(ភ្នំពេញ)៖ ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍​កម្ពុជា បានជួបជាមួយថ្នាក់ដឹកនាំក្រុមហ៊ុនផលិតកង់ XDS Bicycle ដើម្បីផ្តល់កិច្ច​អន្តរាគមន៍នានា ជួយឱ្យច្រវាក់ផលិតកម្មរបស់ក្រុមហ៊ុនកាន់តែល្អប្រសើរ។

ក្នុងខែតុលា និងវិច្ឆិកា លោកឧបនាយករដ្ឋមន្ត្រី ស៊ុន ចាន់ថុល បានជួបថ្នាក់ដឹកនាំ​ក្រុមហ៊ុននេះចំនួន៣លើកហើយ។ មួយលើកធ្វើឡើងនៅទីតាំងក្រុមហ៊ុនធំក្នុង​ប្រទេស​ចិន និងពីរលើកជួបនៅកម្ពុជា។

ក្នុងជំនួបជាមួយលោកឧបនាយករដ្ឋមន្ត្រី ស៊ុន ចាន់ថុល នាព្រឹកថ្ងៃទី២៣ ខែវិច្ឆិកា ឆ្នាំ២០២៣នេះ លោកស្រី Chuqiao Li អនុប្រធានក្រុមហ៊ុន SHENZHEN XIDESHENG Bicycle Co., Ltd. បានស្នើសុំឱ្យមានការសម្របសម្រួលពីក្រុម​ប្រឹក្សាអភិវឌ្ឍន៍កម្ពុជា និងក្រសួង-ស្ថាប័នពាក់ព័ន្ធ លើគោលបំណងដែលក្រុមហ៊ុន​ចង់​បញ្ជូនបុគ្គលិកជំនាញពីកម្ពុជាទៅទទួលវគ្គបណ្ដុះខ្លី នៅទីស្នាក់ការកណ្តាល​របស់ក្រុមហ៊ុន ក្នុងទីក្រុងសិនជិន ប្រទេសចិន។ លោកស្រី ក៏បានស្នើសុំកិច្ចអន្តរាគមន៍លើបញ្ហាមួយចំនួនទៀត ពាក់ព័ន្ធការវិនិយោគរបស់ខ្លួន។

ក្នុងជំនួបនោះ លោកឧបនាយករដ្ឋមន្ត្រី ស៊ុន ចាន់ថុល បានជម្រាបជូនក្រុមហ៊ុន​អំពីកិច្ចខិតខំប្រឹងប្រែង និងការយកចិត្តទុកដាក់របស់ប្រមុខរាជរដ្ឋាភិបាលកម្ពុជា​ក្នុងកិច្ចសម្របសម្រួលដោះស្រាយបញ្ហាប្រឈមនានា ដែលវិនិយោគិនបានជួបប្រទះ សំដៅធ្វើយ៉ាងណារក្សាឱ្យបានសកម្មភាពវិនិយោគដែលមានស្រាប់ និងជំរុញឱ្យក្រុម​ហ៊ុន​អាចពង្រីកខ្សែច្រវាក់ផលិតកម្មរបស់ខ្លួនបន្ថែមនៅកម្ពុជា។

ក្រុមហ៊ុនផលិតកង់ XDS បានចាប់ផ្ដើមប្រតិបត្តិការរបស់ខ្លួននៅកម្ពុជាតាំងពីឆ្នាំ២០១៩ លើការដំឡើង និងនាំចេញប្រភេទកង់ផ្សេងគ្នាទៅកាន់ទីផ្សារសំខាន់ៗរួមមានសហរដ្ឋអាមេរិក និងសហភាពអ៊ឺរ៉ុបជាដើម។ ក្រុមហ៊ុននេះមានទីតាំងស្ថិតក្នុងតំបន់សេដ្ឋកិច្ចពិសេស ឈីលូ ជាន ពុ ចាយ ក្នុងខេត្តស្វាយរៀង ដែលមានទុនវិនិយោគប្រមាណ ១៩លាន​ដុល្លារ និងបានបង្កើតការងារជូនប្រជាពលរដ្ឋប្រមាណ ១.៦០០កន្លែង។

លោកឧបនាយករដ្ឋមន្ត្រី ស៊ុន ចាន់ថុល ធ្លាប់បានបង្ហាញបំណងរៀបចំព្រឹត្តិការណ៍​ជិះកង់​នៅខេត្តសៀមរាប ជាមួយថ្នាក់ដឹកនាំក្រុមហ៊ុន ដើម្បីផ្សព្វផ្សាយផលិតផលកង់របស់ក្រុមហ៊ុន៕