(ភ្នំពេញ)៖​ លោក ឡាវ វ៉ាន់ ប្រធានក្រុមការងារគ្រប់គ្រងនិស្សិតក្រៅប្រទេសប្រចាំសាធារណរដ្ឋប្រជាមានិតចិន នៃសមាគមសិស្ស-និស្សិតអាហារូបករណ៍សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត (អ.ម.ត) នាព្រឹកថ្ងៃទី០៧ ខែវិច្ឆិកា ឆ្នាំ២០២៣នេះ​ បានទទួលជំនួបសម្ដែងការគួរសម និងពិភាក្សាការងារជាមួយគណៈប្រតិភូនៃសាកលវិទ្យាល័យ Tongji (ទីក្រុងសៀងហៃ) នៃសាធារណរដ្ឋប្រជាមានិតចិន ដឹកនាំដោយលោក CHEN Yili ប្រធានការិយាល័យនិស្សិតអន្តរជាតិ ក្នុងឱកាសដែលគណៈប្រតិភូនៃសាកលវិទ្យាល័យបំពេញទស្សនកិច្ចការងារនៅកម្ពុជា។

នៅក្នុងជំនួបពិភាក្សាការងារនេះ​ លោក ឡាវ វ៉ាន់ បានសម្តែងការស្វាគមន៍យ៉ាងកក់ក្តៅ និងពាំនាំការថ្លែងអំណរគុណពីសំណាក់លោកជំទាវបណ្ឌិត ពេជ ចន្ទមុន្នី អនុប្រធានអចិន្ត្រៃយ៍សមាគម អ.ម.ត ដល់សាកលវិទ្យាល័យដែលបានបណ្ដុះបណ្ដាល និងយកចិត្តទុកដាក់ដល់និស្សិត អ.ម.ត និងនិស្សិតកម្ពុជា ដែលកំពុងសិក្សានៅសាកលវិទ្យាល័យ Tongji។

លោក​ CHEN Yili បានបញ្ជាក់ថា​ ទស្សនកិច្ចនៅសមាគម​ អ.ម.ត​ លេីកនេះ​ ធ្វេីឡេីងតាមការសន្យាដែលភាគីទាំងពីរបានឯកភាពគ្នាក្នុងឱកាសបេសកកម្មរបស់​ក្រុម​ការងារ​ អ.ម.ត​ ចិន នៅទីក្រុងសៀងហៃ​ កាលពីខែមីនា​ ឆ្នាំ២០២៣។

ភាគីទាំងពីរ​បានឯកភាពបន្តកិច្ចសន្ទនាជិតស្និទ្ធ​ ដេីម្បីជំរុញកិច្ចសហប្រតិបត្តិការរវាងសមាគម​ អ.ម.ត​ និងសាកលវិទ្យាល័យ​ Tongji លេីកិច្ចការអាហារូបករណ៍​ និងកិច្ចការបណ្ដុះបណ្ដាលក្នុងវិស័យផ្សេងៗ​ ដែលជាតម្រូវការអាទិភាពរបស់កម្ពុជា​ ដេីម្បីជាការចូលរួមចំណែកក្នុងការពង្រឹងមូលធនមនុស្ស​ និងការអភិវឌ្ឍសេដ្ឋកិច្ច-សង្គមកម្ពុជា៕