(ព្រៃវែង)៖ នៅថ្ងៃទី១១ ខែតុលា ឆ្នាំ២០២៣នេះ រដ្ឋបាលស្រុកពារាំង ខេត្តព្រៃវែង បានរៀបចំពិធីប្រណាំងទូក ដើម្បីអបអរសាទរពិធីបុណ្យកាន់បិណ្ឌ និងភ្ជុំបិណ្ឌ ដែលជាប្រពៃណីរបស់ខ្មែរ។
ពិធីប្រណាំងទូកនេះ មានទូកចូលរួមប្រណាំងចំនួន៣៤ទូក មកពីស្រុកផ្សេងៗគ្នានៅក្នុងខេត្តព្រៃវែង។ ក្នុងពិធីនោះ ក៏មានការចូលរួមទស្សនាកម្សាន្តពីមន្ត្រីរាជការ អាជ្ញាធរ កងកម្លាំងប្រដាប់អាវុធ និងប្រជាពលរដ្ឋជាង ៧ពាន់នាក់។ ពិធីប្រណាំងបានប្រព្រឹត្តទៅក្រោមបរិយាកាសយ៉ាងសប្បាយរីករាយ។
លោក ចេម ប្រា អភិបាលស្រុកពារាំង បានថ្លែងថា ការរៀបចំពិធីប្រណាំងទូកនេះ រៀបចំឡើងក្នុងបំណងអបអរសាទរបុណ្យកាន់បិណ្ឌ និងភ្ជុំបិណ្ឌ និងដើម្បីនាំភាពសប្បាយរីករាយជូនប្រជាពលរដ្ឋ។ បន្ថែមពីលើនេះ ការប្រណាំងទូកនេះ ក៏ជាការសមសមត្ថភាពរបស់អ្នកអុំទូក ដើម្បីចូលរួមការប្រណាំងទូកងថ្នាក់ជាតិនាខែវិច្ឆិកាខាងមុខផងដែរ។
លោក គង់ លីវ៉ា ជំនួយការសម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានបង្ហាញក្តីសោមនស្សរីករាយជាខ្លាំង ដែលបានចូលរួមក្នុងពិធីប្រណាំងទូកងជាប្រពៃណីខ្មែរនៅក្នុងស្រុកពារាំង។
លោក លីវ៉ា បានលើកឡើងថា ការប្រណាំងទូកជាពិធីមួយ ដើម្បីរំលឹកដល់ភាពខ្លាំងរបស់កងទ័ពជើងទឹកខ្មែរក្នុងសម័យដើម។ តែសម្រាប់ពេលបច្ចុប្បន្នការអុំទូក ជាការបង្ហាញឱ្យឃើញនូវសាមគ្គីភាពរបស់ពលរដ្ឋខ្មែរនៅក្នុងចំណុះទូកនីមួយៗ។ ការអុំទូកនេះ បានផ្តល់មេរៀនអប់រំថា ការរួមសាមគ្គីគ្នា ទើបអាចនាំមកនូវជ័យជម្នះ។
ក្នុងឱកាសនោះ លោក លីវ៉ា បានរំលឹកដល់ចំណុះទូក ក៏ដូចជាអ្នកចូលរួមផងដែរថា ការរៀបចំពិធីប្រណាំងទូកនេះអាចធ្វើទៅបានដោយសារតែកម្ពុជា មានសុខសន្តិភាព និងស្ថេរភាពសង្គម។ ផ្ទុយទៅវិញបើកម្ពុជា ពើបប្រទះនឹងភ្លើងសង្គ្រាមដូចកាលពីអតីតកាល ឬដូចប្រទេសមួយចំនួននាពេលបច្ចុប្បន្ននេះ គឺមិនអាចរៀបចំបាននោះឡើយ។
ក្នុងន័យនេះ លោក គង់ លីវ៉ា បានអំពាវនាវដល់ប្រជាពលរដ្ឋទាំងអស់ ត្រូវចេះរួបរួមគ្នាថែរក្សាឱ្យបានសុខសន្តិភាព ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងសម្តេចតេជោ ហ៊ុន សែន ប្រធានគណបក្សប្រជាជនកម្ពុជា។
លោក លីវ៉ា បានក្រើនរំលឹកប្រជាពលរដ្ឋមិនត្រូវជឿងតាមការញុះញង់ណាមួយប្រព្រឹត្តរឿងផ្ទុយនឹងច្បាប់ ដែលអាចជាហេតុបំផ្លាញសុខសន្តិភាពនោះឡើយ៕
