(ភ្នំពេញ)៖ នៅថ្ងៃពុធ​ ២រោច​ ខែកត្តិក​ ឆ្នាំថោះ​ បញ្ចស័ក​ ព.ស២៥៦៧​ ត្រូវនឹងថ្ងៃទី២៩​ ខែវិច្ឆិកា​ ឆ្នាំ២០២៣​នេះ នៅស្ថានទូតជប៉ុនប្រចាំកម្ពុជា ​បានរៀបចំពិធីប្រគល់ពានរង្វាន់ ជ័យលាភីរបស់ក្រសួងការបរទេសជប៉ុន ​ជូនដល់​មជ្ឈមណ្ឌលសកម្មភាពកំចាត់មីនកម្ពុជា​។

លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក CMAC បានទទួលពានរង្វាន់ ជ័យលាភីរបស់ក្រសួងការបរទេសជប៉ុនពីលោក អ៊ូអ៊ីណូ អាតស៊ូហ្ស៊ី ឯកអគ្គរដ្ឋជប៉ុនប្រចាំកម្ពុជា។

ពិធីនេះក៏មានការអញ្ជើញចូលរួមពីប្រធាន JICA នៅកម្ពុជា​ ព្រមទាំងមន្ត្រីស្ថានទូត និង JICA ជាច្រើនរូប​ ជាមួយថ្នាក់ដឹកនាំអង្គភាពស៉ីម៉ាក់ជាច្រើនរូប។

សូមជម្រាបជូនថា​ កាលពីថ្ងៃទី០៤ ខែសីហា ឆ្នាំ២០២២ ក្រសួងការបរទេសជប៉ុនបានប្រកាសផ្ដល់ពានរង្វាន់ និងជ័យលាភីរបស់រដ្ឋមន្រ្ដីក្រសួងការបរទេសជប៉ុនជូនបុគ្គលនិងស្ថាប័ន(ក្រុម)ជាតិនិងអន្ដរជាតិ ដែលមានស្នាដៃល្អក្នុងការលើក​កម្ពស់ និងពង្រឹងកិច្ចសហប្រតិបត្តិការរវាងជប៉ុន និងប្រទេសនានាក្នុងពិភពលោក។

ក្នុងឆ្នាំ២០២២នេះ រដ្ឋមន្រ្តីក្រសួងការបរទេសជប៉ុនបានសម្រេចផ្ដល់ពានរង្វាន់ជូនបុគ្គល និងស្ថាប័ន/អង្គភាព ដែលកំពុងបំពេញការងារនៅប្រទេស​នានាចំនួន៤៨ប្រទេស ទាំងក្នុងតំបន់ និងក្នុងពិភពលោកដូចជា អង្គការសហប្រជាជាតិ អូស្ដ្រាលី អាហ្សង់ទីន អាល្លឺម៉ង់ ចិន ស៊ុយអ៊ែត សហរដ្ឋអាមេរិក ម៉ិចស៊ិចកូ សាំងហ្គាពួរ និងម៉ាឡេស៊ីជាដើម ហើយក្នុងនោះក៏មានមជ្ឈមណ្ឌលសកម្ម​ភាព​កំចាត់មីនកម្ពុជា (អង្គភាព CMAC) ផងដែរ។

សូមបញ្ជាក់ជូនថា ពានរង្វាន់របស់រដ្ឋមន្រ្តីក្រសួងការបរទេសជប៉ុនផ្ដល់ជូនអង្គភាព CMAC នេះគឺផ្អែកលើលទ្ធផលការងារដោយឈរលើបុព្វហេតុ «សមិទ្ធផលក្នុងការលើកកម្ពស់កិច្ចសហប្រតិបត្តិការអន្ដរជាតិ ក្នុងការ​កសាងសន្ដិភាព និងការអភិវឌ្ឍ​សេដ្ឋកិច្ច (Achievement in the Promotion of International Cooperation in Peace Building and Economic Development)»។

លោក ហេង រតនា តាងនាមថ្នាក់ដឹកនាំ មន្រ្តីអង្គភាព CMAC ទាំងអស់ និងរូបលោកផ្ទាល់សូមគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្ដេចតេជោ ហ៊ុន សែន និងសម្តេចធិបតី​ ហ៊ុន ម៉ាណែត ដែលតែងតែគាំទ្រដល់វិស័យសកម្មភាពមីន និងអង្គភាព CMAC ជាពិសេសបានដឹកនាំជំរុញលើកកម្ពស់កិច្ចសហប្រិតបត្តិការកម្ពុជា-ជប៉ុនកាន់​តែ​រឹងមាំស្ថិតស្ថេរ​ជានិរន្ដ។

