(ភ្នំពេញ)៖ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបគណៈប្រតិភូបណ្ឌិត្យសភានគរបាលកម្ពុជា ដែលដឹកនាំដោយនាយឧត្តមសេនីយ៍សាស្រ្តាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា និងគណៈប្រតិភូនៃបណ្ឌិត្យសភានគរបាលកម្ពុជា សរុបប្រមាណ ១៧រូប។
ជំនួបនេះបានធ្វើឡើងនៅថ្ងៃទី២២ ខែវិច្ឆិកា ឆ្នាំ២០២៣ នៅទីស្តីការក្រសួងសុខាភិបាល។
លោកសាស្ត្រាចារ្យ ឈាង រ៉ា បានស្វាគមន៍យ៉ាងកក់ក្តៅជូនចំពោះ នាយឧត្តមសេនីយ៍សាស្ត្រាចារ្យ និងគណៈប្រតិភូនៃបណ្ឌិត្យសភានគរបាលកម្ពុជា។
ជាមួយគ្នានេះលោកសាស្ត្រាចារ្យរដ្ឋមន្ត្រី បានចែករំលែក និងផ្លាស់ប្តូរបទពិសោធន៍អំពីការដឹកនាំស្ថាប័ន ជូនដល់គណៈប្រតិភូបណ្ឌិត្យសភានគរបាលកម្ពុជា ក៏ដូចជាបានពិភាក្សាអំពីលទ្ធភាពនៃកិច្ចសហប្រតិបត្តិការ រវាងក្រសួងសុខាភិបាល និងបណ្ឌិត្យសភានគរបាលកម្ពុជាផងដែរ។
ទន្ទឹមនឹងនោះនាយឧត្តមសេនីយ៍មានមោទនភាព និងសូមកោតសរសើរយ៉ាងក្រៃលែងក្នុងការដឹកនាំរបស់ លោកសាស្ត្រាចារ្យរដ្ឋមន្ត្រី លើវិស័យ សុខាភិបាលក្នុងអាណត្តិទី៧ នីតិកាលនៃរដ្ឋសភា ក្នុងការចូលរួមចំណែកអភិវឌ្ឍហេដ្ឋារចនាសម្ព័ន្ធ និងពង្រឹងគុណភាពសុខាភិបាល ក្នុងការដោះស្រាយបញ្ហាសុខភាពសាធារណៈ និងលើកកម្ពស់សុខភាព និងសុខុមាលភាពសម្រាប់ប្រជាជនកម្ពុជា។
ក្នុងឱកាសនេះដែរ លោកនាយឧត្តមសេនីយ៍បានគោរពអញ្ជើញ លោកសាស្ត្រាចារ្យរដ្ឋមន្ត្រី ជាវាគ្មិនកិត្តិយសធ្វើបាឋកថាចែករំលែកចំណេះដឹងល្អៗ និងបទពិសោធន៍ដ៏ប៉ិនប្រសប់ទាក់ទង់នឹងការធ្វើកំណែទម្រង់ និងទំនើបកម្មវិស័យសុខាភិបាល ជូនដល់ថ្នាក់ដឹកនាំ សាស្ត្រាចារ្យ គ្រូនគរបាលជាតិ មន្ត្រី និស្សិត សិក្ខាកាម និងសិស្សនគរបាលនៃបណ្ឌិតសភានគរបាលកម្ពុជា។
លោកសាស្ត្រាចារ្យរដ្ឋមន្ត្រី បានថ្លែងអំណរគុណដល់បណ្ឌិត្យសភានគរបាលកម្ពុជា ជាពិសេសនាយឧត្តមសេនីយ៍សាស្ត្រាចារ្យ ដែលបានបញ្ជាក់ជំហរគាំទ្ររួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខា ភិបាល ក្នុងការលើកកម្ពស់សុខុមាលភាពរបស់ប្រជាពលរដ្ឋ ស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕
