(បាត់ដំបង)៖ លោកឧត្តមសេនីយ៍ទោ សេង ធារិន មេបញ្ជាការស្តីទី យោធភូមិភាគទី៥ នាព្រឹកថ្ងៃទី២៤ ខែវិច្ឆិកា ឆ្នាំ២០២៣នេះ បានអញ្ជើញជាអធិបតីក្នុងពិធីបិទវគ្គហ្វឹកហ្វឺនបំប៉នពង្រឹង និងបើកវគ្គហ្វឹកហ្វឺនទូទៅនៅហ្នឹងកន្លែង វរសេនាតូចថ្មើរជើងលេខ៥១៤ កងពលតូចថ្មើរជើងលេខ៥១ នៅទីលានបាញ់គ្រាប់ពិតភ្នំផ្គាំ។
សម្រាប់ពិធីបិទវគ្គហ្វឹកហ្វឺនបំប៉នពង្រឹងវរសេនាតូចថ្មើរជើងលេខ៥១៤ នាពេលនេះសិក្ខាកាមសរុបចំនួន១០០នាក់ ហ្វឹកហ្វឺនមានរយៈពេល៩១ថ្ងៃ ដោយគិតចាប់តាំងពីថ្ងៃទី១៨ ខែសីហា ឆ្នាំ២០២៣ ដល់ថ្ងៃទី១៦ ខែ វិច្ឆិកា ឆ្នាំ២០២៣ ជាលទ្ធផលសម្រេចបាន៖ និទ្ទេសល្អ សរុបចំនួន ៣៥នាក់ ស្មើនឹង៣៥ភាគរយ, និទ្ទេសល្អបង្គួរ ចំនួន ៥០នាក់ ស្មើនឹង៥០ភាគរយ, និទ្ទេសមធ្យម ចំនួន១៥នាក់ ស្មើនឹង១៥ភាគរយ។ បើកវគ្គហ្វឹកហ្វឺនបំប៉នទូទៅនៅហ្នឹងកន្លែងវរសេនាតូចថ្មើរជើងលេខ៥១៤ ចំនួន១វគ្គ សិក្ខាកាមសរុបចំនួន១០០នាក់ មានរយៈពេល ៩៦ថ្ងៃ ដោយគិតចាប់តាំងពីថ្ងៃទី២៤ ខែវិច្ឆិកា ឆ្នាំ២០២៣នេះតទៅ។
លោកឧត្តមសេនីយ៍ទោ សេង ធារិន បានកោតសរសើរដល់កម្លាំង ដែលបានហ្វឹកហ្វឺនបញ្ចប់វគ្គនៅថ្ងៃនេះ ដែលបានខិតខំប្រឹងប្រែងរៀនសូត្រ រហូតទទួលបានលទ្ធផលល្អប្រសើរគួរជាទីមោទនៈ និងសូមផ្ដាំផ្ញើដល់កម្លាំងដែលធ្វើការបើកវគ្គហ្វឹកហ្វឺនក្នុងថ្ងៃនេះ ត្រូវតែយកចិត្តទុកដាក់សិក្សារៀនសូត្រ ដើម្បីទទួលបានលទ្ធផលល្អដូចកម្លាំងបិទវគ្គនាពេលនេះ។
លោកឧត្តមសេនីយ៍ទោ សេង ធារិន បានបន្តថា សិក្ខាកាមបើកវគ្គថ្មីនេះ ត្រូវយកចិត្តទុកដាក់គោរពវិន័យ មានសីលធម៌ល្អ មានសាមគ្គីឯកភាពគ្នា ខិតខំប្រឹងប្រែងក្នុងការរៀនសូត្រ ដើម្បីទទួលលទ្ធផលបានល្អប្រសើរគ្រប់ៗគ្នា ត្រូវគោរពច្បាប់រដ្ឋធម្មនុញ្ញ ច្បាប់លក្ខន្តិក:កងយោធពលខេមរភូមិន្ទ យកចិត្តទុកដាក់ខិតខំក្រេបជញ្ជក់ចំណេះដឹងពីគ្រូ ដើម្បីយកទៅអនុវត្តនៅអង្គភាពឲ្យបានល្អ ការហ្វឹកហ្វឺនកងទ័ព ជាវិស័យអាទិភាពមួយ នៃការកែទម្រង់ របស់កងយោធពលខេមរភូមិន្ទ សំដៅធ្វើទំនើបកម្ម និងបង្កើនសមត្ថភាព ដេីម្បីការពារបូរណភាពទឹកដី ការពារសន្តិភាព ការពាររាជរដ្ឋាភិបាលស្របច្បាប់ ការពារសន្តិសុខ និងសណ្ដាប់ធ្នាប់សាធារណៈ ក៏ដូចជាការអភិវឌ្ឍន៍លើគ្រប់វិស័យនៅកម្ពុជា។
លោកបន្ថែមថា បច្ចុប្បន្នការងារហ្វឹកហ្វឺនបានដើរតួនាទីជាយុទ្ធសាស្ត្រយ៉ាងសំខាន់ ក្នុងការពង្រឹងខឿនការពារជាតិ តាមរយៈការផ្ដល់នូវចំណេះដឹង និងចំណេះធ្វើពិតប្រាកដឱ្យដល់កងទ័ព ជាពិសេសយោធិនដែលមានវ័យក្មេង ដែលជាប្រភពបន្តវេនជំនាន់ក្រោយ។ ត្រូវចូលរួមថែរក្សាសុខសន្តិភាព មិនអនុញ្ញាតឱ្យជនណា ឬក្រុមណាមកបំផ្លាញសុខសន្តិភាពបានឡើយ ត្រូវរក្សាសាមគ្គីភាព និងស្មោះត្រង់ជានិច្ចជាមួយប្រមុខរាជរដ្ឋាភិបាល គាំទ្ររាជរដ្ឋាភិបាលគ្រប់ពេលវេលា យើងមានសន្តិភាពមកដល់ពេលនេះ ដោយការសាមគ្គីភាព ឯកភាពគ្នា និងការស្មោះត្រង់ និងត្រូវពង្រឹងពង្រីកការងារការកសាងធនធានមនុស្ស និងការកសាងអង្គភាពរបស់ខ្លួន។
លោកឧត្តមសេនីយ៍ទោ សេង ធារិន បានប្រកាសបិទវគ្គហ្វឹកហ្វឺន និងបើកវគ្គហ្វឹកហ្វឹនចាប់ពីពេលនេះតទៅ បានប្រគល់ថវិការបស់លោកឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ ចំនួន២,០០០,០០០រៀល៕
