(ភ្នំពេញ)៖ នៅព្រឹកថ្ងៃទី១៥ ខែសីហា ឆ្នាំ២០១៦នេះ ឧប្បទ្ទវហេតុដែលកើតឡើងនៅព្រលានយន្តហោះ JFK, ទីក្រុង New York, សហរដ្ឋអាមេរិក ជាការតក់ស្លុតមួយ សម្រាប់អ្នកស្រឡាញ់សន្តិភាព និងសិទ្ធិនៃការរស់នៅ។

លោក ផៃ ស៊ីផាន ក្នុងនាមជាខ្មែរ-អាមេរិកាំង សូមថ្កោលទោសនូវអំពើហិង្សាអមនុស្សធម៌ និងមិនស៊ីវិល័យនេះ។ ក្រៅពីអំពើឃាតកម្ម ក្នុងគ្រប់ទិដ្ឋភាព គឺមានការ សម្លាប់យ៉ាងរង្គាលនៅទីលានសាធារណៈ ជាចំហរដោយគ្មានការកោតក្រែង នេះក៏មិនអាចបង្ហាញពីអសមត្ថភាពរបស់មន្ត្រីរដ្ឋការ ការពារសន្តិសុខ និងសុវត្ថិភាព សាធារណៈរបស់សហរដ្ឋអាមេរិកនោះទេ វាគ្រាន់តែជាឧប្បទ្ទវហេតុមួយប៉ុណ្ណោះ។

លោក ផៃ ស៊ីផាន បានថ្លែងយ៉ាងដូច្នេះថា «ក្នុងនាមខ្ញុំបានជជែកជាមួយមិត្តភក្តិបរទេស ដែលគេរស់នៅក្នុងប្រទេសកម្ពុជា ជាយូរឆ្នាំក៏ដូចជាមិត្តបរទេសជាទេសចរណ៍ ដែលបានស្នាក់នៅក្នុងរយៈពេលខ្លី ពួកគេបានសម្តែង នូវការចាប់អារម្មណ៍ខ្ពស់ លើសន្តិភាព និងសុវត្ថិភាពរបស់កម្ពុជា។ ពួកគេបាននិយាយថា កម្ពុជាអាចជាកន្លែង មួយដែលមានសន្តិភាព សន្តិសុខ សុវត្ថិភាពមួយ នៅក្នុងពិភពលោក ដែលគួរឲ្យចង់មកកំសាន្ត និងរស់នៅ ក៏ប៉ុន្តែរលកនៃការចោទប្រកាន់ និងការលាបពណ៌ នៃក្រុមដែលបានប្រើប្រាស់ពាក្យតិរច្ឆាន សម្អុយមាតុប្រទេស ឬពូជរបស់ខ្លួនច្បាស់ជាមិនថា ឲ្យសហរដ្ឋអាមេរិកជាប្រទេសតិរច្ឆាន ក្នុងករណីឃាតកម្មនេះឡើយ»។

«ខ្ញុំសូមចូលរួមសោកស្តាយ និងរំលែកទុក្ខយ៉ាងក្រៀមក្រំជាមួយក្រុមគ្រួសារជនរងគ្រោះ ជាមួយគ្នានេះដែរខ្ញុំក៏សូមលើកទឹកចិត្តដល់រដ្ឋបាលសហរដ្ឋអាមេរិក ក្នុងកិច្ចពង្រឹង និងយកចិត្តទុកដាក់ ក្នុងការថែរក្សាសុវត្ថិភាព និងសន្តិសុខដល់ប្រជាពលរដ្ឋ ដែលកំពុងរស់នៅ ក៏ដូចជាភ្ញៀវដែលឆ្លងកាត់» នេះបើយោងតាមលោក ផៃ ស៊ីផាន បញ្ជាក់បន្ថែម។

សូមជំរាបថា យោងតាមការចេញផ្សាយរបស់​សារព័ត៌មាន CNN ចេញផ្សាយនៅព្រឹកថ្ងៃនេះបានឲ្យដឹងថា មានករណីបាញ់​នៅ​ក្នុង​​អាកាសយានដ្ឋាន JFK Airport ដោយអ្នកដំណើរត្រូវបានជម្លៀស។ សាក្សីនៅក្នុងអាកាសយានដ្ឋាន បានរាយការណ៍មកថា បានឮសំឡេងស្នូរគ្រាប់កាំភ្លើង​ នៅក្នុង​ច្រកចេញដំណើរ Terminal 8 នៅវេលាម៉ោង ៩៖៣០នាទីយប់ (ត្រូវនឹងម៉ោង ៨៖៣០នាទីព្រឹក ម៉ោងនៅកម្ពុជា)។ ក្រោយពីទទួលបានព័ត៌មាន​នេះ ប៉ូលិសបានជម្លៀសអ្នកដំណើរចេញ និង​ស្វែងរកជនសង្ស័យ៕