(ក្រុងរីយ៉ូ)៖ ចំនួនមេដាយសរុបដែលបានបំពាក់ដល់អត្តពលិកជយលាភី បានកើនដល់ ៨២៤គ្រឿងហើយក្នុងព្រឹត្តិការណ៍កីឡាអូឡាំពិក រដូវក្តៅ ឆ្នាំ២០១៦ នៅប្រទេសប្រេស៊ីល ស្របពេលដែលអាមេរិក នៅតែបន្តនាំមុខកំពូលតា រាងដាច់ដដែលដោយឈ្នះមេដាយ រហូតដល់ ១០៤គ្រឿង។

តាមរយៈគេហទំព័រ Rio 2016 បានបង្ហាញថា យុទ្ធនាការដែលមានរយៈពេល ៤ឆ្នាំម្តងនេះ នឹងបញ្ចប់ទៅវិញ នាថ្ងៃទី២១ ខែសីហាស្អែក នេះហើយ ជាមួយនឹងមេដាយចំនួន ៨២៤គ្រឿង (មាស២៦២ ប្រាក់២៦២ និងសំរឹទ្ធ៣០០) ក៏បានធ្វើការបំពាក់ដល់អត្តពលិកមកពី ៨១ប្រទេសដែលដណ្តើមបានមេដាយ ស្របពេលអាមេរិក នៅតែបន្តនាំមុខគេ ដាច់ដដែល ពីការឈ្នះបានមេដាយ ១០៤គ្រឿង (មាស៣៨ ប្រាក់៣៤ និងសំរឹទ្ធ៣២)។

ជាមួយគ្នានោះដែរ ក្រុមអត្តពលិកអង់គ្លេស នៅតែបន្តនាំមុខ ដោយឈរនៅចំណាត់ថ្នាក់លេខ២ ដដែលដោយឈ្នះមេដាយបាន ៦០គ្រឿង តាមពីក្រោយឈរនៅលេខ៣ ដោយអត្តពលិករបស់ចិន ឈ្នះមេដាយបាន ៦២គ្រឿង តែមេដាយមាស និងមេដាយប្រាក់ ចាញ់អង់គ្លេស។

ព្រឹត្តិការណ៍កីឡាអូឡាំពិក រដូវក្តៅ ឆ្នាំ២០១៦ លើកទី៣១ នៅប្រទេសប្រេស៊ីល ស្ថិតក្នុងតំបន់អាមេរិកឡាទីននេះ នឹងបញ្ចប់ជាស្ថាពរ ស្អែកនេះហើយ ក្រោយបើកការប្រកួតតាំងពីថ្ងៃទី០៥ សីហា នៅលើ២៨ប្រភេទកីឡាដែលដាក់ឲ្យ ប្រកួត ចែកចេញជាង៣០០ វិញ្ញាសា៕