(សៀមរាប)៖ នៅមុននេះបន្តិច លោក ឃឹម ប៊ុនសុង អភិបាលខេត្តសៀមរាប បានថ្លែងប្រាប់អង្គភាព Fresh News ថា ករណីបាត់ភ្ញៀវទេសចរណ៍ ជនជាតិបារាំងមួយគ្រួសារ០៤នាក់ និងមគ្គុទ្ទេសទេសចរណ៍ម្នាក់ ដែលទៅលេងនៅរមណីដ្ឋានក្បាលស្ពាន, ប្រហែលចំណាយពេលប្រមាណជាង១ម៉ោងទៀត ពួកគាត់ នឹងមកដល់កន្លែងសុវត្ថិភាពហើយ បន្ទាប់ពីបានរកឃើញ និងជួបពួកគាត់ដោយផ្ទាល់ហើយនៅក្នុងព្រៃភ្នំ។

លោក ថោង ខុន រដ្ឋមន្រ្តីក្រសួងទេសចរណ៍ ក៏បានអញ្ជើញទៅកាន់ខេត្តសៀមរាបភ្លាមៗនៅព្រឹកថ្ងៃសៅរ៍នេះ ដើម្បីចូលរួមសហការជាមួយអាជ្ញាធរ ដើម្បីស្វែងរកភ្ញៀវបរទេសនេះ។ ការស្វែងរកនេះ ក៏បានប្រើប្រាស់ឧទ្ធម្ភាគចក្រមួយគ្រឿង ហោះពីលើដើម្បីពិនិត្យមើលផងដែរ។

ការស្វែងរកឃើញពួកគាត់ បន្ទាប់ពីក្រុមការងារកំណត់បានទីតាំង តាមរយៈប្រព័ន្ធ GPS ទូរស័ព្ទ ដែលនៅលើភ្នំរហូតដល់ព្រំប្រទល់ស្រុកបន្ទាយស្រី និងស្រុកវ៉ារិន្ទ, កម្លាំងស្វែងរកដឹកនាំដោយអភិបាលរង, ស្នងការនគរបាល, បញ្ជាការមេបញ្ជាការអាវុធហត្ថ និងកម្លាំងយោធាផងដែរ ព្រមទាំងត្រៀមរថយន្តសង្គ្រោះបន្ទាន់ទៀតផង។

សមត្ថកិច្ចបានឲ្យដឹងទៀតថា ជនជាតិបារាំងមួយគ្រួសារនោះមាន៤នាក់ (ឪពុក,ម្តាយ​ និងកូនស្រី២នាក់​ អាយុខ្ទង១៦-២០ឆ្នាំ) ស្នាក់នៅសណ្ឋាគារ Please Villa ស្ថិតនៅកែងផ្លូវសុខសាន្ត ក្រុងសៀមរាប។ ភ្ញៀវទេសចរណ៍នោះជាភ្ញៀវធួរ តាមរយៈក្រុមហ៊ុន​ ឥណ្ឌូឆាយណា។

បើទោះបីជាយ៉ាងណារហូតមកដល់ម៉ោង ១១ថ្ងៃទី១៣ ខែសីហា នេះ ភ្ញៀវទេសចរ ដែលវង្វេងព្រៃ បានជួបជាមួយក្រុមអ្នកជួយសង្រ្គោះ និងទទួលបានទឹក ចំណីអាហារខ្លះផងដែរ ហើយ ក្រុមអ្នកជួយសង្រ្គោះកំពុងនាំពួកគេចុះពីលើភ្នំវិញ។ នេះបើតាមការបញ្ជាក់បន្ថែមរបស់លោក ថោង ខុន។ 

សូមជំរាបថា ព័ត៌មានពីសមត្ថកិច្ចសៀមរាប បានរៀបរាប់អំពីហេតុការណ៍​ អំពីករណី​បាត់វង្វេងភ្ញៀវទេសចរណ៍នេះថា៖

នៅម៉ោង០៧​៖៣០នាទីព្រឹកថ្ងៃសុក្រ​ អ្នកបើករថយន្តឈ្មោះ​ ម៉ៅ​ សុភាព​ បានដឹកភ្ញៀវ​ និងមគ្គុទ្ទេសទៅទស្សនារមណីដ្ឋានក្បាលស្ពាន​ ទៅដល់ម៉ោង០៩​៖០០នាទី​ ភ្ញៀវ​ និងមគ្គុទ្ទេសបានកម្មង់បាយម្ហូបទុក​ នៅជើងភ្នំ រួច​ហើយបានប្រាប់ថា យ៉ាងយូរម៉ោង១៣៖០០នាទីរសៀល និងចុះមកញាំបាយវិញ​ លុះដល់ម៉ោង១២​៖០០នាទី​មគ្គុទេស បានទូរស័ព្ទប្រាប់ថា វង្វេងផ្លូវ​ហើយតៃកុងឡានបានឲ្យជួបនគរបាល ដែលប្រចាំការនៅខាងក្រោម​ និយាយបានបន្តិចក៏ដាច់ការទាក់ទង រហូតដល់ពេលនេះក៏នៅតែមិនឃើញ។​ នៅពេលនេះទាំងនគរបាល​ និងឆ្មាំ​ កំពុងតែដើររក​ តែមិនទាន់មានដំណឹងនៅឡើយ៕