(កណ្ដាល)៖ នាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរង នៃកងយោធពលខេមភូមិន្ទ និងជាមេបញ្ជាការ បញ្ជាការដ្ឋានអង្គរក្ស បានអះអាងថា «ភារកិច្ចរបស់អង្គរក្ស គឺ​មានតួនាទីការពារសន្តិសុខ​ សុវត្ថិភាពជូនប្រមុខរាជរដ្ឋាភិបាល​ ថ្នាក់ដឹកនាំកំពូលៗ​ ទាំងថ្នាក់ដឹកនាំជាតិ​ និង​អន្តរជាតិ​ ដែលមកបំពេញទស្សនកិច្ចផ្លូវរដ្ឋ​ លើទឹកដីនៃ​កម្ពុជា​យើង»

ការលើកឡើងរបស់នាយឧត្តមសេនីយ៍ បែបនេះធ្វើឡើងក្នុងពិធីជួបសំណេះសំណាល និងផ្តល់បទឧទ្ទេសនាម ជាមួយសមណសិស្ស-និស្សិត ព្រមទាំងនិស្សិតបញ្ញវន្ត១០៧៤អង្គនាក់ ក្រោមប្រធានបទ «ស្តីពីតួនាទី និងភារកិច្ចរបស់បញ្ជាការដ្ឋានអង្គរក្ស» ស្ថិតក្នុងបញ្ជាការដ្ឋានអង្គរក្ស ក្រុងតាខ្មៅ ខេត្តកណ្តាល នៅថ្ងៃទី១៧ ខែសីហា ឆ្នាំ២០១៦នេះ។

ការប្រារព្ធពិធីនេះ ឡើងដោយមានការចង់ដឹង និងសិក្សាស្រាវ របស់សមណសិស្ស-និស្សិត​ និង​បញ្ញវន្តដែលមកពី​ភ្នំពេញ​ និងខេត្តស្វាយរៀង​ ដើម្បីមកដកស្រង់បទពិសោធន៍ ក៏ដូចជាសិក្សាស្វែងយល់ពីតួនាទី​ និង​ភារកិច្ចរបស់បញ្ជាការដ្ឋានអង្គរក្ស។

នាយឧត្តមសេនីយ៍ ហ៊ីង ប៊ុនហៀង បានបញ្ជាក់ផងដែរថា កម្លាំងអង្គរក្សមានតួនាទីយ៉ាងសំខាន់ ក្នុងការ​ការពា​រ​ បូរណភាពទឹកដី ជាក់ស្តែងកាលពីឆ្នាំ២០០៨​ កន្លងទៅ​ នៅពេលស្ថានការប៉ះទង្គិចដោយអាវុធ នៅតាមបណ្តោយព្រំំដែន ប្រាសាទព្រះវិហារ​ ​ពេលនោះ​កម្លាំងអង្គរក្ស បាន​​ប្រយុទ្ធការពារ​ និង​ជាកម្លាំងអន្តរាគមន៍រហ័ស​ សង្គ្រោះនៅតំបន់ជួមុខប្រាសាទព្រះវិហារ​ ប្រាសាទតាមាន់​ ប្រាសាទតាក្របី​ យ៉ាងអង់អាចក្លាហាន​ ក្នុងបុព្វហេតុ​ការពារជាតិមាតុភូមិ​។

នាយឧត្តមសេនីយ៍បន្ថែមថា ក្រៅពីតួនាទី និងកាតព្វកិច្ចខាងលើនេះ​ កម្លាំងអង្គរក្សបានចូលរួមយ៉ាងសកម្ម ក្នុងការចុះជួយស្ទូងដក​ ធ្វើស្រែ​ចម្ការ​ ជូនចាស់ជរា​ ស្រ្តីមេម៉ាយ​ ដែលខ្វះកម្លាំងពលកម្មជាដើម។​ ក្រោយពីចប់កម្មវិធី ក៏មានការរៀបចំអាហារថ្ងៃត្រង់ ជូនសមណសិស្ស និងនិស្សិត បញ្ញវន្ត​ផងដែរ​៕