(ភ្នំពេញ)៖ អគ្គរដ្ឋទូតឥណ្ឌូនេស៊ីប្រចាំកម្ពុជាថ្មី លោក Santo Darmosumarto ដែលទើបមកកាន់ដំណែងជាអគ្គរដ្ឋទូតឥណ្ឌូនេស៊ីនៅកម្ពុជា នៅចុងឆ្នាំ២០២៣នេះ បាន​លើកឡើងថា ស្ថានទូតឥណ្ឌូនេស៊ី នឹងខិតខំរួមគ្នា ដើម្បីជំរុញកំណើនភ្ញៀវទេសចររវាង កម្ពុជា និងឥណ្ឌូនេស៊ី ឱ្យកាន់តែប្រសើរឡើង ដែលជាការធ្វើឱ្យប្រទេសឥណ្ឌូនេស៊ីកាន់តែជិតស្និទ្ធជាមួយប្រជាជនកម្ពុជា ខណៈ​ក្នុងឆ្នាំ២០២៣នេះ ភ្ញៀវទេសចររបស់ឥណ្ឌូនេស៊ី ដែលមកដើរកម្សាន្តនៅប្រទេសកម្ពុជា ស្ថិតក្នុងលេខរៀងទី៧ ក្នុងចំណោមភ្ញៀវបរទេសដែលមកទស្សនានៅកម្ពុជាច្រើនជាងគេ។

ក្នុងកិច្ចសម្ភាសជាមួយអ្នកសារព័ត៌មាន លោក Santo Darmosumarto បានឱ្យដឹងថា ក្រៅឥណ្ឌូនេស៊ីបានផ្សព្វផ្សាយពីតំបន់ទេសចរណ៍ជាច្រើនរបស់ឥណ្ឌូនេស៊ីឱ្យប្រជាជនកម្ពុជាបានស្គាល់ ឥណ្ឌូនេស៊ីក៏បានផ្សព្វផ្សាយពីកម្ពុជាទៅកាន់ប្រជាជនឥណ្ឌូនេស៊ីផងដែរ តាមរយៈបណ្តាញសង្គម ​ដោយបង្ហាញពីប្រទេសកម្ពុជា ជាប្រទេសដែលមានសុខសន្តិភាព ប្រជាជនមានភាពរួសរាយរាក់ទាក់ ដែលធ្វើឱ្យប្រជាជនឥណ្ឌូនេស៊ី ចង់មកដើរ​កម្សាន្ត, ស្វែងយល់ពីបរិយាកាសវិនិយោគ និងការបំពេញនៅការងារនៅកម្ពុជាជាដើម។

លោកបន្តថា «ជាច្រើនឆ្នាំមកហើយ ដែលស្ថានទូតឥណ្ឌូនេស៊ីប្រចាំកម្ពុជា បានរៀបចំកម្មវិធីជាច្រើនដើម្បីបង្ហាញអំពីប្រទេសនេស៊ី។ ជាក់ស្តែង​នៅឆ្នាំនេះ ស្ថានទូតឥណ្ឌូនេស៊ីបានរៀបចំពិព័រណ៍ពាណិជ្ជកម្ម និងទេសចរណ៍នៅទីក្រុងភ្នំពេញ។​
យើងក៏គ្រោងរៀបចំកម្មវិធីនេះ នៅឆ្នាំក្រោយផងដែរ នៅក្នុងខែកញ្ញា ដែលទាក់ទងនឹងការផ្សព្វផ្សាយពីប្រទេសឥណ្ឌូនេស៊ី និងសកម្មភាពផ្សេងៗទាក់ទងនឹងការសហការគ្នាលើ វិស័យអប់រំ យុវជន និងវិស័យជំនួញ។ហើយជាមួយគ្នានេះដែរ ឥណ្ឌូនេស៊ីក៏នឹងផ្សព្វផ្សាយពីប្រទេសកម្ពុជាទៅកាន់ប្រទេសឥណ្ឌូនេស៊ីផងដែរ។ ដូច្នេះហើយ គឺយើងធ្វើទាំងពីរ គឺផ្សព្វផ្សាយពីឥណ្ឌូនេស៊ីនៅកម្ពុជា និងផ្សព្វផ្សាយពីកម្ពុជាទៅកាន់ឥណ្ឌូនេស៊ី​។
យើងឃើញថា ប្រទេសកម្ពុជាមានភាពល្បីល្បាញកាលពីឆ្នាំមុន ក្នុងពេលដែលកម្ពុជាធ្វើជាប្រធាននៃកិច្ចប្រជុំកំពូលអាស៊ាន ហើយកម្ពុជាបានដឹកនាំកិច្ចប្រជុំនេះបានយ៉ាងល្អ ក្នុង​ស្ថានភាពមួយដែលលំបាក ដោយទើបតែបានធូរស្រាលពីការរីករាលដាលនៃជំងឺកូវីដ។​នេះហើយគឺជាភាពជោគជ័យមួយ ដែលដក់ជាប់ក្នុងចិត្តរបស់ប្រជាជនឥណ្ឌូនេស៊ី»។