ឯកអគ្គរាជទូតជប៉ុន បានរំលឹកថា CMAC ត្រូវបានបង្កើតឡើងក្នុងឆ្នាំ១៩៩២ ដោយអាជ្ញាធរអន្តរកាលអង្គការសហប្រជាជាតិ នៅកម្ពុជា ឬហៅកាត់ថា អ៊ុនតាក់ ហើយបានធ្វើការបោសសម្អាតមីន និងយុទ្ធភណ្ឌមិនទាន់ផ្ទុះ (UXO) អស់រយៈពេលជាង ៣០ឆ្នាំមកហើយ។ CMAC បានបោសសម្អាតមីន និងយុទ្ធភណ្ឌមិនទាន់ផ្ទុះបានប្រមាណ ៧០% នៃចំនួនសរុបដែលបានបោសសម្អាតនៅក្នុងប្រទេសកម្ពុជា ហើយនេះបានបង្ហាញឱ្យឃើញថាប្រហែល ៥៥% ផ្ទៃដីមីនសរុបបានបោសសម្អាតដោយពួកគាត់។

លោក អ៊ូអិណូ អាត់ស៊ូស៊ី បានបន្តថា ការបោសសម្អាតមីន និងយុទ្ធភណ្ឌមិនទាន់ផ្ទុះ គឺជាកត្តាចាំបាច់សម្រាប់ជីវភាពរស់នៅ ប្រកបដោយស្ថិរភាពសម្រាប់ប្រជាជនក្នុងតំបន់ ដើម្បីសម្រេចឱ្យបាននូវសន្តិភាពពិតប្រាកដ ការកសាងឡើងវិញ និងការអភិវឌ្ឍសេដ្ឋកិច្ចកម្ពុជា។ ចាប់តាំងពីឆ្នាំ១៩៩៨មក រដ្ឋាភិបាលជប៉ុនបាននឹងកំពុងជួយដល់ CMAC ក្នុងការបោសសម្អាតមីន និងយុទ្ធភណ្ឌមិនទាន់ផ្ទុះ តាមរយៈគ្រោងការណ៍ផ្សេងៗជាច្រើន។ បន្ថែមពីលើការផ្តល់សម្ភារៈ បរិក្ខារធុនធ្ងន់ដូចជា៖ ម៉ាស៊ីនដោះមីន និងការបន្តគាំទ្រសកម្មភាពដោះមីន ជប៉ុន បាននឹងកំពុងជួយសាងសង់មជ្ឈមណ្ឌលហ្វឹកហ្វឺននៅខេត្តកំពង់ឆ្នាំង សៀមរាប។

លោក អ៊ូអិណូ អាត់ស៊ូស៊ី បានបន្ថែមថា កម្ពុជាគ្រោងនឹងធ្វើជាប្រធានសន្និសីទត្រួតពិនិត្យឡើងវិញ លើកទីប្រាំរបស់រដ្ឋភាគីនៃអនុសញ្ញាហាមប្រាម ការប្រើប្រាស់គ្រាប់មីនប្រឆាំងមនុស្ស ឆ្នាំក្រោយនៅខេត្តសៀមរាប។ រដ្ឋាភិបាលជប៉ុនពិតជាស្វាគមន៍យ៉ាងអស់ពីចិត្ត លើសពីនេះជប៉ុនបានសម្រេចចិត្តឈរឈ្មោះ ជាប្រធាននៃអនុសញ្ញាហាមប្រាមការប្រើប្រាស់គ្រាប់មីន ប្រឆាំងមនុស្សលើកទី២២ នៅឆ្នាំ២០២៥។ សង្ឃឹមនឹងបង្ហាញពីទម្រង់នៃភាពជាដៃគូថ្មីរវាងប្រទេសជប៉ុន និងកម្ពុជានៅក្នុងសន្និសីទអន្តរជាតិ នៅពេលដែលយើងធ្វើការឆ្ពោះទៅរកពិភពលោក ដែលគ្មានមីននៅឆ្នាំ២០២៥។

លោកបានបញ្ជាក់ថា CMAC ត្រូវបានជ្រើសរើស ដើម្បីទទួលការសរសើរពីរដ្ឋមន្ត្រីការបរទេសជប៉ុន ក្នុងការទទួលស្គាល់កិច្ចខិតខំប្រឹងប្រែងរបស់ខ្លួន ដល់ការលើកកម្ពស់កិច្ចសហប្រតិបត្តិការអន្ដរជាតិ លើវិស័យសហប្រតិបត្តិការ បច្ចេកទេស និងសង្ឃឹមថាទំនាក់ទំនងដ៏យូរអង្វែង និងកិច្ចសហប្រតិបត្តិការនឹងបន្តរីកចម្រើននាពេលអនាគត៕