(ប៉ៃលិន)៖ លោក អ៉ី ឈាន ប្រធានក្រុមការងារគណបក្សប្រជាជនកម្ពុជា ចុះជួយខេត្តប៉ៃលិន និងជាប្រធានក្រុមការងារថ្នាក់ជាតិ ចុះមូលដ្ឋានខេត្តប៉ៃលិន បានបញ្ជាក់ថា លោកនឹងរៀបចំក្រុមការងារ សហការជាមួយជំនាញ ស្នងការនគរបាលខេត្តប៉ៃលិន ធ្វើការចុះចល័តផ្តល់អត្តសញ្ញាណប័ណ្ណ ជូនដល់មូលដ្ឋាន នាពេលដ៏ខ្លីខាងមុខនេះ ដើម្បីផ្តល់ភាពងាយស្រួល ដល់បងប្អូនប្រជាពលរដ្ឋទាំងអស់។
ការបញ្ជាក់នេះ ធ្វើឡើងក្នុងឱកាសដែល លោក អ៉ី ឈាន និង លោកស្រី បាន ស្រីមុំ អ្នកតំណាងរាស្រ្តមណ្ឌលប៉ៃលិន រួមនឹងអាជ្ញាធរខេត្ត ព្រមទាំងក្រុមការងារ នៅព្រឹកថ្ងៃទី២១ ខែសីហា ឆ្នាំ២០១៦ បានអញ្ជើញចុះជួបសួរសុខទុក្ខ ប្រជាពលរដ្ឋ និងក្រុមប្រឹក្សាឃុំ នៅជនបទតាមខ្នងផ្ទះ ក្នុងឃុំស្ទឹងកាច់ ស្រុកសាលាក្រៅ ខេត្តប៉ៃលិន ដើម្បីស្វែងយល់ពីសុខទុក្ខ និងបញ្ហាប្រឈម ព្រមទាំងស្តាប់យោបល់ និងសំណូមពរនានា របស់ប្រជាពលរដ្ឋ។
ក្នុងឱកាសនោះ លោក អ៉ី ឈាន ក៏បានអំពាវនាវផងដែរ សូមឲ្យបងប្អូនប្រជាពលរដ្ឋទាំងអស់ ដែលពុំទាន់មានអត្តសញ្ញាណប័ណ្ណសញ្ជាតិខ្មែរគំរូថ្មី សូមអញ្ជើញទៅបំពេញបែបបទស្នើសុំធ្វើឲ្យបានគ្រប់ៗគ្នា ដើម្បីជាប្រយោជន៍សម្រាប់ខ្លួនឯង ពិសេសជាឯកសារផ្លូវការតែមួយគត់ ក្នុងចុះឈ្មោះបោះឆ្នោត និងបោះឆ្នោតជ្រើសរើសក្រុមប្រឹក្សាឃុំ សង្កាត់ នាពេលខាងនេះ។
ក្នុងដំណើរចុះដល់មូលដ្ឋានផ្ទាល់ ដល់គេហដ្ឋានរបស់លោក អ៉ី ឈាន នាពេលនេះ គឺត្រូវបានទទួលស្វាគមន៍ និងរីករាយបំផុត ពីសំណាក់ប្រជាពលរដ្ឋក្នុងមូលដ្ឋានផ្ទាល់ ដោយក្តីនឹករលឹកបំផុតចំពោះលោកផងដែរ។
លោក អ៉ី ឈាន ក្នុងនាមប្រធានក្រុមការងារថ្នាក់ជាតិ ចុះមូលដ្ឋានបានថ្លែងថា រាជរដ្ឋាភិបាល បានរៀបចំក្រុមការងារថ្នាក់ជាតិចុះមូលដ្ឋាន គឺដើម្បីផ្សាភ្ជាប់ទំនាក់ទំនង រវាងរាជរដ្ឋាភិបាល ជាមួយប្រជាពលរដ្ឋក្នុងមូលដ្ឋានដោយផ្ទាល់ ក្នុងការស្វែងយល់ពីបញ្ហាប្រឈមនានា និងស្តាប់យោបល់ សំណូមពររបស់ប្រជាពលរដ្ឋ និងឆ្លើយតប សម្របសម្រួលក្នុងការដោះស្រាយបញ្ហានានា ដើម្បីបម្រើផលប្រយោជន៍ ជូនប្រជាពលរដ្ឋនៅមូលដ្ឋានដោយផ្ទាល់ សមស្របទៅតាមកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៣ ផែនការយុទ្ធសាស្រ្តអភិវឌ្ឍន៍ជាតិ គោលនយោបាយ និងកម្មវិធីនានារបស់រាជរដ្ឋាភិបាល។
ក្នុងការចុះផ្ទាល់ដល់មូលដ្ឋាន លោក អ៉ី ឈាន បានឧបត្ថម្ភដល់គ្រួសារប្រជាពលរដ្ឋ និងក្រុមប្រឹក្សាឃុំដែលមានជីវភាពខ្វះខាត ចំនួន១០គ្រួសារ ដោយក្នុងមួយគ្រួសារៗទទួលបាន គ្រឿងឧបភោគ បរិភោគ សម្ភារៈប្រើប្រាស់ និងថវិកាមួយចំនួនផងដែរ៕
