(ក្វាងស៊ី, ចិន)៖ ថាមពលអគ្គិសនី គឺជាតម្រូវការដ៏ចាំបាច់សម្រាប់ចិន បម្រើដល់ការអភិវឌ្ឍសេដ្ឋ​កិច្ច​ជាតិ និងលើកបំពេញការប្រើប្រាស់របស់ប្រជាពលរដ្ឋ។ វារីអគ្គិសនី ជាមធ្យោបាយមួយ ដែលចិន​ប្រើ​ទាញ​យកប្រភពថាមពលពលអគ្គិសនីទៅបំពេញសេចក្តីត្រូវការរបស់ខ្លួន។

ក្នុងដំណើរទស្សនកិច្ចរបស់អ្នកសារព័ត៌មានកម្ពុជា និងប្រទេសសមាជិកអាស៊ានដទៃទៀតនោះ នៅក្រុង​គួយកាំង តំបន់ស្វយ័តក្វាងស៊ី ប្រទេសចិន គេបាននាំអ្នកព័ត៌មានបង្ហាញពីគំរូនៃការសាងសង់ទំនប់វារី​អគ្គិសនីមួយដែលមានឈ្មោះថា Datengxia មានចម្ងាយប្រហែល ៦គីឡូម៉ែត្រពីតំបន់ទីក្រុងគួយភីង លាត​សន្ធឹងលើទន្លេ Qianjiang ប្រវែងជាង ១,២០០ម៉ែត្រ មានទ្វារទឹកចំនួន២៦ និងម៉ាស៊ីន​តួប៊ីនបូម​ទឹក​ចំនួន៨។

គម្រោងវារីអគ្គិសនីនេះ បង្ហាញនូវគំនិតវិស្វកម្មវារីអគ្គិសនីដ៏អស្ចារ្យ ដោយក្រុមវិស្វករបានសាងសង់ទំនប់​ទប់​ទន្លេ និងជីកអាងទាញយកទឹកពីទន្លេដើម្បីដំណើរការផលិតថាមពលអគ្គិសនី ប៉ុន្តែវាមិនបានធ្វើឱ្យប៉ះ​ពាល់ដល់ការធ្វើចរាចរណ៍របស់នាវាដឹកទំនិញផ្សេងៗនោះឡើយ។ បន្ថែមពីលើនេះ គម្រោងទំនប់វារីអគ្គិ​សនី ក៏បានផ្តល់អត្ថប្រយោជន៍មហាសាលជាច្រើនទៀត ដូចជាការការពារទឹកជំនន់ ផ្គត់ផ្គត់ប្រភពទឹក​ស្អាត ទាញយកទឹកបម្រើដល់ការដាំដុះ ហើយបង្កើតបានជាតំបន់ទេសចរណ៍យ៉ាងស្រស់ស្អាតថែម​ទៀត។

នៅចំពោះមុខក្រុមអ្នកសារព័ត៌មានអាស៊ាន លោក Wu Xiaolong ប្រធានក្រុមហ៊ុន Guangxi Datengxia Water Conservancy Development Co., Ltd. បានឱ្យដឹងថា គម្រោងទំនប់វារី​អគ្គិសនី Datengxia គឺជាគម្រោងដ៏សំខាន់នៅក្នុងការសាងសង់បណ្តាញទឹកជាតិ នៅក្នុងអាងទន្លេគុជ ដែលរួមបញ្ចូលការគ្រប់គ្រងទឹកជំនន់ ការដឹកជញ្ជូន ការផលិតថាមពល ការចែកចាយធនធានទឹក ប្រព័ន្ធ​ធារាសាស្រ្ត និងអត្ថប្រយោជន៍ធំៗផ្សេងទៀតផងដែរ។ គម្រោងវិនិយោគសរុបមានប្រហាក់ប្រហែលជាង ៤ពាន់លានដុល្លារ ដោយប្រើពេលសាងសង់ ៩ឆ្នាំ ខណៈខែកញ្ញា ឆ្នាំ២០២៣ គម្រោងការងារសាងសង់​សំខាន់ៗ​ត្រូវបានបញ្ចប់លឿនជាងរយៈពេលកំណត់ចំនួន ៤ខែ។

ការងារសំខាន់ៗរបស់គម្រោង Datengxia ដែលគេស្គាល់ថាជា «សារមន្ទីរវិស្វកម្មវារីអគ្គិសនីនេះ» រួម​មាន​ការទប់ទំនប់ទឹក ទ្វារទឹក រោងចក្រអគ្គិសនី ផ្លូវកប៉ាល់ ក៏ដូចជាប្រព័ន្ធធារាសាស្រ្ត និងការបង្ហូរទឹក​ចេញ​​ចូល ក៏ដូចជាទុកសម្រាប់ច្រកចេញចូលរបស់មច្ឆជាតិជាដើម។ ទន្ទឹមនោះ ដើម្បីបង្កើនប្រសិទ្ធភាព​នៃការរុករក និងបង្កើនអត្ថប្រយោជន៍នៃការដឹកជញ្ជូន វាចាំបាច់ក្នុងការកសាង «ច្រកទ្វារដ៏ទំនើប» មួយ។

