(ភ្នំពេញ)៖ លោក ឡាយ ថារ័ត្ន អនុប្រធានការិយាល័យ វិភាគគម្រោងនិងលើកទឹកចិត្ត នៃអង្គភាពក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC ជាប់ចោទពីបទ វិតិក្រម តាមមាត្រា ៥៩២ និងមាត្រា ៥៩៣ នៃក្រមព្រហ្មទណ្ឌ ប្រព្រឹត្តនៅរាជធានីភ្នំពេញកាលពីខែមេសា ខែឧសភា ឆ្នាំ២០១៦។
បទល្មើសវិតិក្រម កំណត់ការផ្តន្ទាទោសដាក់ពន្ធនាគារពី២ឆ្នាំទៅ៥ឆ្នាំនិងពិន័យជាប្រាក់ពី៤លានរៀលទៅ១០លានរៀល ។
ប៉ុន្តែទោះបីយ៉ាងណា ចៅក្រមជំនុំជម្រះសាលាដំបូងរាជធានីភ្នំពេញ លោក អ៊ី ថារវៈ នៅព្រឹកថ្ងៃទី១៩ ខែសីហានេះ ប្រកាសសាលក្រមផ្តន្ទាទោសលោក ឡាយ ថារ័ត្ន ដាក់ពន្ធនាគារពីរឆ្នាំតែអនុវត្តមួយឆ្នាំប៉ុណ្ណោះ។
ការសម្រេចនេះ ត្រូវបានមជ្ឈដ្ឋានអ្នកច្បាប់មើលឃើញថា តុលាការបានផ្តន្ទាទោសលោក ឡាយ ថារ័ត្ន ដល់កម្រិតអប្បបរមា ពោលគឺកម្រិតទាបបំផុត ហើយផ្តល់ស្ថានសម្រាលទោសមួយឆ្នាំទៀតផង។
នាពេលសវនាការ លោក ឡាយ ថារ័ត្ន បានសារភាពថា ពិតជាបានទទួលយកប្រាក់ចំនួន៩០០ដុល្លារ ពីក្រុមហ៊ុនផលិតសម្ភារកីឡាមួយ ដែលបានស្នើនាំចូលវត្ថុធាតុដើមពីបរទេសប្រាកដមែន។
អង្គភាពប្រឆាំងអំពើពុករលួយ (ACU) ដែលជាអ្នកឃាត់ខ្លួនលោក ឡាយ ថារ័ត្ន រកឃើញថា លោក ឡាយ ថារ័ត្ន បានទាមទារប្រាក់លើសតម្លៃសេវាកំណត់របស់រដ្ឋនៅក្នុងឯកសារ ដែលឆ្លងកាត់ការត្រួតពិនិត្យរបស់ CDC៕
