(ភ្នំពេញ)៖ បុគ្គ​លិកមន្ត្រីជាប់កិច្ច​សន្យា អង្គភាពអគ្គិ​សនីបំភ្លឺផ្លូវសាធារណៈនៃមន្ទីសាធារណការ និងដឹកជញ្ជូនរាជធានីភ្នំពេញ ៨នាក់ តំណាងឲ្យ២១​នាក់ ដែលដឹកនាំដោយឈ្មោះ​ ប៉ោ​ គុណរ៉ា បានដាក់ញត្តិ នៅខុទ្ទកាល័យ​ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជានៅវេលាម៉ោង៨៖៤០នាទី ថ្ងៃទី១៨ ខែសីហា ឆ្នាំ២០១៦ ស្ថិតនៅចំណុចដើមពោធិ៍ វត្តបទុមវត្តី ផ្លូវស៊ូស្រ៊ុន​ សង្កាត់ចតុមុខ ខណ្ឌដូនពេញ​។  

ការដាក់ញត្តិនេះ គឺធ្វើឡើង ក្នុង​គោលបំណង​ស្នើសុំសម្តេចតេជោ ហ៊ុន សែន អន្តរាគមន៍ទុកអង្គភាពអគ្គិសនីបំភ្លឺផ្លូវសាធារណៈ ឲ្យស្ថិតនៅក្រោមការគ្រប់គ្រង របស់មន្ទីសាធា​រណការ និងដឹកជញ្ជូន រាជធានីភ្នំពេញ នៅដដែល ដែលអាចឲ្យពួកអាចបន្តការងារដូចដើម។

ការស្នើសុំរបស់ ក្រុមបុគ្គ​លិកមន្ត្រីជាប់កិច្ច​សន្យា អង្គភាពអគ្គិ​សនីបំភ្លឺផ្លូវសាធារណៈ​ នៃមន្ទីសាធារណការ នឹងដឹកជញ្ចូនរាជធានីភ្នំពេញខាងលើនេះ បានធ្វើឡើង ក្រោយពីសាលារាជធានីភ្នំពេញ បា​នកាត់ពួកគាត់ឲ្យទៅបំរើការងារ នៅអង្គភាពលូទឹកស្អុយវិញ។

យ៉ាងណាក៏ដោយ ក្រោយ​ពីមានការណែនាំពី តំ​ណាងខុទ្ទកាល័យឲ្យទៅធ្វើ​ញត្តិម្តងទៀតព្រោះញត្តិខុស​ ពួកគាត់បានរំសាយត្រឡប់ទៅវិញ ហើយនៅម៉ោង៩៖១៥នាទីដដែលនេះ បានវិលត្រឡប់មកដាក់ញត្តិនេះ ជាថ្មីម្តងទៀត ក្រោយពេលដែលកែសម្រួលហើយ៕