(ចិន)៖ ក្នុងដំណើរទស្សនកិច្ចនៅទីក្រុង Shenzhen ដែលជាទីក្រុងបច្ចេកវិទ្យារបស់ចិននោះ ឧបនា​យក​រដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា បន្តចុះជួបជាមួយក្រុមហ៊ុនខ្នាតយក្ស​ជា​ច្រើនរបស់ចិន ដើម្បីបញ្ចុះបញ្ចូលឱ្យពួកគេមកវិនិយោកនៅកម្ពុជា។

នៅរសៀលថ្ងៃសុក្រ ទី២០ ខែតុលា ឆ្នាំ២០២៣នេះ លោក ស៊ុន ចាន់ថុល បានជួបជាមួយលោក Put Lee ប្រធានក្រុមហ៊ុន Xinyi Energy និងក៏ជាអនុប្រធានក្រុមហ៊ុន Xinyi Solar។

ក្នុងជំនួបនោះ លោកប្រធានក្រុមហ៊ុន បានលើកសរសើរអំពីគុណភាពខ្សាច់របស់ប្រទេសកម្ពុជា ដែលជា​សមាសធាតុសំខាន់សម្រាប់ផលិតកម្មកញ្ចក់។ ក្នុងនោះក្រៅពីផលិតជាកញ្ចក់ធម្មតា ក្រុមហ៊ុន​ក៏អាច​ផលិត​ជាកញ្ចក់សូឡា (Solar Glass) ដែលអាចទាញយកថាមពលពន្លឺ​ព្រះអាទិត្យ​យកមក​ប្រើ​ប្រាស់​បានផងដែរ។

ស្របតាមការលើកឡើងរបស់ប្រធានក្រុមហ៊ុនចិន, លោកឧបនាយករដ្ឋមន្ត្រី បានចង្អុលបង្ហាញអំពី​ឱកាស​វិនិយោគ​របស់​ក្រុម​ហ៊ុន​ក្នុងការបង្កើតរោងចក្រនៅប្រទេសកម្ពុជា ដើម្បីផ្គត់ផ្គង់កញ្ចក់សម្រាប់ទីផ្សារ​នៅក្នុងតំបន់ ដោយហេតុ​ថាកម្ពុជាមានខ្សាច់ដែលមានគុណភាពខ្ពស់ សមស្របសម្រាប់សង្វាក់ផលិត​កម្មកញ្ចក់។ លោកឧបនា​យក​​រដ្ឋមន្ត្រី ក៏បានអញ្ជើញលោកប្រធានក្រុមហ៊ុន Xinyi Energy ទៅទស្សន​កិច្ច​ប្រទេសកម្ពុជា ដើម្បី​ស្វែង​យល់អំពីសក្តានុពលសេដ្ឋកិច្ច និងការវិនិយោគបន្ថែមទៀតនៅកម្ពុជា។

បន្ទាប់ពីបានស្តាប់ការពន្យល់ណែនាំអំពីសក្តានុពល និងបរិយាកាសវិនិយោគនៅកម្ពុជា ក្រុមហ៊ុនក៏បាន​បង្ហាញ​ការតាំងចិត្តថា នឹងអញ្ជើញមកទស្សនកិច្ចសិក្សានៅប្រទេសកម្ពុជា ដោយផ្ទាល់ ដើម្បីស្វែងយល់​បន្ថែមអំពីភាពខ្លាំង សក្តានុពលសម្រាប់ផលិតកម្ម ព្រមទាំងស្វែងរកឱកាស​ដើម្បី​បណ្ដាក់​ទុនវិនិយោគ​នៅ​កម្ពុជា។

សូមជម្រាបថា ក្រុមហ៊ុន Xinyi Solar គឺជាក្រុមហ៊ុនមួយ ក្នុងចំណោមក្រុមហ៊ុនដែលផ្គត់ផ្គង់កញ្ចក់​ធំផុត​ក្នុង​ប្រទេសចិន ដែលមានរោងចក្រផលិតចំនួន១១ នៅទូទាំងប្រទេស។ ក្រុមហ៊ុននេះ ផលិតកញ្ចក់ប្រើ​សម្រាប់​​ទាញយកពន្លឺព្រះអាទិត្យប្រភេទ Photovoltaic ឈានមុខគេរបស់ពិភពលោក ហើយបើគិត​ត្រឹម​ថ្ងៃទី៣០ ខែមិថុនា ឆ្នាំ២០២៣។ ក្រុមហ៊ុននេះមានសមត្ថភាពរំលាយប្រចាំថ្ងៃ (daily melting capacity) សរុបចំនួន ២១,៨០០តោន៕