(ភ្នំពេញ)៖ តារាចម្រៀងពោរពេញ​ដោយរឿងរ៉ាវ មិនចេះចប់មិនចេះ​ហើយ អ្នកនាង ពេជ្រ សោភា បានក្លាយជាអ្នកតំណាង​ឲ្យផលិតផល Oppo Smart Phone ជំនាន់ថ្មី នៅកម្ពុជា បន្ទាប់ពីការងារ អាជីពជាតារាចម្រៀងរបស់នាង ទទួលបានជោគជ័យ គួរជាទីមោទនៈ ក្នុងរយៈពេលប៉ុន្មានឆ្នាំចុងក្រោយនេះ បើទោះបីជានាងបានឆ្លងកាត់នូវព្យុះភ្លៀងរឿងរ៉ាវ ជាច្រើនមកក្ដី។

​ក្រុមហ៊ុន Oppo smart Phone បានប្រកាសចេញលក់ជាផ្លូវការ នូវផលិតផលទូរស័ព្ទ ជំនាន់ថ្មី Fs1 ហើយក៏បានប្រកាសថា តារាចម្រៀង អ្នកនាង ពេជ្រ សោភា តារា​ល្បីរបស់ផលិតកម្ម ​ហង្សមាស ជាអ្នកតំណាងផលិតផល នៅប្រទេសកម្ពុជា កាលពីពេលថ្មីនេះ នៅឯសណ្ឋាគារកាំបូឌីយ៉ាណា។

​លោក សឿ រឹទ្ធីយ៉ា ប្រធានផ្នែកទីផ្សារ របស់ក្រុមហ៊ុន Oppo Smart Phone បាននិយាយថា លោកមានសេចក្ដីរីករាយបំផុត នៅពេលផលិតផល Oppo Smart Phone មានវត្តមានលើទីផ្សារកម្ពុជា ពិសេសទូស័ព្ទ Fs1 នេះមានមុខងារពិសេស គឺ​ការថតរូបច្បាស់ជាមួយកាំមេរ៉ាមុខ ១៦ មេហ្គាភិចសែល ដែលលោកអ្នកនឹងកាន់តែស្រស់ស្អាត ពេលប្រើប្រាស់កាមេរ៉ានេះ ដើម្បីថតរូប និង​អង្គចងចាំ ៣២ជី​។

លោកបន្តថា ក្រុមហ៊ុននេះបានបង្កើតឡើង នៅឆ្នាំ២០០៣ នៅប្រទេសចិន ហើយក៏បានវិវត្តន៍ខ្លួន ក្លាយជាក្រុមហ៊ុនទូរស័ព្ទ ដែលចែកចាយជាច្រើនប្រទេស លើសាកលលោក ដែលមានដូចជាប្រទេសចិន កូរ៉េ ថៃ នឹងវៀតណាម ភូមា ក្រៅពីនេះ ក៏មានប្រទេសកម្ពុជាយើងផងដែរ។

តារាចម្រៀង អ្នកនាង ពេជ្រ សោភា បានថ្លែងមកកាន់ក្រុមអ្នកគាំទ្រ និង​បណ្ដាអ្នកសារព័ត៌មានថា ​នាងមានសេចក្ដីរំភើបឥតឧបមា នៅពេល​បានក្លាយជាអ្នកតំណាងផលិតផល ទូរស័ព្ទជំនាន់ថ្មីនេះ​។ ក្រៅពីដំណើរការដ៏ល្អ ទូរស័ព្ទសំណប់ចិត្តរបស់នាងនេះ មានតំលៃត្រឹមតែ ២៦៩ដុល្លារតែប៉ុណ្ណោះ ដែលនឹងដាក់ចរាចរណ៍ លើទីផ្សារក្នុងប្រទេសកម្ពុជា នៅថ្ងៃទី២៦​សីហាខាងមុខនេះហើយ។

អ្នកនាង ពេជ្រ សោភា មានជំនឿចិត្តថា នឹងធ្វើឲ្យក្រុមហ៊ុនទូរស័ព្ទដៃមួយនេះ ជោគជ័យ ដូចអាជីពសិល្បៈអ្នកនាងបច្ចុប្បន្ននេះដែរ។ ក្រៅពីប្រកាសជាផ្លូវការ នៃការដំណើរការផលិតផលនេះ អ្នកនាង ពេជ្រ សោភា បានប្រកាសធ្វើកម្មវិធីសប្បុរសធម៌​ដ៏ធំមួយនៅខែកញ្ញា ខាងមុខ ដើម្បីរកជំនួយជួយអ្នកក្រីក្រ អនាថា ដែលនាងបានសហការ​ជាមួយក្រុមហ៊ុន ទូរស័ព្ទដៃ នេះផ្ទាល់តែម្ដង៕