គម្រោង Datengxia ត្រូវបានបំពាក់ដោយម៉ាស៊ីនតួប៊ីនលំហូរទឹកប្រភេទស្លាបចក្រតែមួយផ្លែចំនួន ៨ គ្រឿង ដែលមានសមត្ថភាពផលិតថាមពលបាន ២០០មេហ្គាវ៉ាត់ ជាមួយនឹងកម្លាំងជំរុញ ៣,៨០០ តោន ក្រោយពេលដំណើរការសាកល្បងរយៈពេល ៧២ម៉ោង ហើយវាក៏ជាប់ចំណាត់ថ្នាក់លេខ១ នៅក្នុង​ប្រទេសចិនផងដែរ។

ក្នុងអំឡុងពេលសាងសង់គម្រោងនេះ ក្រុមហ៊ុន Datengxia បានវិនិយោគយ៉ាងច្រើនសន្ធឹកសន្ធាប់​ដើម្បី​បង្កើតប្រព័ន្ធការពារបរិស្ថានទឹកដ៏ធំបំផុតនៅក្នុងប្រទេសចិន រួមទាំងមជ្ឈមណ្ឌលអភិរក្សត្រីដ៏កម្រនៅទន្លេ Hongshui, ផ្លូវទំនប់មេត្រីនៃទន្លេ Qianjiang និងផ្លូវចិញ្ចឹមត្រីជីវសាស្ត្រនៃទន្លេ Nanmu, ស្ថានីយ​បង្កាត់​​ពូជត្រីនៅទន្លេ Datengxia និងទន្លេ Laibin Hongshui, សំបុកត្រីសិប្បនិម្មិតចំនួន៤ និងកន្លែង​ពង​កូនសិប្បនិម្មិចំនួន១ ដើម្បីជួយដល់ការការពារប្រព័ន្ធអេកូឡូស៊ីនៃអាងទន្លេគុជ។

គម្រោង Datengxia គឺជាការគាំទ្រដ៏សំខាន់សម្រាប់សន្តិសុខថាមពលក្នុងតំបន់ ហើយរហូតមកដល់​ពេលនេះ ការផលិតថាមពលបន្ថែមនៃគម្រោងទំនប់ទឹកមួយនេះ មានកម្លាំងលើសពី ១២,៣០០ ជីហ្គាវ៉ាត់ម៉ោង។ ការសាងសង់គម្រោង Datengxia បានបើកនូវការដឹកជញ្ជូនសំខាន់ៗប្រមាណ ១០០ លានតោនលើផ្លូវទឹកមាសនៃទន្លេ Xijiang ។ បរិមាណនាវាចរណ៍នៃផ្លូវទឹកទន្លេ Qianjiang ត្រូវបានធ្វើ​ឱ្យ​ប្រសើរឡើងពីកម្រិត ៣០០ តោនទៅកម្រិតខ្ពស់បំផុត ៣,០០០តោន នៅក្នុងផ្លូវទឹកក្នុងប្រទេសចិន ព្រោះថា គម្រោង Datengxia ជាមជ្ឈមណ្ឌលដ៏សំខាន់របស់ផ្លូវទឹកមាសនៃទន្លេគុជ ដើម្បីសម្រេច​បាន​ការតភ្ជាប់ជាមួយទន្លេ និងសមុទ្រ។

បើតាមលោក Wang Xiaolin នាយកមជ្ឈមណ្ឌលគ្រប់គ្រងផ្លូវទឹករបស់ក្រុមហ៊ុន Datengxia បានឱ្យ​ដឹងថា «បន្ទាប់ពីការធ្វើនាវាចរណ៍នៃគម្រោងទំនប់ទឹក Datengxia រួចមក ផ្នែកនៃទន្លេដែលមាន​ចម្ងាយ​ជាង ១០០គីឡូម៉ែត្រនៅតំបន់អាងស្តុកទឹក Datengxia ត្រូវបានប្រែក្លាយជាប្រឡាយ ហើយច្រាំងថ្ម​ចោទ​ដ៏គ្រោះថ្នាក់ និងថ្មប៉ប្រះទឹកបានលិចទៅបាតទន្លេជាអចិន្ត្រៃយ៍»។

