(ស្ទឹងត្រែង)៖ លោក ម៉ែន គុង ប្រធានសហភាពសហព័ន្ធយុវជនកម្ពុជាខេត្តស្ទឹងត្រែង ល្ងាចថ្ងៃទី០១ ខែធ្នូ ឆ្នាំ២០២៣នេះ បានអញ្ជើញជាអធិបតីបើកបវេសនកាលឆ្នាំថ្មី ឆ្នាំ២០២៣-២០២៤ នៅវិទ្យាល័យ ព្រះរាជបូជនីយកិច្ច។ ពិធីនេះក៏មានការចូលរួមពីលោកស្រី ទី ធីតា អនុប្រធានមន្ទីរអប់រំ យុវជន និងកីឡាខេត្ត, លោក សុខ ចាន់សំអឿន អភិបាលរងក្រុង និងលោកគ្រូ អ្នកគ្រូ មាតា បិតាសិស្ស និងសិស្សានុសិស្សជាច្រើននាក់។
ថ្លែងក្នុងឱកាសនោះ លោក ម៉ែន គុង បានលើកឡើងថា ដើម្បីឲ្យខ្លួនទទួលបាននូវចំណេះដឹងពិតប្រាកដ មានតែខ្លួនឯងផ្ទាល់ទេ ដែលជាអ្នកខិតខំស្វ័យសិក្សារៀនសូត្រ ក៏ដូចជារៀនសូត្រជាមួយលោកគ្រូ អ្នកគ្រូ បានគ្រប់ពេលវេលា តាមរូបភាពសម្បូរបែប ស្របតាមសម័យឌីជីថល និងបច្ចេកវិទ្យាទំនើប ហើយត្រូវជៀសវាងការចំណាយពេលវេលាឥតប្រយោជន៍ ត្រូវនៅឲ្យឆ្ងាយពីគ្រឿងញៀន ឬអំពើពុំគប្បីផ្សេងៗ ត្រូវអនុវត្តឲ្យបានខ្ជាប់ខ្ជួននូវបទបញ្ជាផ្ទៃក្នុងរបស់សាលារៀន មករៀនបានទៀងទាត់ និងគោរពស្រឡាញ់ តបស្នងសងគុណមាតា បិតា អាណាព្យាបាល និងលោកគ្រូអ្នកគ្រូ មិត្តភក្តិរបស់ខ្លួន។
លោកបន្ថែមថា ដើម្បីឲ្យវិស័យអប់រំមានការរីកចម្រើន ត្រូវតែមានការចូលរួមពីគ្រប់អ្នកពាក់ព័ន្ធ ដូចជាសិស្សានុសិស្សខ្លួនឯងផ្ទាល់ លោកគ្រូ អ្នកគ្រូ នាយកសាលា សហគមន៍ ដៃគូអភិវឌ្ឍនានា ជាពិសេសអាណាព្យាបាល ដែលនៅជិតស្និទ្ធជាមួយនឹងកូនចៅខ្លួនជាប្រចាំ ត្រូវបន្ថែមការគាំទ្រលើកទឹកចិត្ត និងគាំពារគ្រប់បែបយ៉ាង ក៏ដូចជាការគាំទ្រយ៉ាងពឹងទំហឹងពីក្រសួងអប់រំ យុវជន និងកីឡា។ សម្រាប់សាលារៀនផ្ទាល់ត្រូវពង្រឹងលើអភិបាលកិច្ចល្អ ការពិនិត្យកែសម្រួលរៀបចំកម្មវិធីសិក្សាពង្រឹងវិន័យ ចំណេះដឹង សីលធម៌ ឥរិបទសិស្ស សុខភាព អាហារូបត្ថម្ភ ការលើកទឹកចិត្ត ជំរុញការចូលរួមរបស់មាតាបិតាសហគមន៍ ការបង្កើននូវគុណវុឌ្ឍគ្រូបង្រៀន និងចំណេះជំនាញបទពិសោធន៍ថ្មីៗ ក្នុងការឆ្លើយតបបរិបទបច្ចេកវិទ្យាទំនើបឌីជីថល។
លោក ម៉ែន គុង ក៏បានថ្លែងអំណរគុណយ៉ាងជ្រាលជ្រៅដល់លោកនាយក លោកគ្រូ អ្នកគ្រូ ក៏ដូចជា អាណាព្យាបាល សហគមន៍ និងដៃគូអភិវឌ្ឍនានា ដែលបានខិតខំអស់ពីកម្លាំងកាយចិត្ត ក្នុងការជួយជ្រោមជ្រែង បង្ហាត់បង្រៀននឹងគាំទ្រដល់សាលារៀនក៏ដូចជាសិស្សានុសិស្ស រហូតទទួលបាននូវលទ្ធផលការសិក្សាគួរជាទីមោទកភាពក្រៃលែង ក៏ដូចជាជួយអភិវឌ្ឍន៍សាលារៀនឲ្យកាន់តែមានការរីកចម្រើនផងដែរ៕
