(សៀមរាប)៖ នៅព្រឹកថ្ងៃទី៦ ខែវិច្ឆិកា ឆ្នាំ២០២៣ ជាថ្ងៃដែលសិស្សានុសិស្សនៅទូទាំងប្រទេស ធ្វើការប្រឡងយកសញ្ញាប័ត្របញ្ចប់មធ្យមសិក្សាទុតិយភូមិ។ សម្រាប់ខេត្តសៀមរាប មានមណ្ឌលប្រឡងទាំង ចំនួន១៦មណ្ឌល និងមានសិស្សានុសិស្ស មកពីបណ្តាវិទ្យាល័យនានាក្នុងក្រុង/ស្រុកទាំង១២។
ក្នុងនោះដែរ ក៏មានការអញ្ជើញចូលរួមបើកកេះវិញ្ញាសារប្រឡងនៅតាមមណ្ឌលប្រឡងក្នុងក្រុងសៀមរាប ក្រោមវត្តមានរបស់លោក ពិត ចំណាន រដ្ឋលេខាធិការក្រសួងអប់រំ យុវជន និងកីឡា និងលោក អ៊ាន ឃុន ប្រធានក្រុមប្រឹក្សាខេត្ត ព្រមទាំងលោក លោកស្រី ជាក្រុមប្រឹក្សាខេត្ត លោក លោកស្រី ជាគណៈអភិបាលខេត្ត នៅតាមមណ្ឌលទាំង ១៦ក្នុងក្រុងសៀមរាបផងដែរ។
យោងតាមការបញ្ជាក់របស់មន្ត្រីនៃមន្ទីរអប់រំ យុវជន និងកីឡាខេត្តសៀមរាប បានឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិទូទាំងខេត្តសៀមរាប ឆ្នាំសិក្សា២០២២-២០២៣នេះ មានចែកចេញជា ១៦មណ្ឌលប្រឡង មាន ៤៣៦បន្ទប់ ដែលមានសិស្សប្រឡងសរុប ១០ពាន់៨១៩នាក់ ស្រី៦ពាន់២៥១នាក់។
ក្នុងនោះដែរ មានបេក្ខជនចំណេះទូទៅ ចំនួន ៩ពាន់៤៦៣នាក់ បេក្ខជនស្វ័យរិនចំណេះទូទៅ ១ពាន់២៣នាក់ ស្រី ៥៦៩នាក់ បេក្ខជនបំពេញវិជ្ជា ១៥៤នាក់ ស្រី៧៧នាក់ បេក្ខជនស្វ័យរិនបំពេញវិជ្ជា ១៧៩នាក់ ស្រី ៨៦នាក់។ ក្នុងនោះដែរ មានថ្នាក់វិទ្យាសាស្ត្រ មាន៥មណ្ឌល មាន១២៩បន្ទប់ បេក្ខជនចំនួន៣ពាន់១៧១នាក់ ស្រី ១ពាន់៩៨៧នាក់ និងថ្នាក់វិទ្យាសាស្ត្រសង្គម មាន១១មណ្ឌល មាន៣០៧បន្ទប់ មានបេក្ខជនចំនួន៧ពាន់៦៤៨នាក់ ស្រី៤ពាន់២៦៤ នាក់។
ដោយឡែក ចំពោះវិញ្ញាសារប្រឡង មាន ១០មុខវិជ្ជា គឺគណិតវិទ្យា ភាសាខ្មែរ គីមីវិទ្យា ភូមិវិទ្យា ប្រវត្តិវិទ្យា ពលរដ្ឋវិទ្យា ផែនដីវិទ្យា រូបវិទ្យា ជីវៈវិទ្យា និងភាសារបរទេស។
ក្នុងពិធីបើកកេះវិញ្ញាសារប្រឡងនោះដែរ លោក ពិត ចំណាន និងលោក អ៊ាន ឃុន ក៏បានណែនាំ និងផ្តាំផ្ញើដល់លោកគ្រូ អ្នកគ្រូ ជាគណៈមេប្រយោគ អនុរក្ស និងក្មួយៗជាបេក្ខជនទាំងអស់ថា ការប្រឡងនេះ ជាការវាស់ស្ទង់នូវ កម្រិត នៃចំណេះដឹងរបស់ក្មួយៗ ដែលត្រូវបានបញ្ចប់ការសិក្សា នៅមធ្យមសិក្សាទុតិយភូមិ និងឈានចូលទៅសិក្សាបន្តនៅមហាវិទ្យាល័យ សកលវិទ្យាល័យផងដែរ។ ម៉្យាងទៀត សូមបេក្ខជនទាំងអស់ គោរពឲ្យបាននូវអង្គការវិន័យផ្ទៃក្នុង នៅពេលប្រឡងឲ្យបានល្អ ដើមី្បធានានូវគុណភាព នៃការបណ្តុះបណ្តាល ធនធានមនុស្ស ដែលមានក្មួយៗបេក្ខជនទាំងនេះហើយ ដែលជាទំពាំងស្នងឬសី្ស នៃប្រទេសជាតិទៅថ្ងៃអនាគត។
សូមបញ្ជាក់ថា នៅមុនពេលបេក្ខជនចូលទៅក្នុងមណ្ឌលប្រឡង អ្នកសារព័ត៌មានយើងបាន សង្កេតឃើញមានការយកចិត្តទុកដាក់ខ្ពស់របស់ក្រុមសហភាពសហព័ន្ធយុវជនកម្ពុជា និងក្រុមគណៈកម្មការ មេប្រយោគ រួមទាំងមន្ត្រី អង្គភាពប្រឆាំងអំពើពុករលួយ បានយកចិត្តទុកដាក់ខ្ពស់ ចំពោះបេក្ខជនចូលប្រឡង គឺមានការឆែកឆេ ក្រែងមានឯកសារលាក់ និងដកហូតនូវឯកសារទាំងនោះ ដោយមានការប្រុងប្រយ័ត្នខ្ពស់ មិនឲ្យឯកសារទាំងនោះហូរ ចូលទៅក្នុងបន្ទប់ប្រឡងបានឡើយ៕
