប្រចាំការ បានផ្តល់ការយកចិត្តទុកដាក់ខ្ពស់ចំពោះរាល់សំណូមពរ និងបញ្ហាប្រឈមផ្សេងៗរបស់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់របស់ទីស្តីការគណៈរដ្ឋមន្រ្តី ហើយបានផ្តល់នូវដំណោះស្រាយ និងអនុសាសន៍ណែនាំជាក់ស្តែង ទៅតាមករណីនីមួយៗ ទាំងការងារជំនាញបច្ចេកទេស និងការផ្គត់ផ្គង់ហិរញ្ញវត្ថុ ដើម្បីដោះស្រាយការលំបាកផង ក៏ដូចជាផ្តល់នូវបរិយាកាសការងារល្អប្រសើរសម្រាប់បង្កើនផលិតភាពការងារ ព្រមទាំងដើម្បីផ្តល់នូវការលើកទឹកចិត្ត តាមគោលការណ៍គុណាធិបតេយ្យ ដោយគិតគូរទៅដល់កត្តាបរិយាបន្ន ជាពិសេសដើម្បីផ្តល់នូវឱកាសដល់មន្រ្តីដែលមានសមត្ថភាពពិតប្រាកដ។
លោកបានបន្តថា ទីស្តីការគណៈរដ្ឋមន្រ្តីកំពុងពង្រឹងកិច្ចសហប្រតិបត្តិការ និងភាពជាដៃគូជាមួយដៃគូអភិវឌ្ឍមួយចំនួន ដើម្បីរួមចំណែកផ្តល់ការគាំទ្រដល់កិច្ចខិតខំប្រឹងប្រែងនេះ។ លោក វង្សី វិស្សុត ក៏បានផ្តល់គោលការណ៍ ណែនាំផងដែរ ពាក់ព័ន្ធនឹងតួនាទី និងភារកិច្ចស្នូលរបស់ទីស្តីការគណៈរដ្ឋមន្រ្តី ជាពិសេសពាក់ព័ន្ធនឹងការងាររាជកិច្ច និងបណ្ណសារ ព្រោះឯកសារជាតិមួយចំនួនមានតម្លៃមហាសាលមិនអាចកាត់ថ្លៃបាន ដែលចាំបាច់ថែរក្សាឱ្យគត់មត់។
ទន្ទឹមនេះលោកក៏បានលើកឡើងផងដែរ អំពីវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាល នីតិកាលទី៧ នៃរដ្ឋសភា ដែលក្នុងក្របខណ្ឌក្រសួងនានា ក៏ដូចជាទីស្តីការគណៈរដ្ឋមន្រ្តី ត្រូវធ្វើការពិនិត្យឡើងវិញនូវរចនាសម្ព័ន្ធ និងការវិភាគមុខងារ ដោយរួមទាំងការជ្រើសរើសមន្រ្តីរាជការ សំដៅពង្រឹងគុណភាព ប្រសិទ្ធភាព និងសមិទ្ធកម្មរបស់មន្រ្តី និងស្ថាប័ន។
ទន្ទឹមនេះ ឧបនាយករដ្ឋមន្រ្តីប្រចាំការ ក៏បានផ្តល់ការណែនាំមួយចំនួនផងដែរពាក់ព័ន្ធនឹងភាពជាអ្នកដឹកនាំ ការរៀបចំប្រព័ន្ធនិងរបៀបរបបគ្រប់គ្រងការងារផ្ទៃក្នុង ព្រមទាំងការគ្រប់គ្រងធនធាន ទាំងធនធានមនុស្ស និងហិរញ្ញវត្ថុ ដោយផ្សារភ្ជាប់ជាមួយនឹងការធ្វើបរិវត្តកម្មឌីជីថល សំដៅធ្វើឱ្យទីស្តីការគណៈរដ្ឋមន្រ្តីក្លាយជាស្ថាប័នមួយដែលមានសមត្ថភាពខ្លាំងពូកែ។ លោកបានជំរុញការរៀបចំផែនការអភិវឌ្ឍស្ថាប័ន ទាំងក្នុងអង្គភាពនីមួយៗ និងទាំងក្នុងក្របខណ្ឌទីស្តីការគណៈរដ្ឋមន្រ្តីទាំងមូល។
ក្នុងឱកាសនោះដែរ ឧបនាយករដ្ឋមន្រ្តីប្រចាំការ វង្សី វិស្សុត បានលើកទឹកចិត្តដល់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់នៃទីស្តីការគណៈរដ្ឋមន្រ្តី ត្រូវបន្តបង្កើនសមត្ថភាពការងារជាប់ជាប្រចាំ និងត្រូវហ៊ានទទួលយកការទិតៀន និងការប្រកួតប្រជែង ដើម្បីជាឧបករណ៍កែលម្អ និងអភិវឌ្ឍសមត្ថភាពផ្ទាល់ខ្លួន ព្រមទាំងត្រូវបំពេញការងារជាក្រុម ប្រកបដោយវិជ្ជាជីវៈ គោរពវិន័យ គោរពច្បាប់ លិខិតបទដ្ឋាន និងគោរពក្រមសីលធម៌វិជ្ជាជីវៈ ដើម្បីអាចទៅមុខបានទាំងអស់គ្នា ហើយអាចរស់បានទាំងអស់គ្នា៕
