(ភ្នំពេញ)៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា រាជរដ្ឋាភិបាលថ្មី ប្តេជ្ញារក្សា «គោលនយោបាយចិនមួយ» ដើម្បីធ្វើឱ្យទំនាក់ទំនងដែលរឹងមាំស្រាប់ រវាងកម្ពុជានិងចិន កាន់តែឆ្ពោះឡើងទៅមួយកម្រិតទៀត។

សម្តេចធិបតី ហ៊ុន ម៉ាណែត ថ្លែងបែបនេះពេលឆ្លើយតបនឹងសំណួរអ្នកសារព័ត៌មានចិន ក្នុងបទសម្ភាស​ពិសេស​មួយកំលុងពេលចូលរួមវេទិកាខ្សែក្រវាត់និងផ្លូវ នៅទីក្រុងប៉េកាំង ប្រទេសចិនកាលពីពេលថ្មីៗ​កន្លង​ទៅនេះ។

សម្តេចធិបតី ហ៊ុន ម៉ាណែត បានបញ្ជាក់ថា «ទំនាក់ទំនងរបស់យើង ឬទិសដៅរបស់យើងក្នុងការចូលរួម​គោលនយោបាយជាមួយប្រទេសចិន គឺមានការបន្ត និងភាពជាប់លាប់។ ឆ្នាំនេះ គឺជាខួបលើកទី៦៥ នៃទំនាក់ទំនងការទូតរបស់យើង និងជាឆ្នាំនៃមិត្តភាពកម្ពុជា-ចិន។ នេះស្របនឹងការសន្មត់របស់ខ្ញុំ ក្នុងនាម​ជាប្រមុខរាជរដ្ឋាភិបាលកម្ពុជា គោលដៅរបស់រាជរដ្ឋាភិបាលថ្មី គឺបន្តកសាងទំនាក់ទំនងដ៏ល្អនេះ ដែលមានរយៈពេល៦៥ឆ្នាំ និងស្វែងរកការពង្រីកកិច្ចសហប្រតិបត្តិការ ពង្រឹងជាពិសេស​នៅក្នុងលក្ខខណ្ឌ​នៃការស្វែងរកមធ្យោបាយ ដើម្បីកែលម្អក្របខណ្ឌកិច្ចសហប្រតិបត្តិការត្បូងពេជ្រ (Diamond Hexagons) ដែលត្រូវបានបង្កើតឡើងនៅដើមឆ្នាំនេះ ដោយប្រធានាធិបតី ស៉ី ជីនពីង និងអតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន»។

សម្តេចធិបតី បានបន្តថា «រាជរដ្ឋាភិបាលថ្មី ប្តេជ្ញារក្សាគោលនយោបាយចិនមួយ យើងក៏បានគាំទ្រគំនិត​ផ្តួចផ្តើម ដែលដាក់ចេញដោយប្រធានាធិបតី ស៉ី ជីនពីង មានដូចជាគំនិតផ្តួចផ្តើមអភិវឌ្ឍន៍ពិភពលោក គំនិតផ្តួចផ្តើមសន្តិសុខសកល គំនិតផ្តួចផ្តើមអរិយធម៌សកល រួមទាំងគំនិតផ្តួចផ្តើមខ្សែក្រវាត់​និងផ្លូវផង​ដែរ ដែលនឹងផ្តល់ជាវេទិកាដើម្បីធ្វើឱ្យសកលលោកមានភាពសុខដុមរមនា និងវិបុលភាព»។

«គោលនយោបាយចិនមួយ» ត្រូវបានលើកឡើងដំបូងបង្អស់នៅឆ្នាំ១៩៧២ ក្នុងសេចក្តីប្រកាស​ក្រុងសៀងហៃ រវាងសហរដ្ឋអាមេរិក និងសាធារណរដ្ឋប្រជាមានិតចិន។ ក្នុងសេចក្តីប្រកាសនេះ គោលនយោបាយចិនមួយ ជាគោលជំហររបស់ចិន ដែលអះអាងថាគឺ រដ្ឋាភិបាលចិនតែមួយប៉ុណ្ណោះ។ ក្រោមគោលនយោបាយនេះ សហរដ្ឋអាមេរិកទទួលស្គាល់ និងមានចំណងទំនាក់ទំនងផ្លូវការ​ជាមួយ​សាធារណរដ្ឋប្រជាមានិតចិន ដោយពុំមែនកោះតៃវ៉ាន់ឡើយ៕