(កំពង់ចាម)៖ លោក អ៊ុន ចាន់ដា អភិបាលខេត្តកំពង់ចាម នៅព្រឹកថ្ងៃទី២០ ខែតុលា ឆ្នាំ២០២៣ បានដឹកនាំមន្ត្រីពាក់ព័ន្ធ និងអាជ្ញាធរក្រុងកំពង់ចាម ចុះពិនិត្យទីតាំង រៀបចំពិធីប្រណាំងទូក «ង», ទូកខ្នាតអន្តរជាតិ បណ្តែតប្រទីប អុចកាំជ្រួច និងតាំងពិព័រណ៍សមិទ្ធផលនានា នៅថ្ងៃទី២៨-២៩ ខែតុលា ឆ្នាំ២០២៣ ដើម្បីអបអរសាទរបុណ្យចេញព្រះវស្សា។
លោកអភិបាលខេត្ត បានផ្តួចផ្តើមរៀបចំពិធីប្រណាំងទូក «ង» បណ្តែតប្រទីប អុជកាំជ្រួចនេះ ក្នុងគោលបំណង ដើម្បីថែរក្សាប្រពៃណី លើកស្ទួយវិស័យកីឡាអុំទូក និងបង្កបរិយាកាសសប្បាយរីករាយ ជូនបងប្អូនប្រជាពលរដ្ឋ ក្រោមម្លប់សុខសន្តិភាព។ ពិធីប្រណាំងទូក «ង» នេះ គឺមានការប្រណាំងទូកខ្នាតអន្តរជាតិផងដែរ ស្ថិតនៅក្រុងកំពង់ចាម។
នៅពេលរាត្រី មានការរៀបចំបណ្ដែតប្រទីប និងអុជកាំជ្រួច ព្រមជាមួយការតាំងពិព័រណ៍សមិទ្ធផលរបស់រដ្ឋបាលក្រុង-ស្រុក មន្ទីរ-អង្គភាពជុំវិញខេត្ត,ពិព័រណ៍ផលិតផលនានា និងការប្រគុំតន្រ្តី មានរយៈពេល ៣ថ្ងៃ ចាប់ពីថ្ងៃទី២៨- ៣០ ខែតុលា ឆ្នាំ២០២៣។
ខាងរដ្ឋបាលខេត្តកំពង់ចាម បានអំពាវនាវដល់សម្តេច ឯកឧត្តម លោកជំទាវ អ្នកឧកញ៉ា លោកឧកញ៉ា លោកអភិបាលនៃគណៈអភិបាលក្រុង-ស្រុក លោក-លោកស្រីប្រធានមន្ទីរ អង្គភាពជុំវិញខេត្ត ម្ចាស់ក្រុមហ៊ុន ពាណិជ្ជករ អាជីវករនានា និងលោក-លោកស្រី សូមមេត្តាជួយឧបត្ថម្ភ គាំទ្រជាថវិកា និងសម្ភារៈផ្សេងៗ ដល់គណៈកម្មការខេត្តរៀបចំពិធី ដើម្បីមានលទ្ធភាព ក្នុងការទ្រទ្រង់ដល់ក្រុមកីឡាករអុំទូក និងចាត់ចែងរៀបចំពិធីប្រណាំងទូក ង នេះ ឲ្យទទួលបានលទ្ធផលល្អប្រសើរផងដែរ៕
