(ភ្នំពេញ)៖ លោកបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន នៅព្រឹកថ្ងៃទី១៦ ខែវិច្ឆិកា ឆ្នាំ២០២៣នេះ បានធ្វើសន្និសីទសារព័ត៌មានពាក់ព័ន្ធនឹងការទទួលធ្វើជាប្រធាននៃអនុសញ្ញាអូតាវ៉ា ISU-APMBC នៅឆ្នាំ២០២៤ និងកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន (The Siem Reap-Angkor Summit ON A MINE FREE WORLD)។

អនុសញ្ញាអូតាវ៉ា គឺជាអនុសញ្ញាអង្គការសហប្រជាជាតិ (UN) ហើយ​អនុសញ្ញា​អូ​តា​វ៉ា​ មានសមាជិកចំនួន ១៦៤ប្រទេស ​និង​ស្ថាប័ន​អន្តរជាតិ​ដទៃទៀត​ ដោយបានចុះហត្ថលេខា ​និងគាំទ្រលើអនុសញ្ញាអូតាវ៉ានេះ។ អនុសញ្ញាអូតាវ៉ា ជាការអនុសញ្ញាស្តីពីការហាមឃាត់ ការប្រើប្រាស់ ការដឹកជញ្ជូន ការស្តុកទុក និងការផ្ទេរ គ្រាប់មីនប្រឆាំងមនុស្សលោក។

សូមបញ្ជាក់ថា កម្ពុជា បានក្លាយជារដ្ឋភាគីមួយនៃអនុសញ្ញាអូតាវ៉ា ចាប់ពីឆ្នាំ២០០០។ ក្នុងនាមជារដ្ឋភាគី កម្ពុជា បានយកចិត្តទុកដាក់យ៉ាងខ្លាំងលើវិស័យមីន ហើយក៏បាននឹងកំពុងបំពេញកាតព្វកិច្ចរបស់ខ្លួនយ៉ាងសស្រាក់ស្រាំ ព្រមទាំងទទួលបាននូវការវាយតម្លៃខ្ពស់ពីគ្រប់រដ្ឋភាគី៕