(ព្រៃវែង)៖ នៅព្រឹកថ្ងៃទី១៣ ខែសីហា ឆ្នាំ២០១៦ លោក ស សុខា អ្នកតំណាងរាស្រ្តវ័យក្មេងមណ្ឌលព្រៃវែង និងជាប្រធានសហភាពសហព័ន្ធយុវជនកម្ពុជា ខេត្តព្រៃវែង បានចាត់ឱ្យលោក តុប នេត ព្រមទាំងក្រុមការងារចុះសួរសុខទុក្ខ និងសំណេះសំណាលជាមួយលោកគ្រូអ្នកគ្រូ ១១៦នាក់ នៅវិទ្យាល័យពាមរក៍ ស្រុកពាមរក៍។
ក្នុងឱកាសនោះ លោក តុប នេត បានលើកឡើងនូវចំណុចមួយចំនួនទាក់ទងនឹង ការធ្វើអត្តសញ្ញាណប័ណ្ណគំរូថ្មី ការចូលរួមចុះឈ្មោះបោះឆ្នោត នាពេលខាងមុខ និងមូលនិធិសម្តេចក្រឡាហោម ស ខេង សម្រាប់ជួយស្រ្តីសម្រាលកូន និងមរណៈភាព។ ជាងនេះទៅទៀត លោកក៏បានលើកឡើង អំពីសារៈសំខាន់នៃការកសាង ពូនជ្រុំខឿន សន្តិភាព ស្ថិរភាពនយោបាយ ដែលកំពុងមានសព្វថ្ងៃ ដោយជៀសវាងសកម្មភាព អវិជ្ជមាននានាដែលអាចបង្កឱ្យមានចលាចល និងប៉ះពាល់ស្ថិរភាពសង្គម។
ជាចុងក្រោយ លោក តុប នេត ក៏បានផ្តាំផ្ញើដល់សិស្សានុសិស្ស ដែលត្រូវប្រលងបញ្ចប់មធ្យមសិក្សាទុតិយភូមិនាពេលខាងមុខ ខិតខំប្រលងឱ្យបានជាប់គ្រប់ៗគ្នា។ លោកក៏បានបញ្ជាក់ថា ចំពោះសិស្សទទួលបាននិទ្ទេស A លោក ស សុខា នឹងផ្តល់រង្វាន់ម៉ូតូម្នាក់ ១គ្រឿង និងទទួលបានអាហារូបករណ៍ចូលរៀនមហាវិទ្យាល័យ។ មុននឹងបញ្ចប់ លោក តុប នេត បានផ្ដល់ថវិកា និងសម្ភារមួយចំនួន របស់លោក ស សុខា ឧបត្ថម្ភជូនលោកគ្រូ អ្នកគ្រូ បង្រៀនស្ម័គ្រចិត្ត និងជូនវិទ្យាល័យពាមរក៍ សរុបជាទឹកប្រាក់ ៣,៣០០,០០០រៀល ផងដែរ៕
