(ភ្នំពេញ)៖ លោក លីម ប៊ុនហុក អគ្គលេខាធិការរងរដ្ឋសភា នារសៀលថ្ងៃទី៩ ខែតុលា ឆ្នាំ២០២៣ បានអញ្ជើញនាំយកសារលិខិតរំលែកទុក្ខ និងថវិកា របស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ជូនក្រុមគ្រួសារនិស្សិតឈ្មោះ ចាន់ ឧត្តម ដែលជានិស្សិតនៅសាកលវិទ្យាល័យភូមិន្ទកសិកម្ម (ចំការដូង) នៅគេហដ្ឋាន ភូមិស្វាយតាមេឃ ឃុំកោះធំ "ខ" ស្រុកកោះធំ ខេត្តកណ្តាល ដែលទទួលមរណភាពនៅក្នុងហេតុការណ៍ប្រយុទ្ធគ្នារវាងកងទ័ពអ៉ីស្រាអែល និងក្រុមហាម៉ាស់។
នៅក្នុងសារលិខិតរំលែកទុក្ខ របស់សម្តេចមហារដ្ឋសភាធិការធិបតី ឃួន សុដារី មានខ្លឹមសារដូចតទៅ៖ «ក្នុងនាមរដ្ឋសភានៃព្រះរាជាណាចក្រកម្ពុជា និងក្នុងនាមសម្តេចផ្ទាល់ សម្តេចមានក្តីរំជួលចិត្តឥតឧបមានិងសោកស្តាយជាពន់ពេក ដោយបានទទួលដំណឹងដ៏ក្រៀមក្រំថា លោក ចាន់ ឧត្តម ដែលជាកូនបង្កើតរបស់លោក លោកស្រី និងជានិស្សិតនៅសាកលវិទ្យាល័យភូមិន្ទកសិកម្ម (ចំការដូង) បានទទួលមរណភាពដោយសារហេតុការណ៍ប្រយុទ្ធគ្នារវាងកងទ័ពអ៉ីស្រាអែល និងក្រុមហាម៉ាស់ នៅតំបន់ហ្កាហ្សា កាលពីថ្ងៃសៅរ៍ ទី៧ ខែតុលា ឆ្នាំ២០២៣ ក្នុងជន្មាយុ ២៤ឆ្នាំ ក្នុងអំឡុងពេលលោកកំពុងស្នាក់នៅនិងបន្តការសិក្សានៅប្រទេសអុីស្រាអែល»។
ក្នុងវេលាប្រកបដោយសមានទុក្ខដ៏មហាក្រៀមក្រំនេះ សម្តេចមហារដ្ឋសភាធិការធិបតី ឃួន សុដារី សូមចូលរួមរំលែកនូវមរណទុក្ខប្រកបដោយក្តីសង្វេតសោកស្តាយស្រណោះអាឡោះអាល័យជាទីបំផុតជាមួយលោក លោកស្រី និងក្រុមគ្រួសារនៃសព ចំពោះការបាត់បង់លោក ចាន់ ឧត្តម ដែលជាការបាត់បង់នូវធនធានមនុស្សមួយរូប ដែលបានកំពុងបំពេញបេសកកម្មបន្តការសិក្សា ដើម្បីបង្កើនកម្រិតសមត្ថភាពយកមកបម្រើប្រទេសជាតិមាតុភូមិ។
ជាមួយគ្នានេះដែរ សម្តេចមហារដ្ឋសភាធិការធិបតី ឃួន សុដារី សូមឧទ្ទិសបួងសួងដល់ដួងវិញ្ញាណក្ខន្ធលោក ចាន់ ឧត្តម សូមឆាប់បានទៅកាន់សុគតិភពកុំបីឃ្លៀងឃ្លាតឡើយ។ សូមលោក លោកស្រី ទទួលនូវមនោសញ្ចេតនារំលែកទុក្ខដ៏ក្រៀមក្រំពីសម្តេច៕
