(ភ្នំពេញ)៖ ក្រសួងព័ត៌មាន និងស្ថានទូតបារាំងប្រចាំនៅកម្ពុជា បានពង្រឹងកិច្ចសហប្រតិបត្តិការក្នុងការបណ្ដុះបណ្ដាលធនធានមនុស្សលើវិស័យព័ត៌មាន និងការផ្សព្វផ្សាយព័ត៌មានជាភាសាបារាំង ដើម្បីលើកស្ទួយការប្រើប្រាស់ភាសាបារាំងនៅកម្ពុជា។ កិច្ចសហការគ្នានេះ បានធ្វើឡើងក្នុងជំនួបពិភាក្សាគ្នារវាងលោក នេត្រ ភក្ត្រា រដ្ឋមន្រ្តីក្រសួងព័ត៌មាន និងលោក M. Jacques Pellet ឯកអគ្គរដ្ឋទូតបារាំងប្រចាំកម្ពុជា នៅព្រឹកថ្ងៃទី២៩ ខែវិច្ឆិកា ឆ្នាំ២០២៣ នាទីស្តីការក្រសួងព័ត៌មាន។
លោករដ្ឋមន្ត្រី នេត្រ ភក្ត្រា បានលើកឡើងពី កិច្ចការងារមួយចំនួនដែលក្រសួងព័ត៌មាន បានកំពុងធ្វើទីមួយ ទាក់ទងនឹងកំណែទម្រង់លើការងាររបស់ក្រសួង ដើម្បីពង្រឹងប្រសិទ្ធភាព និងគុណភាពការងារ, ទីពីរ ការកែសម្រួលនូវច្បាប់មួយចំនួន ដើម្បីបម្រើឲ្យការវិវឌ្ឍនៃសង្គមឲ្យបានល្អ, ទីបី គឺការពង្រឹងគុណភាពសារព័ត៌មាន តាមរយៈការបណ្តុះបណ្តាល ហើយពាក់ព័ន្ធនឹងការបណ្ដុះបណ្ដាលនេះ លោកបានស្នើដល់ស្ថានទូតបារាំង ជួយគាំទ្រទៅលើការបណ្ដុះបណ្ដាល ព្រោះប្រទេសបារាំង គឺមានអ្នកជំនាញសារព័ត៌មាន និងមានបទពិសោធច្រើនទាក់ទងជាមួយនឹងបញ្ហានេះ ដើម្បីឲ្យកម្ពុជាអាចធ្វើការដកបទពិសោធបន្ថែមទៀតទៅលើកិច្ចការងារព័ត៌មាន។
ជាការឆ្លើយតបគឺ លោក M. Jacques Pellet ឯកអគ្គរដ្ឋទូតបារាំង បានផ្តល់នូវការគាំទ្រលើការបណ្តុះបណ្តាល ដោយសហការជាមួយនឹងដៃគូសម្រាប់អ្នកសារព័ត៌មានកម្ពុជា។ ក្នុងជំនួបពិភាក្សានេះដែរ រដ្ឋមន្រ្តីក្រសួងព័ត៌មាន និងឯកអគ្គរដ្ឋទូតបារាំងប្រចាំកម្ពុជា បានពិភាក្សាគ្នាផងដែរ ពាក់ព័ន្ធជាមួយនឹងការដែលកម្ពុជាត្រៀមធ្វើជាម្ចាស់ផ្ទះសម្រាប់ កិច្ចប្រជុំកំពូលអង្គការអន្តរជាតិ នៃប្រទេសនិយាយភាសាបារាំង នៅឆ្នាំ២០២៦ ហើយប្រទេសកម្ពុជាក៏កំពុងតែធ្វើកិច្ចការងារដើម្បីស្វែងរកការគាំទ្រ ពីបណ្ដាប្រទេសផ្សេងៗទៀត នៅក្នុងនាមជាប្រទេសម្ចាស់ផ្ទះនៃកិច្ចប្រជុំកំពូល។
