(ភ្នំពេញ)៖ ប្រតិភូនាយទាហានវ័យក្មេងកងទ័ពជើងគោកសិង្ហបុរី ដឹកនាំដោយលោកវរសេនីយ៍ត្រី SAHIR IMAN BIN MOHAMAD SAWAL មេបញ្ជាការ កងអនុសេនាធំហ្វឹកហ្វឺន នៃមជ្ឈមណ្ឌលហ្វឹកហ្វឺនសន្តិសុខជាតិ កងទ័ពជើងគោកសិង្ហបុរី នៅព្រឹកថ្ងៃទី០៦ ខែធ្នូ ឆ្នាំ២០២៣នេះ បានអញ្ជើញមកទស្សនកិច្ចសិក្សាស្វែងយល់ពីការងាររក្សាសន្តិភាពរបស់កងកម្លាំងមួកខៀវកម្ពុជា។

ពិធីនេះទទួលស្វាគមន៍ដោយឧត្តមសេនីយ៍ត្រី រ៉ា ភិរុណ នាយករង នាយកដ្ឋានសហប្រតិបត្តិការ និងរក្សាសន្តិភាព នៃមជ្ឈមណ្ឌលជាតិរក្សាសន្តិភាព។

កម្មវិធីផ្លាស់ប្តូរនាយទាហានវ័យក្មេង រវាងកងទ័ពជើងគោក នៃកងយោធពលខេមរភូមិន្ទ និងកងទ័ពជើងគោកសិង្ហបុរី (RAC – SAF Junior Offiers Exchange Program) មានរយៈពេល០៩ថ្ងៃ ចាប់ពីថ្ងៃទី០៤ ដល់ថ្ងៃទី១២ ខែធ្នូ ឆ្នាំ២០២៣ ក្នុងគោលបំណងស្វែងយល់រវាងគ្នាទៅវិញទៅមក និងពង្រឹងកិច្ចសហប្រតិបត្តិការរវាងកងទ័ពជើងគោក នៃបណ្តាប្រទេសសមាជិកអាស៊ាន និយាយជារួម និងកងទ័ពជើងគោក កម្ពុជា-សិង្ហបុរី និយាយដោយឡែក ស្របតាមគោលគំនិតកិច្ចសហប្រតិបត្តិការ ដែលបានឯកភាពគ្នារវាងមេបញ្ជាការកងទ័ពជើងគោក នៃបណ្តាប្រទេសសមាជិកអាស៊ាន ក្នុងកិច្ចប្រជុំពហុភាគីមេបញ្ជាការកងទ័ពជើងគោក នៃបណ្តាប្រទេសសមាជិកអាស៊ាន លើកទី២៤ (24th ACAMM) នៅហួរហ៊ីន ព្រះរាជាណាចក្រថៃ។

នៅក្នុងអំឡុងពេលទស្សនកិច្ចនៅកម្ពុជា ប្រតិភូនាយទាហានវ័យក្មេងកងទ័ពជើងគោកសិង្ហបុរី បានចូលជួបសម្តែងការគួរសមជាមួយនាយឧត្តមសេនីយ៍ ម៉ៅ សុផាន់ និងទស្សនកិច្ចការងារនៅបណ្តាអង្គភាពដូចជា បញ្ជាការដ្ឋានទ័ពពិសេស បញ្ជាការដ្ឋានវិស្វកម្ម កងពលតូចលេខ៧០ មជ្ឈមណ្ឌលហ្វឹកហ្វឺនកងទ័ពជើងគោក យោធភូមិភាគទី៤ សាលាហ្វឹកហ្វឺនសង្រ្គោះមិត្តភាព កម្ពុជា-ជប៉ុន ក្រុងព្រះសីហនុ និងវិទ្យាស្ថានកងទ័ពជើងគោក អគ្គបញ្ជាការ។ ទន្ទឹមនឹងនេះប្រតិភូនាយទាហានវ័យក្មេងកងទ័ពជើងគោកសិង្ហបុរី ក៏នឹងធ្វើបទបង្ហាញអំពីការនុវត្តកាតព្វកិច្ចយោធា និងការជ្រើសរើសកងទ័ពពិសេស នៅកងពលតូចលេខ៧០ កងទ័ពជើងគោកផងដែរ។

គូសបញ្ជាក់ផងដែរថា កម្មវិធីផ្លាស់ប្តូរនាយទាហានវ័យក្មេង រវាងកងទ័ពជើងគោក នៃកងយោធពលខេមរភូមិន្ទ និងកងទ័ពជើងគោក សិង្ហបុរី (RAC – SAF Junior Offiers Exchange Program) គឺជាការផ្លាស់ប្តូរលើកទី១ រវាងកងទ័ពជើងគោកកម្ពុជា-សិង្ហបុរី៕