(ថៃ)៖ មានករណីបំផ្ទុះគ្រាប់បែកពីរកន្លែងផ្សេងទៀត នៅមុខស្ថានីយប៉ូលិស​ និងនាយកដ្ឋានកងម៉ារីន ក្នុងខេត្ត Kanchanaburi កណ្ដាលប្រទេស​ថៃ បណ្ដាលឲ្យមនុស្សម្នាក់ស្លាប់ និងរបួស៤នាក់។ (ជាករណីលើកទី៣) នេះ​បើយោងតា​មការចេញផ្សាយរបស់សារព័ត៌មានបាងកកប៉ុស្ដិ៍​ចេញផ្សាយនៅមុននេះបន្តិច។

ប៉ូលិសប្រចាំតំបន់ លោក Sirichai Singwasin បានថ្លែងឲ្យដឹងថា នៅម៉ោងប្រមាណ ៨៖០២នាទីព្រឹក មានករណី​បំផ្ទុះ​គ្រាប់បែកមួយឡើងនៅមុខនាយកដ្ឋានកងម៉ារីនប្រចាំតំបន់ ដែលបណ្ដាលឲ្យមនុស្សម្នាក់ស្លាប់ និង​៣០នាទីក្រោយមក​ក៏​កើតមានករណីផ្ទុះគ្រាប់បែកផ្សេងទៀតនៅមុខ​ស្ថានីយប៉ូលិសក្នុងស្រុក Maung ចម្ងាយ ៤០០ម៉ែត្រពីនាយកដ្ឋានកងម៉ារីន ដែលបណ្ដាលឲ្យមនុស្ស៤នាក់របួស។

យោងតាមការបញ្ជាក់ពីប៉ូលិសបានឲ្យដឹងថា គ្រាប់បែកដែលផ្ទុះទាំងពីរលើកនោះ អាចជាគ្រាប់បែកច្នៃ ដែលផលិត និង​បញ្ជា​តាមរយៈ​ទូរស័ព្ទដៃ។

នៅព្រឹកថ្ងៃនេះផងដែរ ក៏មានករណីផ្ទុះគ្រាប់បែកផ្ទួនៗគ្នា​នៅ Resort មួយកន្លែង ស្ថិតនៅឆ្នេរសមុទ្រ នៃទីក្រុង ហួរហីន (Hua Hin) ប្រទេសថៃ បណ្តាលឲ្យស្រ្តីម្នាក់ស្លាប់ និង២៣នាក់​រងរបួស និងមួយករណីទៀតកើតមាននៅភាគខាងត្បូងប្រទេសថៃ សម្លាប់មនុស្សម្នាក់ និងមិនទាន់ដឹងពីអ្នករងរបួស។

សូមជំរាបថា កាលពីយប់មិញមានករណី ផ្ទុះគ្រាប់បែក២គ្រាប់ ស្ថិតនៅក្បែរឆ្នេរសមុទ្រ នៃទីក្រុង ហួរហីន (Hua Hin) បណ្តាលឲ្យស្រ្តីម្នាក់ ជាអ្នកលក់ដូរនៅតាមឆ្នេរសមុទ្រស្លាប់ ក្នុងនោះរងរបួស២៣នាក់ មាន៩នាក់ជាជនជាតិបរទេស៕