(ភ្នំពេញ)៖ នៅព្រឹកថ្ងៃទី២២ ខែសីហាខាងមុខនេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នឹងអញ្ជើញជាអធិបតីភាពក្នុង វេទិកាស្តីពីការការពារ និងអភិរក្សធនធានធម្មជាតិ នៅវិមានសន្តិភាព សាលាប្រជុំរំដួល វេលាម៉ោង ៧៖៣០នាទីព្រឹក។

កម្មវិធី វេទិកាស្តីពី «ការការពារ និងអភិរក្សធនធានធម្មជាតិ» នេះគឺរៀបចំឡើងដោយក្រសួងបរិស្ថាន, ដោយក្រសួងក៏បានសូមនិមន្តព្រះតេជគុណ ប៊ុត ប៊ុនតិញ ប្រធានអង្គការព្រះពុទ្ធសាសនា ដើម្បីសន្តិភាព និងជាស្ថាបនិកបណ្តាញព្រះសង្ឃឯករាជ្យ ដើម្បីយុត្តិធម៌សង្គម និងកញ្ញា ធី​ សុវណ្ណថា អតីតជាសកម្មជនដ៏ល្បីមួយរូបរបស់បក្សប្រឆាំង ដែលបច្ចុប្បន្នជាប្រធានអង្គការ «យុវជន និងកិច្ចការសង្គម» ដើម្បីចូលរួមនៅក្នុងវេទិកានោះផងដែរ។​

លិខិតរបស់ក្រសួងបរិស្ថាន ដែលនិមន្តព្រះតេជគុណ ប៊ុត ប៊ុនតិញ និងអញ្ជើញកញ្ញា ធី សុវណ្ណថា គឺធ្វើឡើងតាមចំណារឯកភាពរបស់សម្តេចតេជោ ហ៊ុន សែន ចុះថ្ងៃទី០១ ខែសីហា ឆ្នាំ២០១៦។

សូមជំរាបថា ព្រះតេជគុណ ប៊ុត ប៊ុនតិញ ត្រូវបានគេដឹងថា ជាព្រះសង្ឃដែលធ្វើសកម្មភាពគាំទ្រដល់បក្សប្រឆាំង និងវាយប្រហារខ្លាំងៗមករាជរដ្ឋាភិបាលកម្ពុជា, ហើយព្រះតេជគុណ ប៊ុត ប៊ុនតិញ ត្រូវបានលេចសកម្មភាពខ្លាំងនៅក្នុងហេតុការណ៍បាញ់សម្លាប់លោកបណ្ឌិត កែម ឡី នាពេលកន្លងមក៕