(កែប)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងកោតសរសើរ លោក សុខ សូកេន រដ្ឋមន្ត្រីក្រសួងទេសទេសចរណ៍ ដែលបានធ្វើការងារយ៉ាងសកម្មក្នុងរយៈពេល១០០ថ្ងៃនៃការចូលកាន់ដំណែង និងសរសើរចំពោះ លោក សោម ពិសិដ្ឋ អភិបាលខេត្តកែប ដែលបានប្រឹងប្រែងកសាង និងអភិវឌ្ឍន៍ខេត្តកែប ឱ្យទទួលបានពានរង្វាន់ផ្សេងៗជាបន្តបន្ទាប់។
សម្តេចធិបតី ហ៊ុន ម៉ាណែត ថ្លែបបែបនេះ ធ្វើឡើងក្នុងឱកាសសម្តេច អញ្ជើញជាអធិបតីប្រកាសបិទពិធីបុណ្យសមុទ្រ នៅខេត្តកែប នៅថ្ងៃទី៣ ខែធ្នូ ឆ្នាំ២០២៣នេះ។
ក្នុងឱកាសនោះសម្តេចបានថ្លែងអំណរគុណចំពោះ ក្រសួងទេសចរណ៍ គណៈកម្មការរៀបចំបុណ្យសមុទ្រ ព្រមទាំងអាជ្ញាធរខេត្ត ដែលបានរៀបចំបុណ្យសមុទ្រដំណើរការដោយល្អ និងមានប្រជាពលរដ្ឋមកចូលរួមទស្សនាជាច្រើនម៉ឺននាក់។
ទន្ទឹមគ្នានេះដែរ សម្តេចធិបតីបានថ្លែងកោតសរសើរដល់លោក សុខ សូកេន រដ្ឋមន្ត្រីក្រសួងទេសទេសចរណ៍ ដែលក្នុងរយៈពេលជាង១០០ថ្ងៃ នៃការចូលមកកាន់ដំណែងជារដ្ឋមន្រ្តីក្រសួងទេសចរណ៍បានធ្វើការងារយ៉ាងសកម្ម និងបានចុះទៅធ្វើការងារដោយផ្ទាល់នៅតាមមូលដ្ឋានទេសចរណ៍ផ្សេងៗ ជួយដល់វិស័យទេសចរណ៍ ក៏ដូចជាប្រតិបត្តិករទេសចរណ៍។ ជាមួយគ្នានេះ លោកក៏បានចូលរួមចំណែកជាមួយរាជរដ្ឋាភិបាល ក្នុងការបន្តអភិវឌ្ឍន៍សមិទ្ធផលដែលបានកសាងប្រមាណជាង៤០ឆ្នាំបន្ទាប់ពីរបបប្រល័យពូជសាសន៍ ប៉ុល ពត និងការខិតខំជំរុញ ដើម្បីធ្វើយ៉ាងបន្តនិរន្តភាពនៃបុព្វហេតុដែលរាជរដ្ឋាភិបាលកម្ពុជាអាណត្តិមុនៗបានបន្សល់ទុក ដើម្បីជំរុញការអភិវឌ្ឍន៍ សេដ្ឋកិច្ច និងជីវភាពរស់នៅរបស់ប្រជាពលរដ្ឋគ្រប់វិស័យ។
សម្តេចធិបតីមានប្រសាសន៍ថា៖ «ក្នុងថ្ងៃនេះ គឺ១០០ថ្ងៃនេះ មិនមែនស្ងៀមទេ ឯកឧត្តម សុខ សូកេន គឺថាអ្នកនិយាយតិចធ្វើច្រើន។ មិនសូវលឺ ឃើញនិយាយប៉ុន្មានទេ ប៉ុន្តែបើសួរថ្ងៃណានៅណា គឺតិចចុះទៅជួបសហគមន៍កំពង់ភ្លុក តិចចុះទៅជួបនៅទន្លេសាប តិចជួបជាមួយប្រតិបត្តិករសហគមន៍ក្នុងវិស័យទេសចរណ៍នៅខេត្តសៀមរាប នៅកែប។ ចុះក្តាប់ ចុះជួបផ្ទាល់ ចុះធ្វើការផ្ទាល់ ចុះរៀបចំផែនការផ្ទាល់ រៀបចំជាមួយមន្រ្តីនៅក្នុងស្ថាប័ន ក្រសួងស្ថាប័ន មន្ទីរពាក់ព័ន្ធ។ ១០០ថ្ងៃនេះ ក្រសួងទេសចរណ៍បានបញ្ជាក់ថាជាក្រសួងដែលដឹកនាំដោយមន្រ្តីជើងពីរចុះទៅគ្រប់កន្លែង នេះត្រូវតែបន្ត។»