ជាមួយគ្នានេះ លោកលើកទឹកដល់ប្រជាជនកម្ពុជាទៅទស្សនានៅឥណ្ឌូនេស៊ី ជាពិសេសកោះស៊ូម៉ាត្រាខាងសិច ព្រោះទីតាំងភូមិសាស្រ្ត​នៃកោះនេះ មានភាពស្រស់ស្អាត និងមានវប្បធម៌ចម្រុះជាច្រើន។​ ចំណែកម្ហូបប្រចាំតំបន់វិញ ក៏មាន​រសជាតិ​ស័ក្កសមនឹង ​ប្រជាជនកម្ពុជា ​ងាយស្រួលក្នុងការទទួលទានបាន។

​ជាមួយគ្នានេះ ប្រទេសទាំងពីរសុទ្ធតែគ្រប់គ្រងស្ថានភាពរីករាលដាលជំងឺកូវីដបានល្អ។ជាក់ស្តែងនៅផាដាង ក៏ដូចជានៅកម្ពុជា ប្រជាជនលែងពាក់ម៉ាសទៀត​​ ដូច្នេះហើយ ប្រជាជននៃប្រទេសទាំងពីរអាចធ្វើដំណើរទៅមកបាន។ ទន្ទឹមគ្នានេះ លោកលើកឡើងថា​ ចាប់ពីឆ្នាំនេះទៅ បន្ទាប់កំណើនសេដ្ឋកិច្ចរបស់ប្រទេសទាំងពីរ​ចាប់ផ្តើម​បង្ហាញពីនិន្នាការកើនឡើង ​ប្រជាជនប្រទេសទាំងពីរនឹងមានលទ្ធភាពធ្វើដំណើរទៅប្រទេសផ្សេងទៀត ​ក្នុងទិសដៅទៅដើរកម្សាន្ត។ ​ហើយឥណ្ឌូនេស៊ី អាចជាជម្រើសល្អមួយសម្រាប់ការដើរកម្សាន្តរបស់ប្រជាជនកម្ពុជា និងកម្ពុជាអាចក្លាយជាទិសដៅដើរកម្សាន្តរបស់ប្រជាជនឥណ្ឌូនេស៊ីផងដែរ។

ឆ្លើយតបនឹងសំណួរ តើថាឥណ្ឌូនេស៊ីនឹងជំរុញការភ្ជាប់ជើងហោះហើរ ពីទីក្រុងផាដាងនៃខេត្តស៊ូម៉ាត្រាខាងលិច​មកទីក្រុងភ្នំពេញ និងសៀមរាបដែរឬទេ? លោក Santo បានគូសបញ្ជាក់យ៉ាងដូច្នេះថា «នៅពេលយើងគិតអំពីការភ្ជាប់ទំនាក់ទំនងទេសចរណ៍រវាងប្រទេសទាំងពីរ យើងមិនមែនផ្តោតតែទៅលើថាតើតំបន់ទេសចរណ៍នៃប្រទេសទាំងពីរមានភាពស្រស់ស្អាត និងមានការចាប់អារម្មណ៍ប៉ុណ្ណានោះទេ តែក៏គិតពីហេដ្ឋារចនាសម្ព័ន្ធល្អ ជាពិសេសការតភ្ជាប់ជើងហោះហើរ។ ព្រលានយន្តហោះអន្តរជាតិ គឺពិតជាមានសារសំខាន់ខ្លាំងណាស់ ដែលជាការវិនិយោគ ដ៏ល្អបំផុតសម្រាប់វិស័យទេសចរណ៍។ វាចូលរួមកាត់បន្ថយការចំណាយ ដូចជាការផ្តល់នូវភាពងាយស្រួលក្នុងការទៅមកនៃភ្ញៀវទេសចរ។ សម្រាប់ព្រលានយន្តសៀមរាបថ្មី ពិតជាមានទំហំធំមែនទែន ដែលអាចអនុញ្ញាតឱ្យយន្តហោះប្រភេទធំៗអាចចុះចត យ៉ាងងាយស្រួល បើធៀបនឹងព្រលានចាស់ដែលមានទំហំតូច។ អីចឹងហើយវាមានភាពអំណោយផលដែលទាក់ទាញមនុស្សជាច្រើនមកកម្សាន្តនៅប្រទេសកម្ពុជា។»

