(ភ្នំពេញ)៖ អ្នកជំនាញអារ្យធម៌ខ្មែរ លោក រ័ត្ន សណ្តាប់ បានថ្លែងថា បើនិយាយអំពីពិធីបុណ្យភ្ជុំបិណ្ឌ -កាន់បិណ្ឌ ចាប់ពីថ្ងៃទី១រោច ខែភទ្របទ រហូតដល់នៅថ្ងៃទី១៥រោច ខែខែភទ្របទ ដែលជាពិធីបុណ្យប្រពៃណីជាតិដ៏វែងជាងគេ ក្នុងចំណោម ពិធីបុណ្យទាំងឡាយរបស់ប្រទេសកម្ពុជា ហើយដែលយើងតែងឮសត្វចាបដូនតាយំយ៉ាងរណ្ដំុដ៏គ្រលួច នៅលើទីទួលគុម្ពោតព្រៃតាមភូមិ វត្ដអារាមនានា ទូទាំងប្រទេសកម្ពុជាដ៏គួរឲ្យស្រណោះនេះ គឺជាការបញ្ជាក់ប្រាប់ដាស់តឿនដល់កុលបុត្រកូនចៅប្រុស-ស្រីឲ្យដឹងផងដែរថា រដូវបុណ្យភ្ជុំបិណ្ឌបានមកដល់ហើយ ដែលស្ថិតក្នុងប្រព័ន្ធជំនឿខ្មែរតាំងពីបុរាណរៀងមក។
ព្រោះនៅក្នុងប្រព័ន្ធជំនឿខ្មែរ សត្វចាបដូនតាយំតែក្នុងរដូវបុណ្យភ្ជុំបិណ្ឌនេះ គឺមិនខុសពីបុព្វការីជន ឬឪពុកម្ដាយ យាយតា ដែលជាព្រះរស់របស់ខ្លួនស្រែកយំដោយក្ដីនឹករលឹកដល់កូនចៅនោះទេ។
លោក រ័ត្ន សណ្តាប់ បន្ដថាពាក់ព័ន្ធនិងប្រវត្តិសត្វចាបដូនតាយំនេះផងដែរ មានសេចក្តីដំណាលថា កាលពីព្រេងនាយមានយាយ និងចៅមាណពម្នាក់រស់នៅជាមួយគ្នា ហើយចៅមាណពនោះ តែងតែដើរបរបាញ់សត្វ ។ លុះថ្ងៃមួយចៅមាណព បាញ់បានសត្វចាបមួយក្បាលក៏យកឲ្យយាយរបស់ខ្លួនអាំងទុកបរិភោគ ប៉ុន្តែក្រោយពីយាយអាំងសត្វចាបនោះឆ្អិន សាច់ក៏ររួមស្វិតខុសពីសភាពដើម ។
ចៅមាណព ឃើញដូច្នេះ ក៏ខឹងក្រោវក្រាធយ៉ាងខ្លាំងដោយគិតថា យាយរបស់ខ្លួន ប្រាកដជាលួចបរិភោគជាពុំខាន ហើយក៏សម្លាប់យាយរបស់ខ្លួនចោល ។ ប៉ុន្តែនៅពេលដែលចៅមាណព វាយលោកយាយរបស់ខ្លួននោះ គឺយាយ បានស្រែកដដែលៗថាស្វិតទេចៅៗ ។ លុះដល់ពេលដែលយាយនោះស្លាប់ទៅ ក៏បានកើតជាសត្វចាបដូនតា ទើបស្រែកឮសូរដូចយំថា ស្វិតទេចៅៗ តរៀងមក។
បើឈរលើប្រព័ន្ធជំនឿខ្មែរនេះ គឺជាគតិអប់រំដល់កុលបុត្រកូនចៅ ប្រុស-ស្រីទាំងទ្បាយថា មុននឹងសម្រេចកិច្ចការអ្វីមួយ គឺត្រូវត្រិះរិះពិចារណាឲ្យបានគ្រប់ជ្រុងជ្រោយ ល្អិតល្អន់ជាមុនសិន ។
ជាចុងក្រោយលោក រត្ន័ សណ្ដាប់ បញ្ជាក់ថាហេតុនេះនៅក្នុងរដូវបុណ្យភ្ជុំបិណ្ឌដែលជាប្រពៃណីដ៏ល្អផូរផង់របស់ខ្មែរយើងនេះ ចំពោះកុលបុត្រកូនចៅប្រុស-ស្រីទាំងទ្បាយណា ដែលបានដឹងគុណបុព្វការីជនឬមាតាបិតារបស់ខ្លួនគឺកុលបុត្រកូនចៅប្រុស-ស្រីនោះមានឈ្មោះថា"ជាមនុស្សដ៏ប្រសើរឧត្ដុង្គឧត្ដម" ហៅថា"យសសិរី" ទំាងក្នុងលោកនេះនិងលោកខាងមុខ។ តែផ្ទុយទៅវិញចំពោះកុលបុត្រកូនចៅប្រុស-ស្រីណាដែលមិនគោរពដឹងគុណបុព្វការីជនឬ មាតាបិតារបស់ខ្លួនក៏មានទោសដ៏ធ្ងន់ធ្ងរបំផុតទំាងក្នុងលោកនេះនិងលោកខាងមុខផងដែរ។
ពីព្រោះពិធីបុណ្យភ្ជុំបិណ្ឌ គឺជាពិធីបុណ្យរំឭកនឹកគុណដល់បុព្វការីជនឬគុណមាតាបិតា ដែលបានផ្ដល់កំណើតឲ្យយើង ដែលជាការតភ្ជាប់រវាងកាលទាំងបី គឺអតីត បច្ចុប្បន្ន អនាគត ដើម្បីកុំឲ្យភ្លេចនូវពូជពង្សវង្សត្រកូល និងមាតុភូមិរបស់ខ្លួន ៕
