(ភ្នំពេញ)៖ លោក ខូវ មករា រដ្ឋលេខាធិការក្រសួងប្រៃសណីយ៍និងទូរគមនាគមន៍ នាព្រឹកថ្ងៃទី២៣ ខែតុលា ឆ្នាំ២០២៣ បានអញ្ជើញជាអធិបតីក្នុងសិក្ខាសាលាស្តីពី «Cyber Bootcamp Cambodia» ដែលប្រព្រឹត្តទៅចាប់ពីថ្ងៃទី២៣-២៧ ខែតុលា ឆ្នាំ២០២៣ ព្រមទាំងមានការអញ្ជើញចូលរួមពីមន្ត្រីជំនាញផ្នែកគោលនយោបាយនិងផ្នែកបច្ចេកទេសសន្តិសុខសាយព័រ មកពីបណ្តាអង្គភាព ក្រសួង-ស្ថាប័នរដ្ឋ សរុបប្រមាណ ២០រូប។

សិក្ខាសាលានេះរៀបចំឡើងដោយក្រសួងប្រៃសណីយ៍និងទូរគមនាគមន៍ សហការជាមួយសាកលវិទ្យាល័យជាតិអូស្ត្រាលី ក្នុងគោលបំណងបន្តជំរុញពង្រឹងសមត្ថភាពផ្នែកសន្តិសុខសាយប័រដល់តួអង្គពាក់ព័ន្ធឱ្យបានត្រៀមខ្លួនជាមុនក្នុងការគ្រប់គ្រង ទប់ស្កាត់ និងឆ្លើយតបទៅនឹងបញ្ហាសន្តិសុខឌីជីថលឱ្យមានប្រសិទ្ធភាពនិងទាន់ពេលវេលា ព្រមទាំងចូលរួមចំណែកអនុវត្តគោលនយោបាយរបស់រាជរដ្ឋាភិបាលឱ្យមានប្រសិទ្ធភាព។

នៅក្នុងឱកាសនោះ លោករដ្ឋលេខាធិការ ខូវ មករា បានមានប្រសាសន៍ថា សិក្ខាសាលានេះ ជាផ្នែកមួយនៃកិច្ចខិតខំប្រឹងប្រែងបន្តដើម្បីកសាងមូលធនមនុស្សផ្នែកសន្តិសុខសាយប័រដើម្បីឆ្លើយតបទៅនឹងការអភិវឌ្ឍយ៉ាងឆាប់រហ័ស និងការប្រើប្រាស់បច្ចេកវិទ្យា។

លោករដ្ឋលេខាធិការបានបន្ថែមថា សិក្ខាសាលានេះ បានផ្តោតលើប្រធានបទសំខាន់ៗដូចជា ទិដ្ឋភាពគំរាមកំហែងសន្តិសុខតាមអ៊ីនធឺណិតដែលយើងកំពុងប្រឈមមុខ ការការពារទិន្នន័យសម្រាប់សេដ្ឋកិច្ចនាពេលអនាគត ការការពារហេដ្ឋារចនាសម្ព័ន្ធព័ត៌មានសំខាន់ៗ ការទូតអន្តរជាតិ និងកិច្ចសហប្រតិបត្តិការលើសុវត្ថិភាពអ៊ីនធឺណិត ព្រមទាំងវិធីសាស្រ្តផ្អែកលើសិទ្ធិមនុស្សចំពោះសុវត្ថិភាពអនឡាញក្នុងការងារប្រចាំថ្ងៃផងដែរ៕