បើតាម អគ្គរដ្ឋទូតឥណ្ឌូនេស៊ីប្រចាំកម្ពុជារូបនេះ ​ ​ចាប់​ពីខែមករា ដល់ខែវិច្ឆិកានេះ ឆ្នាំ២០២៣នេះ ប្រជាជន​កម្ពុជាប្រមាណ ​៩៣០០នាក់ បានទៅលេងប្រទេសនេស៊ី ហើយរំពឹងថា រហូតដំណាច់ឆ្នាំនេះ នឹងមានរហូតជាង១០ ០០០នាក់។ លោកថា ចំនួននេះ តិចតួចនៅឡើយទេ បើធៀបនឹងមុនការរីករាលដាលជំងឺកូវីដ១៩ មានរហូតដល់១៣០០០នាក់ ហើយសង្ឃឹមថា នៅពេលដែលសេដ្ឋកិច្ចកាន់តែប្រសើរ អ្នកទៅទស្សនានៅឥណ្ឌូនេស៊ី និងកើនឡើងដល់ប្រមាណ៣ម៉ឺននាក់។

លោក តុប សុភ័ក រដ្ឋលេខាធិការ និងអ្នកនាំពាក្យក្រសួងទេសចរណ៍កម្ពុជា បានប្រាប់បណ្តាញព័ត៌មាន Fresh News នៅថ្ងៃទី១៥ ខែវិច្ឆិកា ឆ្នាំ២០២៣នេះថា កាលពីឆ្នាំ២០២២ កម្ពុជាទទួលបានភ្ញៀវទេសចរឥណ្ឌូនេស៊ី ​ចំនួន ៧៥ ៥៦៣នាក់ ​កើនឡើង ៧៩៩.៦%។ ចំណែករយៈពេល១០ខែ ឆ្នាំ២០២៣នេះ ភ្ញៀវទេសចរឥណ្ឌូនេស៊ីមកកម្សាន្តនៅកម្ពុជាចំនួន ១០៤ ២២៤នាក់ ​កើនឡើង ៧៦.៣% បើធៀបនឹងរយៈពេលដូចគ្នា កាលពីឆ្នាំមុន។

លោកបន្ថែមថា ភ្ញៀវទេសចរឥណ្ឌូនេស៊ី គឺជាទីផ្សារមួយដ៏សំខាន់សម្រាប់កម្ពុជា​ ដោយបានចូលរួមចំណែកប្រមាណ៣%សម្រាប់ទីផ្សារទេសចរណ៍នៅកម្ពុជា។

លោកបន្តថា «បើយើងមើលនៅក្នុងទីផ្សារសំខាន់ៗទាំង១០ ដែលធ្វើដំណើរមកដល់កម្ពុជា ឥណ្ឌូនេស៊ីគឺស្ថិតនៅក្នុងលំដាប់ទី៧ គឺបន្ទាប់ពីភ្ញៀវកូរ៉េ។ ពោល​ទី១. គឺថៃ ទី២.វៀតណាម ទី៣.ចិន ទី៤ ទី៤.ឡាវ ទី៥. អាមេរិកាំង ទី៦.កូរ៉េ និងទី៧.គឺឥណ្ឌូនេស៊ី។ ​ភ្ញៀវទេសចរឥណ្ឌូនេស៊ីបានរួមចំណែកនៅក្នុងទីផ្សារប្រមាណជិត៣%ដែរ។»

លោកបានឱ្យដឹងបន្ថែមថា ភ្ញៀវទេសចរឥណ្ឌូនេស៊ីមកកម្សាន្តនៅកម្ពុជា ភាគច្រើនមកកម្សាន្ត នៅរាជធានីភ្នំពេញ និងខេត្តសៀមរាប។ លោកលើកឡើងថា ប្រសិនបើមានការតភ្ជាប់ជើងហោះហើរត្រង់ពីទីក្រុងផាដាង ពីឥណ្ឌូនេស៊ីមកកាន់មកកម្ពុជា មិនថាការភ្ជាប់ជើងហោះហើរមកព្រលានយន្តហោះភ្នំពេញអន្តរជាតិ ឬព្រលានយន្តហោះសៀមរាបអង្គរនោះទេ នោះនឹងជំរុញការទាក់ទាញភ្ញៀវទេសចរបានកាន់តែច្រើនបន្ថែមទៀត៕