(ភ្នំពេញ)៖ ក្នុងបេសកកម្មការងារនៅប្រទេសអារ៉ាប៊ីសាអូឌីត គឺចំថ្ងៃខួបកំណើតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ មន្ត្រីរាជរដ្ឋាភិបាលអារ៉ាប៊ីសាអូឌីត ក៏បានរៀបចំនំខួបកំណើត​ដ៏ស្រស់​ស្អាតមួយជូនសម្តេចធិបតី ដើម្បីអបអរសាទរក្នុងថ្ងៃដ៏មានសិរីមង្គលនេះ។

ថ្ងៃទី២០ ខែតុលា ឆ្នាំ២០២៣នេះ គឺជាខួបគម្រប់ ៤៦ឆ្នាំ ឈានចូល ៤៧ឆ្នាំ របស់សម្តេចធិបតី ហ៊ុន ម៉ាណែត។ ព្រោះតែការងារដ៏មមាញឹកដើម្បីបុព្វហេតុជាតិ និងប្រជាជន ក្នុងឋានៈជានាយករដ្ឋមន្ត្រី​របស់​កម្ពុជា ថ្ងៃកំណើតរបស់សម្តេចធិបតី ហ៊ុន ម៉ាណែត គ្មានឡើយការជួបជុំក្រុមគ្រួសារ និងកូនៗ ដើម្បី​អបអរសាទរថ្ងៃកំណើត។

តាំងពីមិនទាន់ក្លាយជានាយករដ្ឋមន្ត្រី ពេលនៅជាមេបញ្ជាការកងទ័ពជើងគោក សម្តេចធិបតី ហ៊ុន ម៉ាណែត ក៏មិនសូវជាមានពេលបានជួបជុំគ្រួសារ ដើម្បីធ្វើពិធីអបអរសាទរខួបកំណើតនោះឡើយ។ ថ្ងៃខួបកំណើតភាគច្រើន សម្តេចជាប់បំពេញភារកិច្ចក្នុងជួរទ័ពនៅតាមខេត្ត៕