លោករដ្ឋមន្ត្រី ក៏បានលើកឡើងអំពីផែនការមួយចំនួននៅ ក្នុងការចូលរួមផ្សព្វផ្សាយព័ត៌មាន និងការប្រើប្រាស់នូវប្រព័ន្ធផ្សព្វផ្សាយ ដើម្បីផ្សព្វផ្សាយអំពីប្រទេសកម្ពុជា និងការអភិវឌ្ឍរីកចម្រើនរបស់កម្ពុជា ទៅកាន់បណ្ដាប្រទេសដែលជាសមាជិក នៃប្រទេសនិយាយបារាំង ដោយត្រូវការជំរុញបន្ថែមលើកទឹកចិត្តឲ្យមានការប្រើប្រាស់ភាសាបារាំង តាមរយៈការផ្សព្វផ្សាយព័ត៌មាន ដើម្បីឲ្យប្រជាជនជាជនជាតិបារាំងនៅកម្ពុជា ក៏ទទួលបានព័ត៌មានអំពីកម្ពុជា ជាភាសាបារាំង និងឲ្យអ្នករៀនសូត្រភាសាបារាំង អាចអានព័ត៌មានអំពីកម្ពុជា ជាភាសាបារាំងបាន។
តមកនៅព្រឹកថ្ងៃដដែលនេះ លោករដ្ឋមន្រ្តី នេត្រ ភក្ត្រា បានអញ្ជើញឯកអគ្គរដ្ឋទូតបារាំង ទៅទស្សនកិច្ចស្វែងយល់ពីកិច្ចការងាររបស់កម្មវិធីរបស់ទូរទស្សន៍ជាតិកម្ពុជា កម្មវិធីផ្សាយជាភាសាបារាំង និងទស្សនាកន្លែងបណ្ណាសាររូបភាព នៅអគ្គនាយកដ្ឋានទីភ្នាក់ការងារសារព័ត៌មានកម្ពុជា AKP។
បច្ចុប្បន្ននេះក្រសួងព័ត៌មាន គឺមានប្រព័ន្ធផ្សព្វផ្សាយសំខាន់ៗ រួមមាន វិទ្យុជាតិកម្ពុជា ទូរទស្សន៍ជាតិ ទីភ្នាក់ងារសារព័ត៌មានកម្ពុជា AKP បានធ្វើការផ្សព្វផ្សាយព័ត៌មានជាភាសាបារាំង ភាសាអង់គ្លេស ភាសាវៀតណាម ភាសាចិន និងភាសាអារ៉ាប់ ក្នុងទិសដៅដើម្បីផ្សព្វផ្សាយអំពីកម្ពុជា ទៅកាន់ពិភពលោក តាមរយៈការប្រើប្រាស់ភាសាផ្សេងៗ។ វិទ្យុជាតិកម្ពុជា មានកម្មវិធីផ្សាយជាភាសាបារាំង ទូរទស្សន៍ជាតិកម្ពុជា មានកម្មវិធីជាភាសាបារាំងហើយ ទីភ្នាក់ងារសារព័ត៌មានកម្ពុជា ក៏មានវេបសាយ ដែលមានការប្រើប្រាស់ភាសាបារាំង ផងដែរ។
លោករដ្ឋមន្ត្រី នេត្រ ភក្ត្រា បានថ្លែងអំណរគុណចំពោះ លោកឯកអគ្គរដ្ឋទូត និងប្រទេសបារាំង ដែលបានជួយដល់កម្ពុជា ហើយក្នុងក្របខ័ណ្ឌនៃកិច្ចសហប្រតិបត្តិការលើវិស័យព័ត៌មាននេះ គឺភាគីទាំងពីរ កម្ពុជា បារាំង នឹងធ្វើការងារបន្ថែមទៀតដើម្បីពង្រឹងលើគុណភាពសារព័ត៌មាននៅកម្ពុជា៕
