(ភ្នំពេញ)៖ លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានគូសរំលេចថា ថាមពលអគ្គិសនីស្អាត ដែលជាថាមពលបានមកពីកម្លាំងទឹក ព្រះអាទិត្យ និងខ្យល់ មិនត្រឹមតែជួយដល់បរិស្ថាន ភពផែនដីប៉ុណ្ណោះទេ តែក៏បានរួមចំណែកទាក់ទាញការវិនិយោគមកកាន់កម្ពុជាផងដែរ។
ក្នុងបទសម្ភាសន៍ជាមួយ Fresh News ក្នុងពិធីបិទស្ទឹងសាងសង់ទំនប់វារីអគ្គីសនីស្ទឹងតាតៃលើស្ថិតក្នុងស្រុកថ្មបាំង ខេត្តកោះកុង កាលពីថ្ងៃទី៣០ ខែវិច្ឆិកា ឆ្នាំ២០២៣ លោក កែវ រតនៈ បានលើកឡើងថា ថាមពលអគ្គិសនីស្អាត ក៏បានជាប់ពាក់ព័ន្ធដល់ដំណើរផលិតនូវផលិតផលនានាផងដែរ។
អគ្គិសនីមិនស្អាត ឬអគ្គិសនីបង្កផលប៉ះពាល់ដល់បរិស្ថាន ដល់ភពផែនដី កំពុងត្រូវបានពិភពលោករួមគ្នាលុបបំបាត់។ ក្នុងន័យនេះ ផលិតផលទាំងឡាយ ដែលផលិតដោយប្រើថាមពលអគ្គិសនីមិនស្អាត នឹងរងសម្ពាធពីអ្នកទិញផងដែរ។ ពួកនឹងគេមិនគាំទ្រលើផលិតផល ដែលផលិតដោយថាមពលមិនស្អាតនោះឡើយ ដើម្បីជាចំណែកជួយដល់យុទ្ធនាការការពារបរិស្ថាន ឬសង្គ្រោះភពផែនដី។ ក្រោមហេតុផលនេះ អ្នកផលិតទាំងឡាយ មុននឹងទៅវិនិយោគនៅប្រទេសណាមួយពួកគេក៏នឹងពិនិត្យលក្ខខណ្ឌនៃប្រភពថាមពលអគ្គិសនីផងដែរ។
លោក កែវ រតនៈ បានពន្យល់បែបនេះ «អ្នកវិនិយោគគាត់មានសម្ពាធពីអ្នកប្រើប្រាស់។ ឧទាហរណ៍នៅពេលយើងផលិតខោអាវ ផលិតកង់ ផលិតស្បែកជើង នាំចេញទៅទីផ្សារពិភពលោក អ្នកប្រើប្រាស់នៅជប៉ុន នៅអាមេរិក នៅអាមេរិកកណ្តាល និងទ្វីបផ្សេងទៀត អ្នកប្រើប្រាស់ទាំងនោះចង់ចូលរួមចំណែកការពារកម្តៅផែនដីកុំឱ្យឡើង។ ដូច្នេះគេចង់ទិញផលិតផលណា ដែលចេញពីថាមពលស្អាត»។
ក្រោមនិន្នាការបែបនេះ លោក កែវ រតនៈ បានអះអាងថា គោលដៅកម្ពុជា ផលិតថាមពលស្អាតឱ្យបាន៧០ភាគរយនៅឆ្នាំ២០៣០ នឹងរួមចំណែកដល់ការទាក់ទាញអ្នកវិនិយោគកាន់កម្ពុជា។
លោករដ្ឋមន្ត្រី បានបញ្ជាក់បែបនេះ «បើកម្ពុជាយើងរុញថាមពលស្អាតឱ្យដល់៧០ភាគរយ នេះជាក្តីសង្ឃឹមថ្មី។ មានន័យថា ជាការទាក់ទាញវិនិយោគឱ្យមកផលិតនៅកម្ពុជា ពីព្រោះបើអ្នកផលិតទៅប្រទេសដែលប្រើថាមពលមិនស្អាតច្រើន គេអត់ចង់ទិញ ការធ្វើទីផ្សារលំបាក។ ដូច្នេះហើយទើបប៉ុន្មានឆ្នាំនេះ ដោយសារថាមពលយើងស្អាតដល់៦២ភាគរយរួចហើយ អ៊ីចឹងហើយបានយើងឃើញថា រោងចក្រកាត់ដេរច្រើនណាស់កំពុងបន្តវិនិយោគនៅកម្ពុជា»។
សូមបញ្ជាក់ថា គិតត្រឹមចុងឆ្នាំ២០២២ កម្ពុជា អាចផលិតថាមពលអគ្គិសនីបានរហូតដល់ទៅ ៤,៤៩៥.៤២មេហ្គាវ៉ាត់។ ក្នុងនោះ ៦២ភាគរយជាថាមពលស្អាត បានមកពីវារីអគ្គិសនី និងពន្លឺព្រះអាទិត្យ៕