សម្តេចថែមទាំងបានកោតសរសើរចំពោះការរៀបចំយុទ្ធសាស្រ្ត អភិវឌ្ឍន៍វិស័យទេសចរណ៍ តាមរយៈ«យុទ្ធសាស្រ្តបង្កើត៥អភិវឌ្ឍន៍៤» ដែលនៅក្នុងយុទ្ធសាស្រ្តនេះគឺធ្វើយ៉ាងណាឱ្យតំបន់ទេសចរណ៍ផ្សេងៗទាញយកសក្តានុពល ដើម្បីជំរុញសេដ្ឋកិច្ចឡើងវិញក្រោយកូវីដ១៩ និងការរៀបចំតំបន់ឆ្នេរសមុទ្រកម្ពុជានៅក្នុងខេត្ត៤ រួមមាន ខេត្តព្រះសីហនុ កែប កំពត កោះកុង ដែលត្រូវបានប្រសិទ្ធនាមថា តារារះនៅទិសនិរតី ឱ្យបានល្អប្រសើរ និងក្លាយជាគោលដៅទេសចរណ៍សាកលឈានមុខ ប្រកបដោយភាពទាក់ទាញសំបូរបែប ដែលរួមចំណែកដល់ការលើកកម្ពស់ភាពធន់ និងកំណើនសេដ្ឋកិច្ចកម្ពុជា ដោយឈរលើគោលការណ៍គ្រឹះទេសចរណ៍ផ្សារភ្ជាប់ទឹកដី និងធម្មជាតិ ហើយនេះគឺជាកិច្ចការសំខាន់ដូចទៅក្នុងការខិតខំរៀបចំរៀបចំនូវបុណ្យសមុទ្រនៅក្នុងឱកាសនេះផងដែរ។
ទន្ទឹមគ្នានេះ សម្តេចធិបតីក៏បានកោតសរសើរចំពោះលោក សោម ពិសិដ្ឋអភិបាលខេត្តកែប ដែលបានខិតខំនៅក្នុងកិច្ចការកសាង អភិវឌ្ឍន៍ ការរៀបចំសោភណ្ឌភាព និងបរិស្ថាននៅក្នុងខេត្តកែបឱ្យមានភាពស្រស់ស្អាត ដែលនាំឱ្យខេត្តកែបទទួលបានជ័យលាភីពានរង្វាន់ថ្នាក់ជាតិ ថ្នាក់តំបន់ ជាបន្តបន្ទាប់។
សម្តេចបន្ថែមថា ការអភិវឌ្ឍន៍ទាំងនេះបានផ្តល់ផលប្រយោជន៍ដល់ប្រជាពលរដ្ឋខេត្តកែបទាំងមូល និងបានចែកផលលាភទៅដល់ប្រជាពលរដ្ឋនៅមូលដ្ឋាន។
សម្តេចបានជំរុញឱ្យអភិបាលខេត្តកែប បន្តរៀបចំទីតាំងនៅតាមបណ្តោយឆ្នេរប្រឡែង២៧០០ម៉ែត្រ ទៅជាសួនច្បារ ដើម្បីផលផលប្រយោជន៍សាធារណៈ។
សម្តេចធិបតីបន្តថា «ផែនការមេដែលបានរៀបចំរួច នៅតាមបណ្តោយឆ្នេរ២៧០០ម៉ែត្រត្រូវរៀបចំជាសួនច្បារសាធារណៈ ដែលអាចនឹងបង្កើតសក្តានុពលសម្រាប់ខេត្តកែបបន្ថែមទៀត និងបន្តរៀបចំកម្មវិធីទាក់ទាញភ្ញៀវទេសចរ»។
សម្តេចលើកឡើងទៀតថា រាជរដ្ឋាភិបាលមានផែនការសម្រាប់អភិវឌ្ឍន៍ទេសចរណ៍ខេត្តកែបនៅឆ្នាំ២០២៣-២០៤៥ ដោយបានកំណត់ចក្ខុវិស័យ ប្រែក្លាយខេត្តកែប ជាទេសចរណ៍ធម្មជាតិ និងសមុទ្រសម្រាកកម្សាន្តបែបកម្រិតខ្ពស់៕
