(ចិន)៖ ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បន្ទាប់ពីបញ្ចប់បេសកកម្មអមដំណើរសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ចូលរួមវេទិកា «ខ្សែក្រវាត់និងផ្លូវ» ហើយនោះ មិនទាន់បានត្រឡប់មកកម្ពុជាវិញនោះទេ។ លោកឧបនាយករដ្ឋមន្ត្រី បន្តដំណើរចុះតាមបណ្តាក្រុមហ៊ុនធំៗរបស់ចិន ដើម្បីបញ្ចុះបញ្ចូល និងលើកទឹកចិត្តឱ្យមកពួកគេមកវិនិយោគនៅកម្ពុជា។
នារសៀលថ្ងៃសៅរ៍ ទី២១ ខែតុលា ឆ្នាំ២០២៣ លោកឧបនាយករដ្ឋមន្ត្រី ស៊ុន ចាន់ថុល បានបន្តដំណើរ ចុះទស្សនកិច្ចនៅមជ្ឈមណ្ឌលបណ្តុះធុរកិច្ចថ្មីនៅទីក្រុងហ្គងចូវ (Guangzhou International Corporate Incubator [GICI]) របស់ក្រុមហ៊ុន Guangzhou Industrial Investment and Capital Operation Holding Group។
មជ្ឍមណ្ឌល GICI ជាមជ្ឈមណ្ឌលផ្តល់កិច្ចគាំពារផ្នែកធ្វើធុរកិច្ច ជាពិសេសការធ្វើធុរកិច្ចថ្មីៗ។ តាមរយៈការគាំទ្រ និងកិច្ចគាំពាររបស់មជ្ឍមណ្ឌលនេះ បានជួយឱ្យធុរកិច្ចថ្មីចំនួន១២ ទទួលជោគជ័យ រហូតដល់មានលទ្ធភាពអាចបោះភាគហ៊ុនលើទីផ្សារភាគហ៊ុនថែមទៀតផង។
ក្នុងដំណើរទស្សនកិច្ចនៅមជ្ឈមណ្ឌលនេះ ក្រុមហ៊ុនបានធ្វើបទបង្ហាញអំពីការងារមួយចំនួនជូនគណៈប្រតិភូកម្ពុជាដើម្បីបានជ្រាប។ ក្នុងនោះ លោកឧបនាយករដ្ឋមន្ត្រី ស៊ុន ចាន់ថុល បានជម្រាបជូនក្រុមហ៊ុនអំពីការលើកទឹកចិត្តខ្ពស់របស់រាជរដ្ឋាភិបាលកម្ពុជា លើកិច្ចការងារធុរកិច្ចថ្មីនេះ តាមរយៈការបើកឱកាសឱ្យមានកិច្ចសហប្រតិបត្តិការវិនិយោគ។
លោកឧបនាយករដ្ឋមន្ត្រី បានលើកទឹកចិត្តឱ្យក្រុមហ៊ុនសិក្សាលើការបណ្ដាក់ទុនវិនិយោគនៅកម្ពុជា ព្រមទាំងអញ្ជើញក្រុមហ៊ុនចុះមកទស្សនកិច្ចនៅកម្ពុជាដោយផ្ទាល់ ដើម្បីស្វែងយល់ឱ្យកាន់តែច្បាស់រាល់សក្ដានុពលរបស់កម្ពុជា។
ជាមួយគ្នានេះ ក្រុមហ៊ុនបានបង្ហាញឆន្ទៈចុះទស្សនកិច្ចនៅកម្ពុជា ដើម្បីពិនិត្យមើលលទ្ធភាពផ្តល់ទុនវិនិយោគដល់ធុរកិច្ចថ្មីនៅកម្ពុជា។ ក្រុមហ៊ុនក៏បានរំលេចបន្ថែមអំពីភាពជាដៃគូរបស់ខ្លួនកន្លងមកជាមួយបណ្ដាប្រទេសជាសមាជិករបស់កម្មវិធី «ខ្សែក្រវាត់និងផ្លូវ»។ ក្នុងនោះកម្ពុជា ក៏ជាសមាជិកកម្មវិធីនេះផងដែរ ដែលអនុញ្ញាតឱ្យក្រុមហ៊ុនមានភាពប្រាកដនិយមខ្ពស់ លើការធ្វើសហប្រតិបត្តិការ និងវិនិយោគជាមួយគ្នា៕
