(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី២០ ខែវិច្ឆិកា ឆ្នាំ២០២៣នេះបានថ្លែងបញ្ជាក់ថា នៅឆ្នាំ២០២៤ខាងមុខនេះ សម្តេចបានដាក់ចេញគោលដៅកំណែទម្រង់រដ្ឋបាលសាធារណៈ ដោយតម្រូវឱ្យគ្រប់ក្រសួងស្ថាប័នទាំងអស់ ពិនិត្យមើលឡើងវិញ នូវចរនាសម្ព័ន្ធផ្ទៃក្នុង រួមមានការអនុវត្តតួនាទី ភារកិច្ច ធ្វើយ៉ាងណាកុំឱ្យមានការជាន់គ្នា។

ជាមួយគ្នានេះ ចំពោះការអនុវត្តការងារ សម្តេចនាយករដ្ឋមន្ត្រីបានជំរុញឱ្យក្រសួងស្ថាប័នចេះសហការគ្នា មានមេបញ្ជាការតែមួយ គឺជារឿងសំខាន់ដែលជំរុញឱ្យការងារមានប្រសិទ្ធភាព ទទួលបានលទ្ធផលល្អ។

ការលើកឡើងរបស់សម្តេចនាយករដ្ឋមន្ត្រី ធ្វើឡើងក្នុងឱកាសអញ្ជើញ ប្រកាសដាក់ឱ្យអនុវត្តកម្មវិធី​នយោបាយអាទិភាព ពាក់ព័ន្ធវិស័យកសិកម្ម នាព្រឹកថ្ងៃទី២០ ខែវិច្ឆិកា ឆ្នាំ២០២៣ នៅក្រសួងកសិកម្ម។

សម្តេចនាយករដ្ឋមន្ត្រីបានថ្លែងថា «ការសម្រួចជាមួយគ្នាឱ្យមេបញ្ជាការរួម គឺសំខាន់ តែមានមេទ័ពច្រើនពិបាក [...] កិច្ចការសំខាន់ត្រូវពង្រឹងយន្តការរបស់យើង គឺស្ថាប័នថ្នាក់ជាតិថ្នាក់ក្រោមជាតិធ្វើយ៉ាងឱ្យមានប្រសិទ្ធភាព។ ដៃគូតែមួយ ច្រកចេញចូលតែមួយ ទៅនិយាយជាមួយតែមួយ វិស័យឯកជនក៏មានតំណាងតែមួយ កសិករក៏មានសហគមន៍ រដ្ឋាភិបាលក៏មានតំណាងតែមួយ ដែលធ្វើការរួមគ្នាសម្របសម្រួលគ្នា ដាក់ចេញទិសដៅតែមួយ»។

សម្តេចបានថ្លែងទៀតថា «បន្តិចទៀតអាណិត្តថ្មីនេះ នៅឆ្នាំ២០២៤ គឺខ្ញុំដាក់គោលដៅកំណែទម្រង់រដ្ឋបាលសាធារណៈនេះ គឺគ្រប់ក្រសួងទាំងអស់ត្រូវពិនិត្យឡើងវិញ ចរនាសម្ព័ន្ធផ្ទៃក្នុង ពិនិត្យតួនាទីភារកិច្ច ព្រោះកន្លែងខ្លះអាចជាន់គ្នា ឧទាហរណ៍ក្រសួងកសិកម្ម នាយកដ្ឋានស្រាវជ្រាវអាចជាន់គ្នាជាមួយ CARDI (វិទ្យាស្ថាន​ស្រាវជ្រាវ និង​អភិវឌ្ឍន៍​កសិកម្ម​កម្ពុជា) យើងពង្រឹងមួយណាទុកមួយណា តួនាទីយ៉ាងម៉េច? ឧទាហរណ៍ ធនធានទឹក អភិវឌ្ឍន៍ជនបទ ជាន់គ្នាយ៉ាងម៉េច? រ៉ែ និងថាមពល និងធនធានទឹក នរណាគេគ្រប់គ្រងខ្សាច់ ? ពេលខ្លះត្រូវមើលបញ្ហានេះឡើងវិញ»។

សម្តេចបានលើកឡើងទៀតថា ការគិតសរសេរ និងដាក់ចេញក្របខណ្ឌគោលយោបាយសំខាន់ហើយ ប៉ុន្តែអ្វីដែលសំខាន់បំផុតនោះ គឺជាការអនុវត្ត ហើយបរាជ័យ និងជោគជ័យ អាស្រ័យលើការអនុវត្តមានប្រសិទ្ធភាព ឬអត់? ប្រសិនបើអនុវត្តន៍មិនបានល្អបង្កើត ឱ្យមានភាពត្រួតស៉ីគ្នានៃស្ថាប័នថែមទៀត៕