(ពោធិ៍សាត់)៖ ប្រជាពលរដ្ឋមកពីស្រុកកណ្តៀង និងក្រុងពោធិ៍សាត់ ចំនួន ១,៦៦៨គ្រួសារ ដោយក្នុងមួយគ្រួសារទទួលបានស្រូវពូជចំនួន ១០០គីឡូក្រាម ពីប្រមុខរាជរដ្ឋាភិបាលកម្ពុជា តាមរយៈគណៈកម្មាធិការគ្រប់គ្រងគ្រោះប្រព័ន្ធស្បៀងបម្រុងកម្ពុជា សម្រាប់ស្តាឡើងវិញក្រោយពីទឹកសម្រក។
ពិធីចែកជូននេះបានប្រារព្ធធ្វើនារសៀលថ្ងៃទី២៦ ខែតុលា ឆ្នាំ២០២៣ នៅពហុកីឡដ្ឋានខេត្ត ក្រោមអធិបតីភាព លោក ខូយ រីដា អភិបាលខេត្តពោធិ៍សាត់ និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត, លោក គង់ គារ ទីប្រឹក្សាក្រសួង និងជាប្រធាននាយកដ្ឋានដំណាំស្រូវ នៃក្រសួងកសិកម្ម រុក្ខាប្រមាញ់ និងនេសាទ និងមានការចូលរួមពីអភិបាលរងខេត្ត ថ្នាក់ដឹកនាំមន្ទីរ និងកងកម្លាំងប្រដាប់ អាវុធទាំង៣។
លោក ខូយ រីដា បានថ្លែងដោយនាំមកនូវការផ្តាំផ្ញើសាកសួរសុខទុក្ខ និងសេចក្តីនឹករលឹក ពីសំណាក់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនប្រជាពលរដ្ឋទាំង១,១២០គ្រួសារ មកទទួលយកស្រូវពូជក៏ដូចប្រជាពលរដ្ឋទូទាំងខេត្ត ដែលសម្តេចតែងតែយកចិត្តទុកដាក់គិតគូរ ដោះស្រាយស្បៀង និងស្រូវពូជជូនប្រជាពលរដ្ឋ ដែលទទួលរងផលប៉ះពាល់ជំនន់ទឹកភ្លៀងនាចុងខែកញ្ញា និងដើមខែតុលា ឆ្នាំ២០២៣កន្លងមក នៅទូទាំងខេត្តបានទាន់ពេលវេលាប្រកបដោយតម្លាភាព ប្រសិទ្ធិភាព និងភាពជឿជាក់។
លោកអភិបាលខេត្តបានថ្លែងទៀតថា ស្បៀង និងស្រូវពូជ ដែលផ្តល់ជូននាកន្លងមក ក៏ដូចនាពេលនេះ ជាសក្ខីភាពបង្ហាញយ៉ាងច្បាស់ពីការគិតគូរយកចិត្តទុកដាក់ខ្ពស់ របស់ប្រមុខរាជរដ្ឋាភិបាលកម្ពុជា អំពីស្ថានភាពជីវភាពរបស់បងប្អូន ដែលទទួលរងផលប៉ះពាល់ដោយសារជំនន់ទឹកភ្លៀង ហើយនេះគឺជាស្រូវពូជសម្រាប់ស្តាឡើងវិញ បន្ទាប់ពីទឹកសម្រក និងជួយសម្រួលដល់ជីវភាពរបស់បងប្អូនដោយមិនអនុញ្ញាតឲ្យគ្រួសារណាមួយខ្វះស្បៀងបានឡើយ។
ជាមួយគ្នានោះលោកបានណែនាំឲ្យមន្ត្រីមន្ទីរកសិកម្ម រុក្ខាប្រមាញ់ និងនេសាទខេត្ត មន្ទីរធនធានទឹក និងឧតុនិយមខេត្ត និងអាជ្ញាធរមូលដ្ឋាន ត្រូវបង្កើនការប្រឹងប្រែងបន្ថែមទៀត លើការងារបង្កបង្កើនផលដែលជាស្បៀងតម្រូវការប្រចាំថ្ងៃ របស់ប្រជាកសិករទូទាំងខេត្ត។
ជាមួយគ្នានោះ លោកក៏បានលើកទឹកចិត្តដល់ប្រជាកសិករ ឲ្យខិតខំធ្វើការដាំដុះ ចិញ្ចឹមសត្វ និងបង្កើនមុខរបរផ្សេងៗទៀត ដើម្បីរួមគ្នាស្តារ និងបង្កើនសេដ្ឋកិច្ចគ្រួសារឡើងវិញ ក្នុងន័យកាត់បន្ថយភាពក្រីក្រ។ លោកសូមសម្តែងការអបអរសាទរ ចំពោះបងប្អូនប្រជាពលរដ្ឋទូទាំងខេត្តពោធិ៍សាត់ តែងតែបន្តចូលរួមគាំទ្រគោលនយោបាយរបស់រាជរដ្ឋាភិបាលកម្ពុជា និងទទួលបានចំណាត់ថ្នាក់លេខ១ ទូទាំងប្រទេស ក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ គឺជាមោទនភាពក្រៃលែង។
យោងតាមរបាយការណ៍របស់លោក ចាប នាង អភិបាលក្រុងពោធិ៍សាត់ បានបង្ហាញឲ្យឃើញថា ស្រុកកណ្តៀង និងក្រុងពោធិ៍សាត់បានទទួលរងការប៉ះពាល់ដោយជំនន់ទឹកភ្លៀង កាលពីចុងខែកញ្ញា និងដើមខែតុលា ឆ្នាំ២០២៣ បង្កការប៉ះពាល់សាលារៀន ផ្ទះសម្បែង វត្តអារាម និងហេដ្ឋារចនាសម្ព័ន្ធជាច្រើន។
ចំពោះផ្ទៃដីស្រែ ត្រូវស្តាឡើងវិញមានចំនួន១,៣២២ហិកតា ស្មើនឹង១,៦៦៨គ្រួសារ ក្នុងនោះក្រុងពោធិ៍សាត់ មាន៣សង្កាត់ ៩ភូមិ ប្រជាពលរដ្ឋ៥៤៨គ្រួសារ និងផ្ទៃដីស្តារឡើងវិញ ចំនួន៣៥៥ហិកតា និងស្រុកកណ្តៀង មាន៨ឃុំ ៧៦ភូមិ ប្រជាពលរដ្ឋចំនួន១,១២០គ្រួសារ និងផ្ទៃដីស្តារឡើងវិញ ចំនួន៩៦៧ហិកតា៕
