(កំពង់ស្ពឺ)៖ រដ្ឋបាលខេត្តកំពង់ស្ពឺ នៅព្រឹកថ្ងៃទី១២ ខែតុលា ឆ្នាំ២០២៣ បានរៀបចំប្រារព្ធពិធីគោរពព្រះវិញ្ញាណក្ខន្ធថ្វាយ ព្រះករុណា ព្រះបាទសម្តេចនរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ គម្រប់ខួប១១ឆ្នាំ។
ពិធីនេះបានធ្វើឡើងក្រោក្រោមវត្តមានលោក យឹម សុខុម ប្រធានក្រុមប្រឹក្សាខេត្ត លោក វ៉ី សំណាង អភិបាលខេត្តកំពង់ស្ពឺ និងមានការចូលរួមពីសំណាក់ថ្នាក់ដឹកនាំគ្រប់ជាន់ថ្នាក់ មន្ត្រីរាជការ កងកម្លាំងប្រដាប់អាវុធ ព្រះសង្ឃ តាជី យាយជី សិស្សានុសិស្ស យ៉ាងច្រើនកុះករ នៅមុខសាលាប្រជុំសាលាខេត្តកំពង់ស្ពឺ។
ការប្រារព្ធពិធីនេះបានធ្វើឡើងដោយមានការនិមន្តព្រះសង្ឃសូត្រមន្តបង្សុកូលតាមបែបព្រះពុទ្ធសាសនាជាតិខ្មែរ ដើម្បីឧទ្ទិសព្រះរាជកុសលថ្វាយ ព្រះបរមរតនកោដ្ឋ ព្រះករុណាព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ។
ក្នុងឱកាសនោះលោក វ៉ី សំណាង បានថ្លែងថា ក្នុងនាមមន្ត្រីរាជការ កងកម្លាំងប្រដាប់អាវុធ ព្រះសង្ឃ សិស្ស និស្សិត ប្រជាពលរដ្ឋជាកូន ចៅ ចៅទួតទាំងអស់ក្នុងខេត្តសូមចូលរួមក្នុងភាពក្រៀមក្រំលំឱនកាយវាចា ចិត្តគោរពព្រះវិញ្ញាណក្ខន្ធ ថ្វាយព្រះវិញ្ញាណក្ខន្ធព្រះបរមរតនកោដ្ឋ ព្រះករុណាព្រះបាទសម្តេចព្រះនរោត្តមសីហនុព្រះមហាវីរក្សត្រជាទីគោរពសក្ការៈដ៏ខ្ពង់ខ្ពស់បំផុត និងចងចាំជានិច្ចនូវព្រះមហាករុណាទិគុណ និងព្រហ្មវិហារធម៌ដ៏ថ្លៃថ្លា ឧត្តុង្គឧត្តម វិសេសវិសាលរបស់ព្រះអង្គ ដែលបានលះបង់ព្រះកាយពល ព្រះបញ្ញាញាណ ក្នុងព្រះរាជ សកម្មភាព ដើម្បីបុព្វហេតុឯករាជ្យជាតិ បូរណភាពទឹកដី ផ្សះផ្សាជាតិ និងបង្រួបបង្រួមជាតិ ដែលបានធ្វើឱ្យ ព្រះរាជាណាចក្រកម្ពុជាមានសុខសន្តិភាព និងការអភិវឌ្ឍលើគ្រប់វិស័យហើយមានឈ្មោះល្បីល្បាញក្នុងឆាកអន្តរជាតិរហូតដល់សព្វថ្ងៃនេះ។
លោកអភិបាលខេត្ត បានបន្តថា ថ្វីបើព្រះរូប ព្រះកាយរបស់ព្រះអង្គ យាងទៅកាន់បរលោកទៅហើយក្តីប៉ុន្តែព្រះរាជលំអានព្រះវីរគំរូដ៏ឆ្នើមក្នុងការអភិវឌ្ឍរីកចម្រើនលើគ្រប់វិស័យរបស់អង្គសម្តេចឪជាអម្ចាស់ទ្រង់ស្ថិតនៅជានិច្ចកាលក្នុងមនសិការ និងឆន្ទៈរបស់ទូលព្រះបង្គំ យើងខ្ញុំទាំងអស់គ្នា ដែលជាកូនចៅចៅទួតមិនអាចបំភ្លេចបានឡើយ៕