ផ្លូវកប៉ាល់សម្រាប់គម្រោង Datengxia បានបើកឱ្យធ្វើចរាចរណ៍ ២៤ម៉ោងក្នុងមួយថ្ងៃ ជាមួយបរិមាណ​ទំនិញរហូតដល់ ១៨,០០០តោន ដែលស្មើនឹងសមត្ថភាពដឹកជញ្ជូនតាមផ្លូវដែកចំនួន ៣០០គ្រឿង។ រាប់​ចាប់តាំងពីការបើកដំណើរការនៅឆ្នាំ ២០២០មក កប៉ាល់ដឹកទំនិញបានបើកឆ្លងកាត់គម្រោង Datengxia មានលើសពី ២០០លានតោន។

គម្រោង Datengxia ដែលជាផ្លូវទឹកដ៏សំខាន់នៅភាគនិរតីប្រទេសចិន បានតភ្ជាប់ទៅកាន់សមុទ្រ គ្រប់​គ្រង​ធនធានទឹក និងតំបន់អាងទន្លេ Xijiang ប្រមាណ ៥៦ភាគរយ ជាពិសេសដោយសារតែ​ទីតាំងភូមិ​សាស្ត្រ​​លើទន្លេគុជ គម្រោងមួយនេះត្រូវបានគេហៅថា «ជ្រលងភ្នំបី»។

យោងតាមលោក Hua Rongsun នាយកមជ្ឈមណ្ឌលគ្រប់គ្រងគម្រោងក្រុមហ៊ុន Datengxia បាន​ឱ្យ​ដឹង​ថា ការរួមបញ្ចូលគ្នានៃគម្រោង Datengxia និងអាងស្តុកទឹកចំនួន៦ អាចបង្កើនស្តង់ដារ​គ្រប់គ្រង​ទឹកជំនន់ក្នុងទីក្រុង Wuzhou ចន្លោះពី ៥០ឆ្នាំ ទៅ ១០០ឆ្នាំ និងបង្កើនស្តង់ដារគ្រប់គ្រងទឹកជំនន់ធំៗ​នៅ​ក្នុងតំបន់ដីសណ្ដទន្លេភាគពាយ័ព្យចន្លោះពេល ១០០ឆ្នាំ ទៅ ២០០ឆ្នាំ។

បើតាមការបញ្ជាក់ពីលោក Deng Xunfa នាយកគ្រប់គ្រងទូទៅនៃក្រុមហ៊ុន Datengxia លើកឡើងថា «គុណភាពទឹកនៅក្នុងអាងទន្លេ Xijiang គឺល្អឥតខ្ចោះ ដែលជាប់ចំណាត់ថ្នាក់ល្អមួយក្នុងចំណោម​ប្រព័ន្ធ​ទឹកកំពូលទាំង៧ នៅក្នុងប្រទេសចិន ស្របពេលដែលបច្ចុប្បន្នគម្រោង Datengxia ក៏កំពុងបន្តផ្តល់​ទឹក​ស្អាតទៅដល់តំបន់ស្វយ័តក្វាងស៊ី, ខេត្តក្វាងទុង និងម៉ាកាវផងដែរ»។

លោកបន្តថា ក្នុងនាមជាខែលការពារទី២ ដើម្បីធានាការផ្គត់ផ្គង់ទឹកទៅម៉ាកាវ និងទីក្រុងជូហៃ ទំនប់វារី​អគ្គិសនី Datengxia វាអាចកាត់បន្ថយពេលវេលាឆ្លើយតបទៅការផ្គត់ផ្គង់ទឹកបន្ទាន់ចេញ​ពីអាងពី ១០ ថ្ងៃ​មកត្រឹម ៣ថ្ងៃ ហើយវាក៏មានប្រសិទ្ធភាពក្នុងការទប់ស្កាត់ព្រឹត្តិការណ៍ជាច្រើន ដូចជាការកើនឡើង​ទឹកជំនន់ ការបំពុលទឹកភ្លាមៗ គ្រោះរាំងស្ងួត និងកង្វះទឹកនៅតំបន់ដីសណ្ដនៅតាមដងទន្លេជាដើម។

ចាប់តាំងពីច្រាំងទន្លេត្រូវបានដាក់ឱ្យដំណើរការក្នុងឆ្នាំ២០២០មក គម្រោងទំនប់ទឹក Datengxia បាន​ចូល​រួម​ក្នុង​ការរំដោះទឹកចេញពីក្នុងអាងទឹក។ មកដល់ពេលបច្ចុប្បន្ននេះ ទឹកសរុបចំនួន ១.៨ពាន់លាន​ម៉ែត្រគូប ត្រូវបានបំពេញបន្ថែមសម្រាប់ផ្នែកខាងក្រោម ដើម្បីធានាសុវត្ថិភាពទឹកជូនប្រជាជន​នៅក្នុងតំបន់​ឆ្នេរ​សមុទ្រក្វាងទុង-ហុងកុង-ម៉ាកាវ (GHM) រួមទាំងទីក្រុងជូហៃផងដែរ៕