(បន្ទាយមានជ័យ)៖ លោកទេសរដ្ឋមន្ដ្រី សេរី កុសល​ ​អនុប្រធានទី១អាជ្ញាធរមីន បានដាស់តឿនដល់កងកម្លាំងប្រដាប់អាវុធទាំងអស់ ត្រូវលើកយកបញ្ហាគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម ជាបញ្ហាអាទិភាពសម្រាប់បញ្ជ្រាបដល់ប្រជាពលរដ្ឋ ដើម្បីបញ្ចៀសគ្រោះថ្នាក់សម្រាប់ប្រជាពលរដ្ឋ។

លោកទេសរដ្ឋមន្ដ្រីលើកឡើងដូច្នេះក្នុងជំនួបសំណេះសំណាល់សាកសួរសុខទុក្ខ ជាមួយជនពិការ ដែលរងគ្រោះដោយសារមីន​ នៅរសៀលថ្ងៃទី១៨ ខែសីហា ឆ្នាំ២០១៦នេះ នៅភូមិតាមាំង ឃុំគោករមៀត ស្រុក​ថ្មពក់ ខេត្តបន្ទាយមានជ័យ។ លោកទេសរដ្ឋមន្ដ្រី ក៏បានស្នើដល់មន្ដ្រី CMAC ប្រចាំខេត្តបន្ទាយមានជ័យ ត្រូវពិនិត្យផែនការដោះមីន ដើម្បីបោសសម្អាតមីន និងយុទ្ធភ័ណ្ឌមិនទាន់ផ្ទុះទាំងអស់​។

លោកទេសរដ្ឋមន្ដ្រី ក៏បាននាំយកនូវការផ្តាំផ្ញើសាកសួរសុខទុក្ខដល់បងប្អូនប្រជាពលរដ្ឋ​ពីសំណាក់សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា និងថវិកាជូនប្រជាពលរដ្ឋចូលរួម ១០៥នាក់ ដោយក្នុងនោះម្នាក់ៗទទួលបានថវិកា ២០,០០០រៀល ព្រមទាំងអាជ្ញាធរមូលដ្ឋាន ១០នាក់ ម្នាក់ៗទទួលបាន៤០,០០០រៀល។

លោកទេសរដ្ឋមន្រ្តី ក៏បាន​ផ្ដល់ជូន​គ្រឿងឧបភោគបរិភោគ ដល់ជនពិការដោយសារមីន​ និងពលរដ្ឋដែលមានជីវភាពក្រីក្រលំបាក៥នាក់​ ដោយក្នុងនោះម្នាក់ៗទទួលបានអង្ករ ៥០គីឡូកា្រម មី ១កេស ត្រីខ ១យួរ ទឹកក្រូច១កេស ទឹកផ្លែឈើ១កេស ទឹកត្រី ១យួរ ទឹកស៊ីអ៊ីវ១យួរ ទឹកសុទ្ធកេស និងថវិកា​ ២០០,០០០រៀល។

ជាចុងក្រោយលោក សេរី កុសល បានបន្តដំណើរ​ចុះទៅ​សាកសួរ​សុខទុក្ខ និងនាំយកគ្រឿងឧបភោគបរិភោគ ព្រមទាំងថវិកាទៅចែក​ជនរងគ្រោះដោយសារផ្ទុះមីនកាលពីថ្ងៃ១២ ខែសីហា ឆ្នាំ២០១៦កន្លងទៅ​ ដែលកំពុងសម្រាកព្យាបាលនៅមន្ទីរពេទ្យបង្អែកខេត្ត៕